Read Siyin Chin Luke 9 Bible Online

Luke 9 - Siyin Chin bible

Luke 9

¹Jesus in a nungzui sawm le niite sam a doai naw natu le ciinate damsak natu in, vaangletna le thuneina pia hi.

²Tua zawkciang Pathian Ngam thuhil tu le ciinate damsak tu in amate paisak hi.

³Amate tungah hi bang teng ci masa hi, “Na khualhaw natu ah bangma keng heak vun; ciangkhut ahizong, sum ngetna ip ahizong, an ahizong, sum ahizong, puan laih natu ahizong, keng heak vun.

⁴Hong kisaang na inn pawpo ah tung vun a, tua khua na nusiat uh dong tua inn ah taam tavun;

⁵no hong kisaang ngawlna mun khuate peuma nusia vun a, a kidop thei natu in na peang leivuite na thin tavun,” ci hi.

⁶Nungzuite kuan in khuano theampo kaantan in pai a, Lungdamna Thupha hil in, mun theampo ah ciinate damsak hi.

⁷Galilee ngamukpa Herod in, thupiang theampo a zaak ciangin, a lungmang mama hi, banghang ziam cile mihing pawlkhat in, tuiphumpa John hong nungta kik hi ci uh hi.

⁸Pawlkhat in Elijah hong kilangh zo hi a ci om a, pawlkhat in taanghlai a kamsaang khat hong tho kik hi ci uh hi.

⁹Herod in, “John ii ngawng tansak zo khi hi; ama thu huvau ka zaak sia akuabel hi tu ziam?” ci hi. Tua zawkciangin ama in, Jesus a mu thethei natu in hanciam hi.

¹⁰Sawltakte hong cia kik uh a, amate sep sa theampo Jesus tungah ko uh hi. Ama in amate paipui in, Bethsaida a kici khuapi zuan uh hi.

¹¹Mihonte in tua thu a zaak uh ciangin, ama zui uh hi. Ama in tua mite pha takin saang a, Pathian Ngam thuhil in, a kisamh te damsak hi.

¹²Nitum kuan ciangin, nungzuite sawm le nii ama kungah hong pai a, “Mipite khuano sungah ahizong, lo sungah ahizong, an le ngiabuk zong tu in paisak in, banghang ziam cile hi lai mun sia a tongta mama mun khat ahi hi,” ci uh hi.

¹³Ahihang Jesus in, “Amate neak tu, bang khat pawpo noma mama in pia vun,” ci hi. Amate in “Ka nei theampo uh a kingawm anluum nga le ngasa nii hi bek hi. Hi mihon bup atu an lei tu in pai le ung hong oai ni ziam?” ci in zo kik hi.

¹⁴(Pasalte tulnga bang pha hi). Jesus in a nungzuite tungah, “Mihonpite pawl khat ciang sawmnga bang veu a pawl a pawlin tosak vun,” ci hi.

¹⁵A nungzuite in tua bangin a vawt zawk uh ciang,

¹⁶Jesus in anluum luum nga le ngasa tawn nii la in vantung en to a, Pathian tungah lungdam a ko zawkciang tuate balneen in, mipite sungah hawm tu in a nungzuite pia hi.

¹⁷Amate in ne hon a, a kham teak in a neak zawk uh ciang, a kham vaal nungzuite in khum 12 dim nga uh hi.

¹⁸Ni khat Jesus ama nguak thungenin a om laitak nungzuite ama kungah hong pai uh hi. “Mihonte in kei akua hi hong ci ziam,” ci in dongh hi.

¹⁹“Pawlkhat in Tuiphumpa John hi hong ci hi. A dangte in Elijah hi hong ci om a, aheap in taanghlai a kamsaangte khat hong nungta kik hi vak hong ci uh hi,” ci in zo hi.

²⁰“Note in kei akua hi nong ci uh ziam?” ci in dongh hi. Peter in zo a, “Nang sia Pathian ii Messiah ni hi,” ci hi.

