Read Siyin Chin Luke 20 Bible Online

Luke 20 - Siyin Chin bible

Luke 20

¹Ni khat Jesus in Biakinn sungah mihonpite Lungdamna Thu huvau hilna le thuhilna a nei laitakin, Thiampi liante, Thukham hil syate, le upate hong pai a,

²ama munah, “Hi bangin na ngamtat thei natu in, bang thu nei ni ziam? Akua in tuabang thunei theina hong pia ziam?” ci uh hi.

³Jesus in, “Kei zongh thu khat kong dongh tu hi.

⁴John ii tuiphum piak theina sia Pathian ii tung panin hong pai ziam maw mihing tung pan hong pai ziam, hong son tavun” ci hi.

⁵Amate sung teng kam kinial a, “Bang ci tu hi ziam? Pathian tung pan ci leang, ‘Tua ahile banghangin John um ngawl nu ziam?’ hong ci tu hi.

⁶Tuabang ci bua ii, ‘Mihing tung pan’ ci leang le, mihonpite in ei suangtum taw hong deanglum tu hi, banghang ziam cile amate in John sia kamsaang khat hi ci in um uh hi.

⁷Tua ahikom, “Koisung pan hong pai ziam ci he ngawl khu hi,” ci in zo hi.

⁸Jesus in amate tungah “Tua ahile kei zongh bang thuneina taw hi bangin ngamta khi ziam ci in kong son buatu hi.” ci hi.

⁹Tua zawkciang Jesus in mihonpite tungah hi thusonteena son hi. “Khatvei lai in, mihing khat in sapitkungte suan in, pawlkhat in saapsak a, khuangei ma inn nusia hi.

¹⁰Sapit ngate law hun ciangin a silate khat paisak a, ama tel tu sapitte ngensak hi. Ahizong huan saapte in, a silapa vel a bangma pia ngawlin heak kiksak hi.

¹¹Tua ahikom sila dangkhat paisak kik hi; ahihang huan saapte in ama zongh vel a, maizum pia in, bangma ngawl taw heak kiksak hi.

¹²Tua zawkciangin ama in sila thumna sia paisak hi; huan saapte in tua pa zongh liamsak in huang pua ah vawk hi.

¹³Tuasia ciangin huan neipa in, “Bang law tu khi ziam? Ka it ka tapa paisak tong: tua hile amate in na thasia nanak tu hi!” ci hi.

¹⁴Ahihang huan saapte in tua pa a mu ciang, khat le khat kikum a, “Hi sia huan neipa ii tapa hi. Thatlum tawng, tua hile a neisa teng ei aa suak tu hi!” ci uh hi.

¹⁵Tua ahikom sapithuan pua sangah ama not in thatlum uh hi. Jesus in hi bangin dongh hi, “Tua ci leang sapithuan neipa in huan saapte bang law tu ziam?

¹⁶Ama in hong pai tu a, tua mihingte thatlum in, sapithuan sia ngualdang in saapthawsak tu hi,” ci hi. Mihonpi in hi thu a zaak uh ciangin, “Tuabang suak thei ngawl tu hi!” ci uh hi.

¹⁷Jesus in amate en a, “Tua ahile hi laithiangtho in bang ci nuam ziam? Inn sate ii mannung ngawl hi ci a, a nil suangtum sia a thupibel suangtum suak hi.

¹⁸Tua suang tungah a puk peuma a bek a bekin kikhen tu a, tuaciang in tua suang sia khat po ii tungah hong taaksuk le tua pa sia leivui bangin zaantham tu hi,” ci hi.

¹⁹Thukham hil syate le thiampi liante in tua munah Jesus mat sawm uh hi, banghang ziam cile amate in, ama ii son thusonteena sia amate a cina ahi hunlam he uh hi. Ahizong amate in mihonpite kiita uh hi.

²⁰A mat thei natu hunpha zong uh hi. Thuneite le Rome ngamuk mangpa tungah Jesus a aap thei natu in, thinsung takpi taw thu dongh nuam bangin a kiheang tu mihing pawlkhat sumnguk pia in paisak a, Jesus aitaa uh hi.

²¹Hi thudawpkute in Jesus tungah, “Sya awng na paunate le na hilnate maan hi, ci in ka he uh hi. Milian mino na awlmawk bua a, Pathian ii mihingte atu, a deisak thumaan thute hil hi, ci in kong he uh hi.

