Read Siyin Chin Thuhil kikna 19 Bible Online

Thuhil kikna 19 - Siyin Chin bible

Thuhil kikna 19

¹“TOPA na Pathian ii hong piak tu ngam sungah a teang mihingte TOPA na Pathian in a mot siat zawkciang le a khuapite le a innte la in, tua munah na teen zawk uh ciang,

²tua ngam sia khen thum in khen vun a, a khen simin ol takin a kihaw thei khuapi khat tek nei tu hi. Tuasia hun ciang mihing khat in ngual khat po a thalup ciang, a buk natu in tua khuapite khat pawpo zuan thei tu hi.

⁴Mihing khat in a ngal ahi ngawl khat a thatlum tha ahile, tua khuapite khat pawpo zuanin suakta tu hi.

⁵Sonteena in, mihing nii duisung ah thingtom tu in kuankhawm a, khat pa ii thing a siik laitak a heitang zuukin a lawmpa sia a khalum tha le ama tua khuapi thumte khat sungah tai in suakta tu hi.

⁶Bukna khuapi khat bek om thong hile a tai natu khuala leih tu ahiciang, a phulam nuam a mealheak pa in mawnei ngawl a innpaam pa pha tu a, thin uuk tutna in thatlum tha tu hi. Tua hi a, ama in a ngal pa ahi ngawl mihing khat thatlum tha ahi hi.

⁷Tua ahikom bukna khuapi thum koi tu in thu kong pia hi.

⁸“TOPA na Pathian in na taanghpupite tung a sonsa bangin na ngam uh keak vaial in, ama kamciamsa ngam theampo no hong piak ciangin,

⁹khuapi thum na teal thua tu uh hi. (Tuni in kong thupiak theampo vawt a, TOPA na Pathian it in, hong hil bangin na nungta uh le ama in hi ngam note hong pia tu hi.)

¹⁰A maw ngawlte in thina a thuak ngawl natu le, TOPA ii hong piak tu ngam sungah a thi uh hu in mawsiatna a thuak ngawl natu in hi bangin seam vun.

¹¹“Ahizong sonteena in, mihing khat in a ngal pa thatlum lui a, tua zawkciang a suakta tu in khuapi thumte khat zuan hi.

¹²Tuabang thu a om ciangin ama khua lampuite in tua pa a kithalup thei natu in, ama samsak tu a, a thalup pa ii mealheakte tungah phulam in a thalup tu in aap tu hi.

¹³Ama hesuak heak vun. Israel te sung pan mihing that pa bosak vun, tua hile na ma uh vang tu hi.

¹⁴“TOPA na Pathian ii hong piak tu ngam sungah nidang lai pekin a kiphut, na innpaam na lopaam te ii ngisuang khiin heak vun.

¹⁵“Khialna lian a vawt khat mawsak natu in tetti khat bek taw kicing ngawl a; mihing khat maw piak natu sia a tawmbel in tetti nii kisamh hi.

¹⁶Mihing khat in midang khat a natsak nopna hangin thumaan ngawl taw maw a suan le,

¹⁷a nii in biakna mun khat sia ah pai tu a, tua laitak vaipuak nei thiampite le thukhente in a thu khensak tu uh hi.

¹⁸Thukhente in tua thu a pha takin kantel tu a; a Israel mipuipa sia thumaan ngawl taw a mawsak thawthong ahile,

¹⁹mawsiat a thuak pa ii a thuak tu daan sia ama in thuak tu hi. Tuabangin thumaan ngawl ngitlona bosak tu nu hi.

²⁰Tuasia ciang a kuama po in tua thupiang za tu a, lau in, kuama in tuabang a sia vawt kik ngeingawl tu hi.

²¹Hi bang thute ah hesuakna lak heak vun a; daan piak natu sia nuntakna khat luangin nuntakna khat, mittang khat luangin mittang khat, hatang khat luangin hatang khat, khut khat luangin khut khat, peang khat luangin peang khat hi tu hi.