²¹Tuaciang Jesus in hi thu kuama tungah a son ngawl natu in nasia tak thupia hi.

²²Ama in, “Mihing Tapa in nasia takin thuak tu a, upate, thiampi liante le thukham hil syate in nial tu hi. Ama kithatlum tu hi, ahihang ni thum zawkciangin nuntakna sungah kitho kiksak tu hi,” ci in son lai hi.

²³Tuaciangin amate theampo tungah hi bangin ci hi, “Kei nung hong zui nuam khat po in ama le ama kinial in a thinglamtee ni simin pua in hong zui tahen.

²⁴Banghang ziam cile a kuama po ama nuntakna a hu nuam sia in taan tu a, ahihang kei hangin a nuntakna a taan sia in a nuntakna a hu tu hi.

²⁵Mihing khat in leitung theampo a nga hangin ama nuntakna a sumh, ahibuale a taan le bang phatuamna om ziam? Phattuamna om ngawl het hi!

²⁶Mihing khat in kei le ka hilnate tungtaang ah a mai a zum le, Mihing Tapa in ama ii vaangletna, Pa vaangletna le vantunglalang thiangthote ii vaangletna taw hong pai ciangin tua mipa tungah a maizum tu hi.

²⁷A maan takin kong ci ciang, hi lai a om pawlkhatte in Pathian Ngam a mu phot ngawlin a thi buatu hi.”

²⁸Hi thute a son zawk nipi khat bang zawkciang, Jesus in Peter, John le James sam a, mual tungah thungen tu in paipui hi.

²⁹Ama thu a nget laitakin, a maitang pianzia hong kikheal a, a puansilhte kaangin tee ziazua hi.

³⁰Thakhat thu in mihing nii hong theng a, ama taw kipaupui hi. Amate sia Moses le Elijah hi a;

³¹amate in vantung vaangletna taw hong kilangh in, Jerusalem ah a thi natu Pathian tupna huvau a khuangkhim nai na thu Jesus taw kikum uh hi.

³²Peter le a kitholpuite mutthip in om uh a, ahizong a khanlaw ciangin Jesus ii vaangtaang le ama taw a ding khawmte nii mu uh hi.

³³Tua mihingte nii in Jesus a nusiat ciangin, Peter in, “Topa hi sungah ih om sia bangza in nuam ziam? Buk thum sa tawng, nang atu khat, Moses atu khat, Elijah atu khat sa tawng,” ci hi. (Ama in bang teng pau cisia a he tak bua hi).

³⁴Tuabang a pau laitakin, meeikaai khat hong piang a, a limh taw amate tuam hi. A meeikaai sia nungzuite tungah zaam ahikom amate lau uh hi.

³⁵Meeikaai sung panin aw khat nging a, “Hi in ka tealsa ka Tapa ahi hi — ama aw na ngai tavun!” ci hi.

³⁶Awnging sia a tawp ciangin, Jesus ama nguak om hi. Nungzuite in pau ngawlin, a mu nate tua hun laitak kuama munah a son bua uh hi.

³⁷A zing ciangin Jesus in a nungzuite thum taw mualtung panin tuaksuk a, mihon khat in Jesus muak uh hi.

³⁸Mihon kawm panin mihing khat au a, “Sya awng! kong thuum hi. Tapa khat bek ka nei sia — hong etsak ta'n.

³⁹Doaite khat in au khat sua in, ama man a, ama ii kam pan cilphuan tha in butthi kaikinsak a, tawlnga ngawlin vawtsia a, thasua nuam ngawl hi.

⁴⁰Na nungzuite munah hong nawkeaksak natu ka nget hangin, hong naw keaksak thei ngawl hi.”

⁴¹Jesus in zo kik a, “Bangzata upna nei ngawl a mikhialte hi nu ziam! No taw bang tanvei hong omkhawm zo tu a, bang tanvei hong dual zo tu khi ziam? Na tapa hi sungah hong paipui ta'n,” ci hi.