²²Tua ahile ei thukham in Rome Kumpilianpa tungah shia piak tu khaam ziam maw khaam ngawl ziam hong son ta'n,” ci hi.

²³Ahihang Jesus in amate thin kukal teng phawk a,

²⁴“Ngunn dangka khat hong la tavun. Akua lim le min a tungah ki at ziam?” ci hi. “Kumpilianpa aa hi,” ci uh hi.

²⁵Jesus in “Pha hi, tua ahile Kumpilianpa ii neisa Kumpilianpa pia tavun a, Pathian neisa Pathian pia tavun,” ci hi.

²⁶Tua mun mihonpite mai ah a mat thei natu thu mal khat zongh om ngawl ahikom amate thim khipkhep in om a, a zo kik nate lamdang sa uh hi.

²⁷Tuaciangin mithite tho kik nawn ngawl tu hi, a ci Sadducee te Jesus kungah hong pai a, hi bangin ci uh hi:

²⁸“Sya awng, Moses in hi thukhamte ei atu in a at hi: ‘Mihing khat in ta nei ngawlin a thi le, tua pa ii suapuipa in, meingongnu teenpui in, mithipa ii ta tatak bangin, a kingaisun thei tu in, ta neipui tu hi,’ ci hi.

²⁹Khatvei lai in unau pa sali om hi: a ubel sia in zi nei a, ta nei ngawlin thi hi.

³⁰Tua zawkciang a niina sia in a numei sia teenpui hi.

³¹Tua zawkciangin a thumna sia zongh tuabang ma ahi hi. A unau sali bupin, tuabang ma hi siat hi — ta nei ngawlin thi siat uh hi.

³²A khakbel in numeinu zongh thi hi.

³³Tu in mithite nungta tu in hong thaw kik ciangin numei sia akua ii zi hi tu ziam? Amate sali in teenpui tek hi,” ci uh hi.

³⁴Jesus in, “Tu hunin numeite le pate kiteang hi,

³⁵ahihang thina pan tho kikin, a nungta tu a kilawmte, hong pai pheang tu hun sungah kiteenna om nawn ngawl tu hi.

³⁶Amate vantunglalangte bang hi tu a, a thithei buatu uh hi. Amate Pathian ii tate a suak uh hi, banghang ziam cile amate thina panin tho kik uh hi.

³⁷A thite nuntakna sungah kitho kiksak tu hi, ci in Moses in thiangtho takin lak hi. Sawlpaang kuang thu huvau a sonna munah Topa sia ama in, Abraham ii Pathian, Isaac ii Pathian, le Jacob ii Pathian,” ci hi.

³⁸Ama sia a nungtate Pathian hi a, a thisate Pathian hi ngawl hi banghang ziam cile ama atu in mihing theampo nungta hi,” ci in zo hi.

³⁹Thukham hil syate pawlkhat in, “Na zo kikna pha mama hi, Sya awng!” ci uh hi.

⁴⁰Banghang ziam cile amate in bangma a dongh ngam nawn bua uh hi.

⁴¹Jesus in, “Bangbangin Messiah sia David ii suan hi tu hi kici thei ziam?

⁴²Banghang ziam cile David ama mama in Psalm thubu sungah, “Topa in ka Topa ii tungah: Hi sung ka ziatsang ah hong to tan

⁴³na ngalte na peang nuai ah ka koi dong” ci hi.

⁴⁴“David in ‘Topa’ ci hi; tua ahile bangbangin Messiah sia David ii suan hi thei tu ziam,” ci hi.

⁴⁵Mihing theampo in ama thu a ngai laitakin, a nungzuite munah,

⁴⁶“Thukham hil syate panin kikeam tavun, amate puantual silh in, vak nuam a, vanhzuakna munah ngual ii zatak tu thangai hi; amate in synagogue te sungah a kikhaam kholsa tona ah to tha nuam uh a, anneak poaite ah mun phabelna ah to nuam hi.

⁴⁷Amate in meingongte zothaw uh a, a inn a lo suttol in, tuaciang, ngual ii pha a sak tu a deina in, a sau tatak thungen uh hi! Amate ii daan thuak tu sia nasia seseam tu hi!” ci hi.