Read Siyin Chin Thuhil kikna 20 Bible Online

Thuhil kikna 20 - Siyin Chin bible

Thuhil kikna 20

¹“Na ngalte sim tu in na kuan uh ciang, ngalleangte, siphute le ngalkaphonpi khat sia note neiza sangin a tamzaw in na mu uh ciang tuate kiita heak vun. Egypt pan hong suatak TOPA na Pathian sia note taw hong omkhawm tu hi.

²Ngalsim tu na kipat ma in, thiampi khat sia mai sangah hong pai tu a, ngalkaphonpi tungah,

³‘Israel mite awng ngai vun! Tuni in ngal simin na kuan tu uh hi. Na ngalte kiita heak vun a, lau in liing heak vun.

⁴TOPA na Pathian in note hong tonpui tu a, zawna hong pia tu hi,’ ci tu hi.

⁵“Tuasia ciang ngalkap bute in a mite tungah, ‘Hi sungah inn thak a sak zawk bek hi a, aapna a vawt ngawl lai khat pawpo a om ziam? A om le a inn ah cia kik tahen. Tua hi ngawlin ngal sungah ama a kithat le a inn sia mi dang khat pawpo in aapna vawt tu hi.

⁶Hi sungah sapithuan thak a vawt zawk bek hi a, ahizong sapitnga a lo ngawl lai khat pawpo a om ziam? A om le a inn ah cia kik tahen. Tua hi ngawlin ngal sungah ama a kithat le mi dang khat pawpo in tua sapittui taw nuamsa tu hi.

⁷Hi sungah zi nei tu in mo dongh sa khat pawpo a om ziam? A om le a inn ah cia kik tahen. Tua hi ngawlin ngal sungah ama a kithatlum le midang khat pawpo in a dok sa numei sia teenpui tu hi,’ ci tu hi.

⁸“Tuaciang ngalkap bute in a mite tungah, ‘Hi sungah patau in a lauthauh khat pawpo a om ziam? A om le, a inn ah cia kik tahen. Tua ahi buale ama in a dangte thin lalsak tu hi,’ ci si tu hi.

⁹Ngalkap bute in ngalkaphonpi tungah a thuson a man zawkciang a pawl sim atu in lampuite kiteal tu hi.

¹⁰“Khuapi khat sim tu in a pai uh ciang a masa phit belin tua khua mite na khutnuai ah hong tum thei natu in hun pia vun.

¹¹Amate in kongpite hong honin hong ki aap ahile, a vekpi in na sila suak tu a, na na hong sepsak tu hi.

¹²Ahizong tua khua mite hong ki aap nuam ngawlin do tu hong sawm zaw le tua khuapi na ngalkaphonpite taw uumci vun.

¹³TOPA na Pathian in tua khuapi zawna hong piak ciang a sung a om pa theampo thatlum siat vun.

¹⁴Ahizong noma atu in numeite, patangte, ngannote, le khua sung a om nadang theampo la thei tu nu hi. Na ngalte neisa theampo zangh thei tu nu hi. TOPA in note tungah hong pia zo hi.

¹⁵Note teen natu ngam pan a khualana khuapite tungah tu a bangin vawt tu nu hi.

¹⁶“Ahizong TOPA na Pathian ii hong piak ngam sungah a om khuapite na laak uh ciang, mihing theampo thatlum siat vun.

¹⁷TOPA ii hong thupiakna bangin a mihing theampo, Hit te, Amor te, Canaan te, Periz te, Hiv te le Jebus te mon vun.

¹⁸A pathiante a biak ciang a kiihuai nate sep tu hong hil na taw, TOPA tungah a maw na sua ngawl natu in amate thatlum siat vun.

¹⁹“Khuapi khat na laak nop uh ciang khuangei mama sung na kiim uum ta uh zong a thingnga kungte phuktan heak vun. A thingnga ne vun a, ahihang a kungte lalsak heak vun; a kungte sia na ngalte uh hi ngawl hi.

²⁰Thingkung dangte na phuk thei tu uh a, khuapi a kilaak mateng in kulh uumna in zangh thei tu nu hi.