Read Siyin Chin Thuhil kikna 15 Bible Online

Thuhil kikna 15 - Siyin Chin bible

Thuhil kikna 15

¹“Kum sali a cin simin note tungah sum hong kiba theampo maisak tu nu hi.

²Hi bangin vawt tu ahi hi. Israel a mipui khat pawpo tungah sum a puk sia in a sumpuk teng maisak tu hi; leiba siik nawn ngawl tu hi; banghang ziam cile TOPA in tua leiba kimaisak zo hi, ci in thangsak zo hi.

³Ngamdangmite ii hong batte na siik thei tu uh a, ahizong na mipuite ii hong batte siik ngawl het tu nu hi.

⁴“TOPA na Pathian ii hong piakna ngam ah ama in thupha hong pia tu hi. Tuni in kong thupiakte theampo pha takin zui in, ama thu na ni uh le,

⁵no mipite sung pan khat zongh zawngkhal ngawl tu hi.

⁶Hong kamciamsa bangin TOPA in nang thupha hong pia tu hi. Minam tam mama te tungah sum na pukthaak tu uh a, ahizong kuama tung pan sum na pu buatu hi. Minam tam mama na uk tu uh a, ahizong kuama in no hong uk buatu hi.

⁷“TOPA na Pathian ii hong piakna ngamsung khua khat pawpo ah kisapna a nei Israel na mipui khat po a om le, haza heak vun a, na hu thada heak vun.

⁸Tua sangin a taangsap za ngo takin sum puk vun.

⁹Leiba maisak kum nai ahitazong sumpuk nuam ngawlin om heak vun. Tuabang khua ngaisutna siate na thinsung uh ah tumsak heak vun. Sum na puk nuam bua uh le amate in note hong langpanin TOPA tungah ko tu a, tuaciang no a maw na suak tu uh hi.

¹⁰Ama tungah haza ngawlin deisakna taw pia vun, tua hile na nasepna theampo ah TOPA in thupha hong pia tu hi.

¹¹Israel te sungah a zawng le a cimaw pawlkhat om tawntung tu ahiciang, tuate tungah ngo takin na piak natu uh in thu kong pia hi.

¹²“Na mipui Israel te, pa ahibuale numei khat sia sila in na tungah ama le ama hong kizuak le, kum luk sung na hong sepsak zawkciang na tha tu hi. A kum sali ciang ama na suaktasak nanak tu hi.

¹³Na inn pan na suataksak ciang khut hawm nguakin pusuaksak heak in.

¹⁴TOPA ii thupha hong piakte sung pan — tuute, antangte, le sapittui te ngo takin ama tungah pia in.

¹⁵Noma Egypt ngam ah sal na tanna uh le TOPA na Pathian ii hong suataksakna thu phawk vun; tua ahi hu in hi thupiakna tu in kong pia hi.

¹⁶“Ahizong na silapa in hong nusia nuam ngawl tha tu hi; nangma le na innkuanpuite it in hong om suak nuam tha tu hi.

¹⁷Tuasia ciang, na innkha ah paipui in a, tua munah a bil vut in; tuaciang a nuntak sung tawntung na sila hi tu hi. Na sila numeite zongh tuabang ma in vawt vun.

¹⁸Na sila khat na suataksak ciang na thinnasak heak vun; a tatakin ci leang a kicial naseam khat ii thaman lang taw ama in kum luk sung na hong sepsak zo hi. Hi bangin vawt vun, tua hile, TOPA na Pathian in na nasepna theampo ah thupha hong pia tu hi.

¹⁹“TOPA na Pathian atu in na khui le na tuu sung pan a tal a suakciilte theampo tuam koi vun; hi khuite khat zongh naseam in zangh heak vun a, tuute khat zongh a mul meet heak vun.

²⁰Kum simin TOPA ompuina ahi tua biakna mun khat sia ah nangma le na innkuanpuite in tuate ne tu nu hi.

²¹Ahizong tua ngannote sitbaanna khat pawpo, a peangbai, a mittaw, mealhemna a nasia khat pawpo a nei le tuate TOPA na Pathian tungah sangaw biakpiakna in zangh ngawl het tu nu hi.

²²Tuabang ngannote na inn ah ne thei tu nu hi. Note theampo biakna taw kisai in na thiang uh zong na thiang bua uh zongin sangaisa le sathaksa na neak uh bangin tuate ne tu nu hi.

²³Ahizong a chi ne heak vun; tui sun bangin lei ah sung zaw vun.