⁴²Patang sia hong paipui laitakin doai in lei denna in nei a, butthi in kaikinsak hi. Jesus in thaa ngilo tungah thupia a, patang sia damsakin, a pa tungah aap kik hi.

⁴³Mihing a om theampo in Pathian ii a lian mama a vaangletna lamdang sa uh hi. A vawt theampo mihingte in lamdang a sak laitakin, Jesus in nungzuite munah hi bangin ci hi.

⁴⁴“Kong son tu teng na ma ngil heak vun! Mihing Tapa sia mihingte ii vaangletna khut sungah ki aap tu hi,”

⁴⁵Ahizong a nungzuite in hi thu ii khiakna a tel bua uh hi. A tel zawk ngawl natu in kiphualseal a, tuaciang amate in, hi thu huvau dongh ngam ngawl uh hi.

⁴⁶Nungzuite sungah akua lianbel ziam ci thu kinialna piang hi.

⁴⁷Jesus in amate thinsung ah bang ngaisun ziam ci thu tel ahikom, patangno khat la in, ama kungah dingsak a, amate tungah hi bangin ci hi,

⁴⁸“Mihing khat pawpo in, hi patangno sia ka min taw a saang le keima hong saang ahi hi; tuaciang kei hong saang sia in kei hong sawlpa saang ahi hi. Banghang ziam cile, no sungah a nobel sia in, a lianbel ahi hi,” ci hi.

⁴⁹John hong pau a, “Topa awng, nangma min taw doaite notkeak khat ka mu a, a kheal natu ka tho uh hi, banghang ziam cile ama ei pawl ahi bua hi,”

⁵⁰Jesus in ama tung le a nungzui dangte tungah, “Ama na tho heak vun, banghang ziam cile no hong langpan ngawl peuma no sang hong pawl ahi hi,” ci hi.

⁵¹Jesus vantung ah a kilaak tu a nai ciangin, a thin hong khensat a, Jerusalem khua sang manaw in pai hi.

⁵²Ama mai ah kamtaite paikholsak a, Samaria khuano khat sungah tumin na theampo ama atu kinging kholsa a om natu in sawl hi.

⁵³Ahihang tua munah a mihingte in ama a saang bua uh hi, banghang ziam cile ama Jerusalem khua sang manaw in a pai ahi sia a kitel hang ahi hi.

⁵⁴Nungzuite James le John in hi thu a mu uh ciangin, “Topa awng, amate haltham tu in, vantung pan meikuang khat samsuk le ung nong oai ziam,” ci uh hi.

⁵⁵Jesus in kingeilee in teih hi.

⁵⁶Tua zawkciang Jesus le a nungzuite khuano dang khat ah pai uh hi.

⁵⁷Lampi ah a pai laitakin, mihing khat in Jesus tungah, “Na paina theampo ah kong zui tu hi,” ci hi.

⁵⁸Jesus in zo kik a, “Ngiate in kua nei uh a, vacimte in bu a nei uh hi, ahihang Mihing Tapa in a lusial natu mun zongh a nei bua hi,” ci hi.

⁵⁹Midang khat munah, “Hong zui ta'n,” ci hi. Ahihang tua pa in, “Topa awng, ka pa hong vuisak phot ta'n,” ci hi.

⁶⁰Jesus in, “Mithite in amate ii mithite vui tahen, nang na hile pai in, Pathian Ngam thu thangsak ta'n,” ci hi.

⁶¹Midang khat in, “Kong zui tu hi Topa awng, ahihang ka innkuanpuite taw kivaithakna vawt phot tong,” ci hi.

⁶²“Mihing khat lotho a kipan sia in, nungsang a lee et kikik le Pathian Ngam atu in, ama kimanna om ngawl hi,” Jesus in ci hi.