Read Siyin Chin Thuhil kikna 2 Bible Online

Thuhil kikna 2 - Siyin Chin bible

Thuhil kikna 2

¹a khakbel ciang, TOPA thupiak bangin heak kikin Aqaba Tuipidok sang lampi tawnin sennealngam ah ih pai a, Edom mual tung ngam ah ngei hialma ih vakthap hi.

²“Tuasia ciang TOPA in kei tungah

³tua mual teng ah khuangei ma vak zo ih hi ciang, saksang ah paito in, hong sawl hi.

⁴Ama in a nuai a hilnate note tungah son tu in keima hong sawl a: ‘Na bee dawnte ma ahi Esau ii suan le paalte ngam, Edom mualtung ngam kaantan in na pai tu uh hi. Amate in no hong kiita tu uh a,

⁵ahizong amate sim tu in kipan heak vun, banghang ziam cile a ngam metre khat zongh kong pia buatu hi. Edom ngam sia Esau ii suan le paalte ka piaksa ahi hi.

⁶Amate tung pan an le tui lei thei tu nu hi,’ hong ci hi.

⁷“TOPA na Pathian in na sepna theampo ah thupha hong pia a hina thu phawk tavun. Hi zata a zai sennealngam kaantan in na vakkot sung uh theampo ama in hong keam hi. Ama in hi kum sawmli sung tawntung note hong ompui a, na kisap theampo na nga zo uh hi.

⁸“Tua zawkciang Elath le Eziongeber khuate pan Tuipi Thi sang paina lampi pan lampial in nisuana saksang Moab ngam sang ih zuan hi.

⁹TOPA in kei tungah, ‘Lot ii suan le paalte ahi Moab mite ngim pia heak vun a, ngal phuangin langpan heak vun. Amate tungah Ar khuapi ka pia zo a, a ngam bangma note kong pia buatu hi,’ hong ci hi,” ci hi. (

¹⁰Ar khuapi ah Emim a kici mihing thahat thatang lian nam khat teang ngei hi. Amate sia a tha lian nam dang ahi Anakim te bangin a tun uh saang hi.

¹¹Anakim te bangma in amate sia Rephaim zongh kici a; ahizong Moab te in amate Emim ci uh hi.

¹²Edom ngam sungah Hor te teang ngei ahihang Esau suan le paalte in amate notkeak in a minam lalcipsak a, tua munah amate teang uh hi. Israel te in TOPA ii a piakna ngam pan a ngalte nungsang ciang a nawkeak bangma ahi hi.)

¹³“Tuaciang TOPA ii eite hong sawl bangin Zered Ngun ih kaantan hi.

¹⁴Hisia hunin Kadesh Barnea ih nusiat zawk kum sawmthum le kum liat pha hi. TOPA in thi siat tu hi a ci bangma in tua khang sungah ngalsim thei pasal theampo thi siat zo hi.

¹⁵Amate a mot siat mateng TOPA in langpan top hi.

¹⁶“Amate a thi siat zawkciang,

¹⁷TOPA in eite tungah,

¹⁸‘Tuni in Ar lampi tawnin Moab ngam kaantan vun.

¹⁹Tuasia ciang note in Lot ii suan le paalte ahi Ammon te ii ngam nai na theng tu uh hi. Amate ngim pia heak vun, amate tungah ngal zongh phuang heak vun, banghang ziam cile amate ka piaksa ngam bangma note kong pia buatu hi’ hong ci hi,” ci hi. (

²⁰Hi ngam sia tualai ah a teang ngei mite ii min vaw in Rephaim ngam zongh kici hi; Ammon te in Zamzummim ci uh hi.

²¹Amate sia Anakim te bangin a tun saang hi. Amate tam mama a, a thahat nam ahi hi. Ahizong TOPA in amate mon siat a, tua hu in Ammon te in a ngam la in teang uh hi.

²²Tuabang ma in Edom mualtung ngam ah a teang Esau suan le paal ahi Edom te tungah TOPA in vawt hi. Ama in Hor te mon a Edom te in a ngam la in tualai ah tuni dongin teang lai uh hi.

²³Crete tuikulh mite Mediterranean tuipivaal tengah teang uh hi. Amate in a teang ciil Avvim te mon in thangsang Gaza khuapi dongin a ngam theampo laaksak hi.)

²⁴“Moab ngam ih kaantan zawkciang TOPA in eite tungah, ‘Tu pan kipan Arnon Ngun kaantan vun. Amor mi Heshbon Kumpipa Sihon sia a ngam taw kopin na khut sungah kong pia khawm hi. Ama simin, a ngam lua tu kipan vun.

²⁵Tuni a kipan mun theampo ah mihingte in note hong kiita tu in ka vawt tu hi. Na min uh a kilaw ciang mihing theampo lau in liing tu uh hi,’ hong ci hi.

²⁶“Tua zawkciang Kedemoth sennealngam pan Heshbon Kumpipa Sihon tungah a nuai a kilemna thu puakin kamtaite ka paisak hi.

²⁷‘Na ngamsung hong kaantansak ta'n. Ka tot uh lampi pan lampial ngawlin paisuak tu khu hi.

²⁸Ka neak tu uh an le tuite a man kong pia tu uh hi. Ka uuk uh sia noma ngam kaantan a,

²⁹TOPA kote Pathian ii hong piak natu ngam ah a tum tu in Jordan Ngun ka kaantan uh dong na ngamsung hong tawn nuam ka hi bek uh hi. Edom ah a teang Esau suan le paalte le Ar ah a teang Moab te in a ngam uh hong kaantansak hi, ka cisak hi.’

³⁰“Ahizong Kumpipa Sihon in a ngam a kaantan tu uh oai ngawl hi. Ama zo zo a, tu laitak ih omna, ama ngam sia ih laak thei natu in TOPA na Pathian in ama a thin sahsakin ngal thin neisak hi.

³¹“Tuasia ciang TOPA in kei tungah, ‘En in, Kumpipa Sihon le a ngam sia na mai ah ka cimawsak zo hi; a ngam la in lua in’ hong ci hi.

³²Sihon sia a mi teng theampo taw Jahaz khua hui ah eite sim tu in hong pai hi,

³³ahizong TOPA ih Pathian in ama sia eite khut sungah hong koi a, a tapate le a mi theampo ih that siat hi.

³⁴Tua hun laitak ma in khua theampo la in ih lalcipsak a, pasal, numei, patang ih thatlum siat hi. Khat zongh ih khoaikhe bua hi.

³⁵A nganno teng le a khua teng ih laaksak hi.

³⁶TOPA ih Pathian in Arnon kuam mong ah a om Aroer khua pan kipan khua theampo le tua kuam laizang ah a om khuapi, Gilead dong hong zosak hi. A khua uumna luphungte in ei hong nang zo ngawl hi.

³⁷Ahihang TOPA ih Pathian ii pai ngawl a hong sawlna Ammon ngam nai teng, Jabbok Ngunhui teng, mualtung khuate le mun dang khat pawpo ah ih pai bua hi.