Read Siyin Chin Luke 6 Bible Online

Luke 6 - Siyin Chin bible

Luke 6

¹Sabbath ni khat, Jesus in zungtaang lote kaantan in pai hi. A nungzuite in zungtaang huite hiat uh a, a tangte ne uh hi.

²Pharisee pawlkhatte in, “Sabbath ni a, vawt thei ngawl tu hi ci in, Thukham ii a cite banghangin vawt nu ziam?” ci in dongh uh hi.

³“David le a ngalkapte a ngilkial uh ciangin, a ngamtatna uhte sim ngeingawl nu ziam?

⁴Ama in Pathian inn sungah tumin, Pathian a kipiasa anluum la in, ne a, a lawmte zongh pia hi, a tatakin ci leang tuate thiampite ngawl po ii neak thei natu ngeina om ngawl hi,” ci in Jesus in amate zo kik hi.

⁵Tuaciang Jesus in a thukhupna ah, “Mihing Tapa sia Sabbath ii Topa ahi hi,” ci hi.

⁶Sabbath nidang khat ah Jesus synagogue ah pai a, thuhil hi. A khut ziatsang a zaw pasal khat tua munah om hi.

⁷Thukham hil syate le Phariseete in Jesus tungah mawna zong nuamin, Sabbath ni in ciina a damsak ziam a damsak bua ziam, ci in a khial tu encik hi.

⁸Ahihang Jesus in amate thinsung he siat ahikom pasalpa tungah “Ding in a, hi sung mai sangah hong pai ta'n,” ci hi. Pasalpa tho a, dingto hi.

⁹Tuaciang Jesus in tua mite tungah, “Ih Thukham in Sabbath ni in bang teng sep tu hong oai ziam? ci in hong dongh khi hi. Ngual huzaw tu hi ziam maw? Ngual nasak zaw tu hi ziam? Mihing khat ii nuntakna huu zaw tu hi ziam maw susia zaw tu hi ziam?” ci in,

¹⁰a kiim a om theampo a et zawkciang; pasalpa tungah, “Na khut vaan in,” ci hi. Tuabangin ahiciang a khut dam kik hi.

¹¹Amate a thin uuk mama a, Jesus bang law thei tu hi ziam, ci in kikum uh hi.

¹²Tua hun laitakin Jesus, mual tungah kaato in, zankhuateak Pathian tungah thungen hi.

¹³Khuavak ciangin, a nungzuite ama kungah sam a, amate sung pan nungzui tu sawm le niite teal hi, tuate sawltakte kici hi:

¹⁴Simon (Peter ci in min vaw hi) le a suapuipa Andrew; James le John, Philip le Bartholomew,

¹⁵Matthew le Thomas, Alphaeus ii tapa James le Simon (minam it a kici pa),

¹⁶James ii tapa Judas le ama a leeheakpa, Judas Iscariot ahi uh hi.

¹⁷Mualtung pan sawltakte taw Jesus hong tuaksuk kik ciangin, zaanglei tam mun khat ah a nungzui mihing honkhat taw ding hi. Judea ngam bup pan le Jerusalem le tuipi hui khuapi Tyre le Sidon pan, hong kingawmtua mihon khat, tua munah om uh hi;

¹⁸amate in Jesus thuhilna ngai tu le a natna uh pan a damsak tu thangai in hong pai ahi uh hi. Thaa ngilote ii vawtsiat mihingte zongh hong pai a, dam uh hi.

¹⁹Mihing theampo in ama tham tu in, hanciam uh hi, banghang ziam cile ama tung panin, vaang hong pusuak a, amate damsak siat hi.

²⁰Jesus in a nungzuite en a, “No a zawngte in a lungdam te na hi uh hi. Pathian Ngam sia note aa ahi hi!

²¹“Tu laitak a ngilkialte in a lungdamte na hi uh hi; na ngil uh a va tu hi! “Tu laitak a kapte in a lungdamte na hi uh hi; na nui tu uh hi!

²²“Mihing Tapa hangin ngual in hong ensan a, hong nial in hong lang in, misiate awng hong cile, a lungdamte na hi uh hi!

²³Tuabangin thu hong pian ciangin lungdam vun a, lawpna taw na diang vun, banghang ziam cile no atu vantung ah thaman lian khat kikoisak hi. Banghang ziam cile amate ii taanghpupite zongh in kamsaangte tungah tuabang ma in, na ngamta uh hi.

²⁴“Ahizong tu laitak no a haute atu in bangza in lauhuai ziam; no sia a nuam a nungta sa hi zo nu hi!

²⁵Tu laitak no a ngilvate atu in bangza in lauhuai ziam; na ngil uh kial tu hi! “Tu laitak no a nuite atu bangza in lauhuai ziam; tau in na kap tu uh hi!

²⁶“Mihingte in hong phat son ciangin bangza in lauhuai ziam; amate taanghpupite zongh in leilot kamsaangte, tuabang ma in na son uh hi.

