Read Siyin Chin Luke 22 Bible Online

Luke 22 - Siyin Chin bible

Luke 22

¹Paisan poai a kici Tol saw ngawl Anluum Poai nai zo hi.

²Thiampi liante le Thukham hil syate in mipite kiita ahikom a thimtham in Jesus a suamlup thei natu lampi zon tu hanciam uh hi.

³Tuasia laitakin nungzuite sawm le nii sung pan khat ahi Iscariot kici Judas ii sungah Satan tum hi.

⁴Tua ahikom Judas pusuak a, Thiampi liante le Biakinn a cing Uliante munah Jesus a leeheak thei natu thute kikuppui hi.

⁵Amate lungdam a, sumpiak tu thukim hi.

⁶Amate a lungkim a, mipite heak ngawl laanin, Jesus amate khut sungah a aap thei natu hunpha zong tu in, kipan hi.

⁷Paisan Poai an tu in tuuno a kingaw ni, Tol saw ngawl Anluum Poai Ni hong theng hi.

⁸Jesus in Peter le John sia hi bangin kam vaitha a paisak hi: “Pai tavun a, Paisan Poai an ih neak tu in vawtkhol tavun,” ci hi.

⁹“Koi sungah vawtkhol le ung nong oai ziam,” ci in dongh uh hi.

¹⁰Ama in zo kik a, “Khuapi sungah na tum uh ciangin, tuibeal khat a pua pasal khat in hong muak tu hi. Ama tumna inn ah zui tavun,

¹¹tuaciang innteakpa munah ka nungzuite taw Paisan Poai an ka neak natu inn doituam sia koisung ziam ci in Syapa in hong donghsak hi,” ci tavun.

¹²Amate in anneak thei natu a kisamh theampo taw a vawtkhol sa inn doituam lian, inn tung dawl hong lak tu hi,” ci hi.

¹³Amate a pai uh ciangin, na theampo Jesus ii son bang tatak ma in a om mu a, Paisan Poai an tu vawtkhol uh hi.

¹⁴A hun hong cin ciangin Jesus in Sawltakte taw sabuai ah to hi.

¹⁵“Thalup ka thuak ma in, no taw hi Paisan Poai an neakkhop tu ka uuk mama hi!

¹⁶Banghang ziam cile a tatakin ka ci ciang, Pathian Ngam sungah, hi neakna dawnna ii khiakna a kikhuangkhim mateng in hi an ka ne nawn buatu hi,” ci hi.

¹⁷Tuaciang Jesus in hai la a, Pathian pokin hi bang ci hi. Hisia la vun a, no sungah hawm tavun.

¹⁸A maan tak kong ci ciangin Pathian Ngam hong thet mateng in hi sapittui ka dawn nawn buatu hi,” ci hi.

¹⁹Tua zawkciangin anluum bekno khat la a, Pathian pokin, a balneen zawkciang amate pia a, hi bangin ci hi. “Hisia no atu hong kipia ka pumpi ahi hi. Kei nong phawna in, hi bang na vawt vun,” ci hi.

²⁰Tuasia bangma nitak anneak zawkciang, amate hai pia a, hi bangin ci hi. “Hi hai sia Pathian thuciamna thak no atu a hong kibua ka chi taw, a kikipsak sia ahi hi.

²¹Ahizong en vun! Kei hong leeheak tu pa sia hi sabuai ah kei taw ankuang um khawm hi!

²²Pathian khensatna sa om bangin, Mihing Tapa sia thi tu hi, ahihang tuabang a ama a leeheak pa atu in, bangza in lauhuai ziam!” ci hi.

²³Tuaciangin amate sung teng ah tuabang a ngamta tu sia akua hi ziam ci in kidongh uh hi.

²⁴Nungzuite sungah thu kinialna khat piang a, amate sungah akua lianbel in kingaisun tu ziam, ci thu ahi hi.

²⁵Jesus in amate tungah “Doai biate ii kumpite in a mite tungah vaang nei a, ngamukte sia ‘Mihingte ii Lawmte hi’ kici hi.

