Read Siyin Chin Luke 8 Bible Online

Luke 8 - Siyin Chin bible

Luke 8

¹Tua zawk tawmvei zawkciang, Jesus sia khuapi le khuanote ah, khualhaw in Pathian Ngam huvau Lungdamna Thupha hil hi. Nungzui sawm le niite in zui a,

²tuabang ma in numei pawlkhat le amate sung panin, thaa ngilo veina le natna satna dang a damsakte, Mary (Magdalene a kici), ama ii sung pan doai sali a nawkeaksak nu;

³Herod ii zumsung ulian khat ahi Chuza ii zi Joanna; le Susanna le a dang numei tam mama, Jesus le a nungzuite hu natu in, amate neisun po a pia pawlkhat in kitholpui uh hi.

⁴Khua khat panin khua khat ah mihingte in Jesus kungah hong pai uh hi; mihon tam mama hong kikhop zawkciang, Jesus in hi thusonteena son hi.

⁵“Khatvei lai in, pasal khat in thaicii poai tu in kuan hi. Lo sungah thaicii a poai ciangin, thaicii pawlkhat lamzin tungah taak a, tua munah kisiikcip in vacimte in tawm khawng uh hi.

⁶Pawlkhat suang tamna munah tu a, a kung hong po tak ciang ngawtaakcip hi, banghang ziam cile, tua mun lei a nol bua hi.

⁷Thaicii pawlkhat lingkung sungah tu a, tua lingkung taw khangkhawm in, lingkung in deapcip uh hi.

⁸Tuaciang thaicii pawlkhat leiphana ah tu hi; a kung po a, a kung simin a zaa zakhat tek nga hi.” Tuaciang Jesus in a thuson khup a, “Bil nei po in hi thu za tavun!” ci hi.

⁹A nungzuite in Jesus tungah hi thusonteena ii khiakna dongh uh a,

¹⁰ama ii a zo kikna pan, “Pathian ngam thu thuthukte heakna no tungah hong kipia zo hi. Ahizong ngualdang a tu in, sonteena taw kipia hi, amate in en napi in a mu thei ngawl, ngai napi in a tel thei ngawl natu in kivawt hi.

¹¹“Thusonteena ii khiakna in hi bang ahi hi: thaicii sia Pathian kammal ahi hi.

¹²Lamzin tungah a tu thaiciite sia a thu a zate hi; ahihang Doaimangpa hong pai a, ngupna a nga ngawl natu le a up ngawl natu in, a thinsung uh pan tua Pathian thu sia laaksak hi.

¹³Suang tamna munah thaicii a tute sia Pathian thu lungdam takin za a, a saangte hi. Ahizong a thu in thuk bun ngawl hi; tawmvei hunsung teng um phot ahihang, ze etna hong pai ciangin, amate puk uh hi.

¹⁴Ling kawm ah thaicii a tute sia a thu za a, ahizong thinngimna, hau nopna le leitung nopsaknate in khunel a, amate min hun a nei bua hi.

¹⁵Leiphana ah a tu thaiciite sia a thu za a, thunitna thinsung pha taw keamcing a, a ngate a nga dong a zomto suakte ahi uh hi.

¹⁶“Kuama in meiinn vaakin kuang taw khup ahizong, tua ahibuale lupna nuai ah ahizong koi ngeingawl hi. Hong sungtangte ii mu thei tu in, meivakna khuam tungah vaak zaw uh hi.

¹⁷“A kiseal nate theampo a kilangh in kipusua tu a, a kikhupsin theampo kimu tu a, kipualaak siat tu hi.

¹⁸“Tua ahiciang na thu zaak uhte kidawm tavun; banghang ziam cile a neite tungah tamzaw kipia tu a, a nei ngawlte tung panin, nei a kisak tawmnote ngawngawn zongh kilaaksak tu hi,” ci hi.

¹⁹Jesus ii nu le a suapuipate ama kungah pai uh a, ahizong mipite hangin ama taw a kisi thei bua uh hi.

²⁰Jesus munah khat in, “Na nu le na suapuipate inn pua ah ding a, nang taw kimu nuam hi,” ci hi.

²¹Jesus in amate theampo munah “Ka nu le ka suapuipate sia Pathian thu za a, a zuite ahi hi,” ci hi.

²²Ni khat Jesus in a nungzuite taw ngunkuang sungah to uh a, “Tuili ngalkhat ah pai tawng,” ci hi. Tuabang ma in kipan uh hi.

²³Amate tuabangin tui tungah a pai laitak, Jesus mutthip hi. Thakhat thu in tuili tungah suangval hong vasuk a, ngunkuang sungah tuicing tu in kithoai ahikom, amate atu in lauhuai mama hi.

²⁴Nungzuite in Jesus kung pai in phong a, “Topa, Topa! Ei teng thi dektak zo hing!” ci uh hi. Jesus tho in vuipi le tuihualte thupia a, tuate thimin, dai dide hi.

²⁵Tua zawkciang nungzuite munah, “Na upna uh koisung om ziam,” ci hi. Ahihang amate in lamdang sa in lau uh a, khat le khat hi bangin kici uh hi. “Hisia pa akua ziam? Ama in vuipi suangval le tui kihualte tungah thu a piak ciangin tuate in, a thu ni uh hi!” ci uh hi.

²⁶Jesus le a nungzuite tui tungah paisuak uh hi. Galilee tuili ngal Gerasa ngamkhen theng uh hi.

²⁷Jesus vaalbo ah a kaa ciangin, tua khua mi doaivei khat in muak hi. Tuasia pa khuangeipi hun sung puansilh ngawlin om a, inn ah om nuam ngawlin thaan hawng sungah teang hi.