²⁷“Ahizong hong zate tungah kong ci hi: Na ngalte it vun, hong ensante tungah thupha vawt vun,

²⁸hong haamsiatte tungah thupha pia vun a, hong vawtsiate atu thungetsak vun.

²⁹Khat po in na biang lang hong beang le, a lang zongh na beang thuasak vun; khat po in na laktong puasilh a la le, na laktong zongh na pia thua vun.

³⁰Bang khat pawpo hong ngen a om le na pia vun, na neisa uh hong laaksak a om le, na ngen kik heak vun.

³¹Noma tungah hong kivawt le na oai uh bangin, ngual tungah na vawt vun.

³²“No hong itte bek na it uh le, banghangin thupha saang tu nu ziam? Mimawte zongh in amate a itte it hi!

³³Tuaciang in no tungah thupha hong vawtte tung bek ah thupha vawt le uhte, banghangin thupha khat saang tu nu ziam? Mimawte ngawngawn zongh in tuabang ma in ngamta hi!

³⁴Hong lo kik tu a na muanmawk uhte tung bek ah na pukthaak uh le, bangbangin thupha khat saang tu nu ziam? Kilo kik tu lam etna taw mimaw tetek zongh kipukthaak hi!

³⁵Tuabang hi ngawl hi! Na ngalte it vun, amate tungah thupha vawt vun; sum pukthaak tavun a lo kik tu na thangai heak vun. Tua hile no in thaman lian khat na nga tu uh a, a Saang Bel Pathian ii tate na suak tu uh hi, banghang ziam cile ama sia lungdamna a he thei ngawlte le mihing ngilote tungah thuthiam hi.

³⁶Na Pa uh sia hesuak thiampa ahi bangma in, no zongh ngual na hesuak tavun.

³⁷Ngual tungah thu na khen heak vun, tua hile Pathian in no tungah thu hong khen ngawl tu hi, ngual na mawsak heak vun, tua hile Pathian in hong mawsak ngawl tu hi; Ngual mawna na maisak vun, tua hile Pathian in note mawna hong maisak tu hi.

³⁸Ngual na piak uh bangin, Pathian in hong pia tu hi. Ngual na piakna uh taw kizui in a kihen ikek a kilok cinten, a teena khum a vuum a dimleet in Pathian in no tungah hong pia tu hi,” ci hi.

³⁹Tuaciang Jesus in hi thusonteena son hi: “Mittaw khat in mittaw dangkhat lam a pui thei buatu hi; tuabangin lampui le a nii in dum sungah taak khawm tu hi.

⁴⁰Sangpatangpa in a syapa sangin, lianzaw ngawl hi; sangpatang peuma a sin tu teng a man zawkciangin, a syapa bang hong hi pheang tu hi.

⁴¹“Banghangin na suapuipa mittang sung a ninteak sia mu thei in nangma mittang sungah thingluang sia thupi laak thei ngawl ni ziam?

⁴²Na suapuipa munah, ‘Suapui awng nong hesuakna in, na mittang sungah ninteak sia hong laakkeaksak tong,’ na ci hang, nangma mittang sung a thingluang sia zongh mu thei ngawl hi ngawl ni ziam? No a kihitheamsakte awng! A masa phit in noma mittang sung a thingluang sia lakeak phot vun, tuasia zawkciangin na suapuipa mittang sung pan ninteak sia na laak thei natu in, a thiang takin, na mu thei tu uh hi.

⁴³“Thingkung ciidam khat in thingnga pha ngawl a nga bua a, tuaciang thingkung pha ngawl khat in thingnga pha a nga bua hi.

⁴⁴Thingkung sim in a nga taw in a kung ii omzia kitel thei hi; Ngam lingkung tung panin theinga na lo bua uh a; lingkung tung panin sapitnga na lo bua uh hi.

⁴⁵Miphapa in, a thinsung ah a kholsa phatnate panin, thuphate pusua a; mihing pha ngawl pa in thusiate pusua hi. Banghang ziam cile thinsung ah a dimin a om bangin kam panin kison hi.

⁴⁶“Banghangin ‘Topa, Topa’ hong cici napi, kong son bang vawt ngawl nu ziam?

⁴⁷Mihing khat po in, kei kungah hong pai in, ka kammal hong ngai a, ka thu hong nite sia bang taw kibang ziam cisia kong lak tu hi.

⁴⁸Ama sia inn sapa khat khuamkua a thuk in to a, suangpi sia inn doppha in a nei pa taw kibang hi. Namthuam a, tua inn nawkngawp ahihang pha takin kisa ahikom a ngawk zo bua hi.

⁴⁹Ahizong ka thu hong ngai a, ka sawl bangin hong ni ngawlte sia inn doppha a nei ngawl inn sa pa taw kibang hi; namthuam in a nawk ciangin tua inn thakhat thu in puk a — bangzata in a lauhuai lalthapna ziam!” ci hi.