²⁶Ahihang no sia tuabang na hi buatu uh hi; bangbang hi zaw tu nu ziam cile, a lianbel sia in a nobel bangin na om tu uh a, a lampui sia in naseam bangin na om tu uh hi.

²⁷An ne tu in a to pa lianzaw ziam maw ankuang a lui pa lianzaw ziam? A to pa lianzaw hi. Ahizong in note sungah kei sia ankuang a lui pa bangin kong om hi.

²⁸“Haksatna ka thuak lai theampo in, kei nong ompui uh hi;

²⁹ka Pa in ukna za hong piak bangma in no zong kong pia tu hi,

³⁰ka ngamsung ka sabuai ah no sia kei taw anne tuidawn khawm in, na om tu uh a, kumpi tokhum tungah to in, Israel minam sawm le niite na uk tu uh hi.

³¹“Simon, Simon awng! Ngai in! Lothopa ii zungtaang le taangphawte a khen bangma in, a phate le a siate hong khen natu in, Satan in no theampo hong ze et natu thu nga zo hi.

³²Ahihang, Simon awng, na upna a lal ngawl natu in, thu kong ngetsak hi. Tuaciang kei sangah nong kiheak kik ciangin na suapuite a tha khosak tu ni hi,” ci hi.

³³Peter in zo a, “Topa nang taw thongtaak khawm tu le, a thi khawm tu in, ka kinging zo hi,” ci hi.

³⁴Jesus in, “Peter awng, a maan takin kong ci ciangin, ama ka he ngei bua hi ci in thumvei nong nial mateng, tu zanin ak khuang ngawl tu hi,” ci hi.

³⁵Tua zawkciang Jesu in nungzuite munah, “Sumbawm, thung le peang dapte, ngawl taw kong paisak hunlai in, kitaangsapna na nei ngei uh ziam?” ci in dongh hi. “Bangma kitaangsap nei ngei bua ung,” ci hi.

³⁶“Ahizong tu in ahile, sumbawm ahibuale thungte a nei po in, keng tahen; namsau a nei ngawl peuma in a laktong puasilh zuak tahen a, lei tahen.

³⁷Banghang ziam cile a maan takin kong ci ciang, ‘Ama thukham paltan a, a mawte bangin, kithuaksak tu hi,’ ci a laithiangtho sungah kei ii thu a ki at teng taangtung tu hi,” ci hi.

³⁸Nungzuite in, “En in! Topa awng, hi sungah namsau nii om hi!” ci uh hi. Ama in zo kik a, “Tu za pha zo hi,” ci hi.

³⁹Jesus in khuapi nusia in, a tawntung a pai ngei bangma in, Olive Mual ah pai a, nungzuite zongh ama taw pai hi.

⁴⁰Tua mun a thet ciangin amate tungah hi bangin ci hi, “Ze etna sungah na puk ngawl natu in, thu ngen tavun.”

⁴¹Amate kung panin, muiden khat tan bang a khuala na ah pai lai a, khupdin in thungen hi.

⁴²“Pa awng, nang deina ahile hi thuakna hai sia kei kung pan hong laksak ta'n. Ahizong kei deina bang hi ngawlin, nang deina bang hi tahen,” ci hi.

⁴³Tuaciang vantung pan in, vantunglalang khat kilangh a, ama tha khosak hi.

⁴⁴Thinngimna lianpi taw nasia seseam in thungen hi; a khua ulsa chimal bangin lei ah taak hi.

⁴⁵A thungetna pan dingto a, a nungzuite kungah a pai ciangin, amate a khuangai lei hu in, ngimin mu uh hi.

⁴⁶Ama in, “Banghangin mu nu ziam? Ze etna sungah na puk ngawl natu in, tho vun a thungen vun,” amate munah ci hi.

⁴⁷Jesus in thu a son saan laitakin, nungzui sawm le niite sung pan khat ahi Judas lampui in mihonpi khat hong theng hi. Ama in Jesus namh tu in pai hi.