²⁸Ama in Jesus a mu ciangin nasia takin au a, a peang kungah kileiden in, “A saangbel Pathian Tapa Jesus awng! Kei bang hong law nuam ni ziam? Daan nong piak ngawl natu hong thum khi hi,” ci hi.

²⁹Hi bangin a ci thei sia banghang ziam cile, Jesus in thaa ngilo munah, ama sung pan a pusua natu thupia zo ahihang hi. Tamvei mama thaa ngilo in ama man a, ama thong sungah a khut le a peangte thikkol bulin a kikhum hang, a thikkolte saantat in, sennealngam sungah doai in not hi.

³⁰Jesus in, “Na min bang ziam,” ci in dongh hi. “Ka min sia ‘Mihonpi’ ahi hi,” [1] ci hi — banghang ziam cile ama sungah doai tam mama tum hi.

³¹Tua doaite in Jesus munah, a hawng thukpui sungah a puak ngawl natu in thum hi.

³²Tua taw a kinaina mualpangh ah, vok honkhat an zongin taa uh hi. Doaite in Jesus munah tua vokte sungah a tumsak natu in, ngen uh a, Jesus thukim hi.

³³Amate in pasalpa sung pan pusuak a, vokte sungah tum uh hi. Vok hon bup sia mualpangh liang pan kinuntaw suk a, tuili sungah tuitaa in thi siat hi.

³⁴Vokcingte in thupiang teng mu ahikom amate tai in, khuapi sung le lote ah a thu thangsak hi.

³⁵Mihingte in bang thupiang ziam ci in, en tu in Jesus kungah hong pai uh ciang, ama sung pan, doai a kinawkeaksak sia pa, puansilh sa in, thinciim takin, Jesus peang kungah to hi; tuasia ciangin amate lau siat uh hi.

³⁶Tua thupiangte a mute in ngualdangte munah tuasia pa sia bangbangin kidamsak ci thu son uh hi.

³⁷Tua ngam ah mihing theampo in, Jesus sia mundang a zot natu in, sawl uh hi, banghang ziam cile amate lau mama uh hi. Tua ahikom Jesus in ngunkuang tungah kaa in ding kik hi.

³⁸A sung pan doai a nawkeaksak pa in, “Hong zuisak ta'n,” ci in Jesus munah thuum hi. Ahihang Jesus in heak kiksak a,

³⁹“Na inn ah cia kik ta'n, Pathian ii nang tungah na hong sepnate son ta'n,” ci hi. Pasalpa zongh in, khua sung kaantan in pai a, Jesus ii ama tungah a nasep teng son hi.

⁴⁰Jesus sia tuili langkhat ah hong heak kik ciangin mite in muak uh hi, banghang ziam cile amate in ama ngak in om top zo uh hi.

⁴¹Tuasia ciangin Jairus kici mihing khat hong theng hi; ama sia tua munah a om synagogue ulian khat ahi hi. Ama in Jesus peang ah bok a, a inn ah a haw natu in thuum hi,

⁴²banghang ziam cile kum sawm le kum nii a pha khat bek a nei a tanu sia thi dektak hi. Jesus taw hong tonkhawm a, a kiimkot panin mihonpite in phultha tek uh hi.

⁴³Tuate sungah kum sawm le kum nii chibua top numei khat kihel hi; syavuan thapna in a nei a lamh theampo zangh siat zo hi, ahihang kuama in a damsak zo bua hi.

⁴⁴Ama in mihonpite sung, Jesus ii nungsang pan hong pai a, a puanmong tham hi. Thakhatin a chibua sia thai hi.

⁴⁵Jesus in, “Akua in hong tham nu ziam,” ci hi. Amate in nial tek uh hi. Peter in, “Mipite in na kiimkot panin hong neak tek hi,” ci hi.

⁴⁶Ahizong Jesus in, “Hong tham khat om hi, banghang ziam cile ka pum sung panin, vaangletna a pusua hunlam ka he hi,” ci hi.

⁴⁷Numeinu in ama kiphawk zo ci in a heak ciangin liing ngawpin pai a, Jesus peang ah bok hi. Tua munah a om mihing theampo ii muna ah ama ii puanmong a thamsakna thu le, thakhatin a kidamsakna thu son hi.

⁴⁸Jesus in ama tungah, “Ka tanu awng, na upna in hong damsak zo hi, Thin nuam takin, va pai ta'n,” ci hi.

⁴⁹Jesus in hi bang teng a pau laitakin, ulianpa inn pan kamtai khat hong pai a, Jairus munah, “Na tanu thi zo hi. Topa ngim pia nawn heak in,” ci hi.

⁵⁰Ahihang Jesus in tua thu za a, Jairus munah, “Thintoi heak in; um po in, ama dam tu hi,” ci hi.

⁵¹Tua inn a thet ciangin ama in Peter, John, James le numeino ii nu le pa simngawl a dang teng a sungtan tu a oai bua hi.

⁵²Tualai ah a om theampo in numeino hu in kap in mau in om uh hi. Jesus in, “Kap heak vun; numeino thi ngawl hi — a mu hi bek hi!” ci hi.

⁵³Amate in Jesus nuisan uh hi, banghang ziam cile numeino thi zo hi ci in he uh hi.

⁵⁴Ahihang Jesus in numeino ii khut pan kaito in, “Ka tano awng, tho in!” ci hi.

⁵⁵Numeino hong nungta kikin, thakhat thu ama hong tho to a, tuaciang Jesus in a neak tu bangkhat po a piak natu in a kiim a om mite sawl hi.

⁵⁶A pa le a nu in nasia takin lamdang sa uh hi, ahihang Jesus in thupiang teng kuama tung a son ngawl natu in khaam hi.