Read Siyin Chin Thuhil kikna 21 Bible Online

Thuhil kikna 21 - Siyin Chin bible

Thuhil kikna 21

¹“Sonteena in, TOPA na Pathian ii hong piak natu ngamsung lo khat ah mihing khat kithatlum a, a that sia he ngawl nu hi.

²Na lampuite le thukhente pai in mithi luang a kimu na mun pan a naina khua teng khat sim taw a kikhualatna tee tu hi.

³Tuaciang mithi luang a kimu na pan a naibel khua sia ii lampuite in na a kiseamsak ngeingawl lai khuila khat teal tu hi.

⁴Amate in tua khui sia tui a kang ngeingawl luihui, a kitho ngeingawl, an a kiciing ngeingawlna munah paipui tu a, tua munah a ngawng meaktan tu uh hi.

⁵Levi suan thiampite zongh tua munah pai tu hi, banghang ziam cile ngongtatna huvau thuneina theampo amate in thukhen tu uh hi. TOPA na Pathian in ama naseam tu le ama min suangin thuphate a pia tu in amate teal zo hi.

⁶Tua zawkciang a mithi luang a kimuna mun taw a kinaibel khua lampuite theampo in khuila tungah a khut sil tu uh a,

⁷tuaciang, ‘Hisia pa ka that bua uh a, a that sia ka he bua uh hi.

⁸TOPA awng, Egypt pan na suatak Israel, na mite maisak in. A maw ngawl mihing khat a kithalupna hangin maw hong pusak heak in a, hong maisak ta'n,’ ci tu uh hi.

⁹Tuasia ciang, TOPA ci bangin na vawtna uh taw mihing thalupna huvau hong kimawsak ngawl tu hi.

¹⁰“TOPA na Pathian in ngalzawna hong pia in ngalte na mat uh ciang,

¹¹amate sungah dik na sak le na teenpui nop numei mealpha khat mu thei tu ni hi.

¹²Tua nu na inn ah ciapui ta'n a, ama in na inn ah a sam meetin a khutcinte tan tu a,

¹³a puante laih tu hi. Tua nu sia na inn sungah a nu le a pa ngai in tha khat sung hee in om tu hi; tua zawkciang teenpui tu ni hi.

¹⁴Hun khat ciang ama na dei nawn buale ama suaktasak tu ni hi. Zawthawk thu taw ama ompui zo na hi ciang sal bangin na vawt thei buatu a, na zuak thei buatu hi.

¹⁵“Sonteena in pa khat in zi nii nei a, a zite in tapa veve neipui hi, ahizong a tapaciil sia dik a sak zawk a zi taw a ta hi ngawl hi.

¹⁶Tua pa in a tate tungah a neisate hawmsak tu a khensat ciang hamphat tuam nei heak hen, a tapaciil ii nga tu tel sia ama diksak zawk a zi taw a nei tapa tungah pia heak hen.

¹⁷Ama ii diksak zawk a zi ii tapa hi ngawl ahihang a tapaciil tungah ama ii neisa sung pan tel a see nii in pia tu hi. Pasal khat in a tapaciil sia a thusim kul a, tapaciil ahi hu in a nga tu tel sia a piak kul hi.

¹⁸“Sonteena in mihing khat in a thinpui, ngual a langpan vilvel tapa khat nei in, daan a piak hang a nu a pa thu ni ngawl hi.

¹⁹A nu le a pa in a tapa sia a teenna khua lampuite mai ah thusit thuak tu in paipui tu hi.

²⁰Amate in lampuite tungah, ‘Ka ta uh sia thinpui in hong langpan a, thu ni nuam ngawl hi; ama in dangka pakvawt in zu ne hi,’ ci in son tu hi.

²¹Tuasia ciang khua mite in tua pa suang taw deanglum tu a, tuabangin hi siatna bosak tu nu hi. Israel ngam sungah mihingte theampo in tua thupiang za in lau tu uh hi.

²²“Mihing khat ama ii khialna hangin kithat in a luang sia khuam tungah a kikhai le,

²³tualai ah zan ngiaksak heak vun. Tua a luang sia tua ni ma in kiphum tu hi, banghang ziam cile khuam tungah a kikhai mithi luang khat in tua leitang tungah Pathian haamsiatna tungsak hi. TOPA na Pathian ii hong piak ngam le lei na nitsak ngawl natu in a luang phum vun.