⁴⁸Ahihang Jesus in, “Judas awng, Mihing Tapa sia kinapna taw leeheak na hi ziam,” ci hi.

⁴⁹Jesus taw a omkhawm a nungzuite in bang teng hong piang tu ci in a mu uh ciang, “Topa awng, ka namsaute ka zangh tu uh ziam,” ci in dongh uh hi.

⁵⁰Amate sung pan khat in Thiampi Lianbelpa ii sila pa bil ziatsang satansak hi.

⁵¹Ahihang Jesus in, “Tu teng pha zo hi!” ci in a bil thamin damsak hi.

⁵²Jesus in thiampi liante Biakinn cing uliante le upate ama man tu in, hong paite tungah, “Mihing that taiku khat man tu bangin namsau le moltawng taw hong kuan nu ziam?

⁵³Biakinn sungah ni simin no taw kong om a, ahizong kuama in mat nong sawm bua uh hi. Ahihang tu laitak sia khuazing vaangletna ii uk hun laitak hi a, na dian tu uh hun ahi hi,” ci hi.

⁵⁴Amate in Jesus man a Thiampi Lianbelpa inn ah paipui hi; tuaciang a nungsang a khuala thithimna pan Peter in zui hi.

⁵⁵Leitual laizang ah meiphual khat kithut a, mei kiim ah a tote kawm ah Peter zongh to hi.

⁵⁶Tuabangin mei oai a om a mu ciangin, naseam numei khat in, a mai salh in en a, “Hisia pa zongh Jesus taw kithawl hi!” ci hi.

⁵⁷Ahihang Peter in nial a, “Numei awng, kei ama ka he ngei bua hi!” ci hi.

⁵⁸Tawmvei zawkciang pasal khat in Peter mu a, “Nang zongh amate sung pan khat na hi hi!” ci hi. Ahihang Peter in, “Pasal pa awng, hi ngawl khi hi!” ci in zo kik hi.

⁵⁹Nai khat bang zawkciangin, pasal dangkhat ma in, nasia takin ci hamtang a, “Hisia pa, Jesus taw a kithawl hunlam up laak om bo, banghang ziam cile ama zongh Galilee mi khat ahi hi!” ci hi.

⁶⁰Ahihang Peter in, “Pasal pa awng, na son sia hong heakpui ngawl khi hi!” ci in zo kik hi. Tuabang a papau laitakin thakhat thu in ak hong khuang hi.

⁶¹Topa hong ngeilee a, Peter a tangtan in en hi, tuaciang Peter in Topa ii ama tungah a sonsa sia phawk hi. “Tu zan ak khuan ma in, nang kong he bua hi, thum veina ci tu hi,” ci a, a sonsa sia phawk hi.

⁶²Peter pusuak in nasia takin kap hi.

⁶³Jesus a cing mite in ama selno in vel uh hi.

⁶⁴Amate in a mit tuamsak a, “Akua in hong saat ziam, son in!” ci in dongh uh hi.

⁶⁵Tuaciangin kamsia nawno taw a nanam in selno uh hi.

⁶⁶Khuavak ciangin, amate thiampi liante le thukham hil syate kisitua uh a, tuaciang Jesus sia Council te mai ah paipui uh hi.

⁶⁷“Nang, Messiah na hi ziam? hong son ta'n,” ci uh hi. Ama in zo a, “Hong son leng hong um ngawl tu nu hi;

⁶⁸tuaciang thu hong dongh leng hong zo ngawl tu nu hi.

⁶⁹Ahihang tu pan kipan Mihing Tapa sia Vaanglianbel Pathianziatsang ah hong to tu hi,” ci hi.

⁷⁰Amate theampo in, “Tua ahile nang sia Pathian Tapa na hi ziam?” ci hon uh hi. Ama in “Noma ci bang ka hi hi,” ci hi.

⁷¹Tuaciang amate in, “Tetti dang kul nawn bo! Ama kammalte ih zaak tek hi!” ci uh hi.