Read Siyin Chin Thuhil kikna 17 Bible Online

Thuhil kikna 17 - Siyin Chin bible

Thuhil kikna 17

¹“TOPA na Pathian sia mealhemna khat pawpo a nei khui ahibuale tuu taw bia heak vun; TOPA in tuasia ngaimaw hi.

²“Sonteena in na khuate uh khat sungah pa ahibuale numei khat sia pathian dangte ahibuale ni, tha, aksite a biakna taw

³TOPA tungah maw in a thuciamna palsat in, TOPA thupiak a langpan ahi hi,

⁴tuabang thu na za uh le, pha takin kantel vun. Hi bang thusiate Israel te sungah a piang takpi le,

⁵tua pa khua pua sangah paipui in suang taw deanglum vun.

⁶Ahizong tetti nii ahibuale a tamzaw in ama khial hi ci in tetti a pang le bekma tua pa kithatlum thei tu a; tetti khat bek a om le ama kithatlum ngawl tu hi.

⁷Tetti te in ama suang taw deang masa tu a, tuaciang a taang lai mite in deang tu hi; hi siatnate hi bangin bosak tu nu hi.

⁸“Khua sung thukhente atu in khensat haksa ahi, neisa kituuna, pumpi kiliamsuana, mihing thalupna le mihing thisakna a khentel tu thute hong om tu hi. Hi bang thute a om ciang TOPA na Pathian ii tealsa biakna mun khat sia ah pai in,

⁹tua thu sia Levi mi thiampite le tua laitak a seam thukhenmangte mai ah puak vun a, amate in khensatsak vun.

¹⁰Amate in thu khensatna nei tu a, amate hong son bang linlian in noma seam tu nu hi.

¹¹A thu khensatna saang vun a, a son bangin a khawng a kheakin zui vun.

¹²Vaipuak nei thukhenpa ahibuale thiampipa thu ni ngawlin a ta ngam pawpo sia kithatlum tu hi; tuabangin Israel te sung pan hi bang thusiate nilkeak tu nu hi.

¹³Tuasia ciang hi thu a za theampo lau tu uh a, kuama dang tuabangin ngamta ngam nawn ngawl tu uh hi.

¹⁴“TOPA na Pathian ii hong piak tu ngam la in, na teen zawk uh ciang na kiim na paam a om minamte theampo bangma in kumpi khat kisamh sa in nei tu na khensat tu uh hi.

¹⁵Kumpi tu in na teal uh sia TOPA ii a tealsa mi hi hamtang sak vun. Ama sia na mipui khat hi nak tu a; ngamdangmi khat, na kumpi in koi heak vun.

¹⁶Kumpipa in ama ngalkaphonpi atu in siphu tampi nei thei ngawl tu hi, siphu lei tu in Egypt ah mite sawl ngawl tu hi, banghang ziam cile TOPA in a mite tualai ah heak kik ngeingawl tu hi, ci in a sonsa hi.

¹⁷Kumpipa in zi tam nei ngawl tu hi, banghang ziam cile hisia in ama TOPA kung pan lampialsak tu hi; tuaciang ama le ama khamh le ngunn taw hau heak hen.

¹⁸Kumpi a sua ciang ama in Levi mi thiampite ii kep thubu ciil sia pan la in a kikhum kik Pathian thukhamte le hilciannate a ki at thubu khat nei tu hi.

¹⁹Tua laibu sungah thupiak theampo thumaan takin a zui natu le TOPA zatakna zia a heak thei natu in, ama kungah tua thubu koi in a khan tawntungin sim tu hi.

²⁰Tuabang a hina taw a Israel mipuite sangin ama phazaw tuan kisa ngawlin TOPA thupiakna te a zui ngawl natu khaamsak tu hi. Tuasia ciang ama kum tampi mang tu a, a suan a paalte in Israel ngam, khang tam mama uk tu uh hi.