Read Siyin Chin Thuhil kikna 11 Bible Online

Thuhil kikna 11 - Siyin Chin bible

Thuhil kikna 11

¹“TOPA na Pathian it vun, a thukham theampo zui tawntung vun.

²TOPA tung pan na sin sate tungtawnin ama taw kisai na heak thute tuni in phawk vun. Tuabangin a hete sia na tate hi ngawlin, noma na hi uh hi. TOPA letna, a vaangletna, a thahatna,

³le nalamdang lakna a vawtte mu nu hi. Ama ii Egypt kumpipa tung le a ngamsung theampo ah a nasepna sa te mu nu hi.

⁴Egypt ngalkapte ii hong del lai in TOPA in Egypt ngalkaphonpi sia a siphute le a siphu ngalleangte taw San Tuipi sungah tuitaa in a bo siat sakna thu mu nu hi.

⁵Hi mun na thet uh ma in sennealngam sungah TOPA in note atu hong sepsaknate na he uh hi.

⁶Reuben nam Eliab ii tapate Dathan le Abiram tungah TOPA ii nasepna phawk kik vun. Mihing theampo ii mu in leitang kihong a ama sia a innkuan puite, a puanbukte le a naseamte le a ngannote theampo taw valhtum hi.

⁷Hi hi, TOPA ii nasep lian theampo a mute noma nu hi.

⁸“Tuni in kong piak thukham theampo zui vun. Tua hile na tum natu ngam sia ngun kaantan in lua thei tu nu hi.

⁹Tuaciang TOPA ii na taanghpupite tung le a suan a paalte tungah piak tu in a ciam ngampha le ngamnuam ah khansau in na nungta tu uh hi.

¹⁰Noma laak tu ngam sia nidang in na teenna uh Egypt ngam bang hi ngawl hi. Tualai ah thaicii na poai uh ciang lo sungah tui piak natu luam to in haksa takin na na seam uh hi;

¹¹ahizong na tum natu ngam sia mualte le leikuamte omna ngam hi a, nguatui nga na ngam ahi hi.

¹²TOPA na Pathian in hi ngam keamcing a, kum tawntungin cing hi.

¹³“Tua hi a, tuni in kong thupiakte zui vun; TOPA na Pathian sia na thin theampo taw it in, a na seam vun.

¹⁴Tuabang na hi uh le, TOPA in na ngam sungah a kisap ciangin tuuk ngua, khaal ngua hong zusak tu a, note atu in antang, sapittui le olive thaute,

¹⁵le na ngannote atu in lopa om tu hi. Na du an pawpo na nei tu uh hi.

¹⁶A dang pathiante biakna le a na sepna taw in TOPA kung pan noma le noma lam kipialsak heak vun.

¹⁷Tuabang na hi uh le no tungah TOPA thin uuk tu hi. Ama in nguatui hangsak tu a, leiko leih in an piang ngawl tu hi. Tuaciang TOPA in note hong piak ngam le lei sia pha napi tua munah na thi pal tu uh hi.

¹⁸“Hi kong thupiakte na thin le na lung sungah ciamtee vun. Na baan ah sawm tavun a, hong phawksak tu in na tal ah suang vun.

¹⁹Na tate tungah hil vun. Inn ah na om ciang ahizong na va ciang ahizong, na tawlngak ciang le na nasep ciang ahizong na tate sonpui vun.

²⁰Na innkha khuamte tung le na kongbiangte tungah at vun.

²¹Tuasia ciang TOPA na Pathian ii na taanghpupite tungah piak tu in a ciamsa ngam sungah noma le na tate, kum tam mama na nungta tu uh hi. Lei ii tungah van a om lai teng tua munah na teang tu uh hi.

²²“No kong piaksa thukham theampo thumaan takin zui vun: TOPA na Pathian it vun a, a thupiak theampo seamin, ama tungah thumaan vun.

²³Tuasia ciang, mainawt in na pai uh kawmin tua minamte theampo ama in notkeak tu a, note sangin a lianzaw le a hatzaw mite ii leitang na la tu uh hi.

²⁴Na sina lei theampo note neisa hi tu hi. Na ngam zaina uh sia thangsang sennealngam pan saksang Lebanon mual dong, nisuana sang Eupharates ngun dong, nitumna sang Mediterranean tuipi dong hi tu hi.

²⁵Tua ngamsung na paina po ah TOPA na Pathian ii hong kamciam bangin ama in, mihingte ii kiitak hong hisak tu uh a, kuama in note hong khaam zo buatu uh hi.

²⁶“Tuni in note na teal tu in thupha khat le haamsiatna khat kong pia hi —

²⁷Tuni in kong piak TOPA na Pathian thupiakte na zui uh le thupha khat hi a,

²⁸ahizong TOPA na Pathian thupiakte zui ngawlin na biak ngeingawl pathian dangte na bia uh le haamsiatna khat ahi hi.

²⁹Na laak tu uh ngam sungah TOPA in hong paipui ciang, Gerizim Mual pan thupha na thangsak tu uh a, Ebal Mual pan haamsiatna na thangsak tu uh hi.

³⁰(Hi mualte nii sia Jordan Kuam ah a teang Canaan mite ngamsung Jordan ngun ii nitumna sangah om hi. Tua mualte sia nitumna sangah om a, Gilgal khua nai Moreh thingkung thiangthote taw kikhuala ngawl hi.)

³¹TOPA na Pathian ii hong piakna ngam a lua tu in Jordan ngun na kaantan tu uh hi. Tua ngam la in na teen uh ciang,

³²tuni in kong piak thukhamte theampo pha takin zui vun.