Read Siyin Chin Thuhil kikna 23 Bible Online

Thuhil kikna 23 - Siyin Chin bible

Thuhil kikna 23

¹“Cil kingetsate ahibuale zang a ki attansate peuma TOPA ii mite sungah kihel thei ngawl tu hi.

²“Lamlakta ahibuale tuate ii a suan a paal pawpo a khang sawmna dong keak ahizong kuama peuma TOPA ii mite sungah kihel thei ngawl tu hi.

³“Ammon te ahibuale Moab te — ahibuale amate ii suan le paalte khat pawpo a khang sawmna dong keak ahizong — TOPA ii mite sungah kihel thei ngawl tu hi.

⁴Amate in Egypt pan na pusua uh lai in lampi ah an le tui hong pia nuam ngawl a, note hong haamsiat tu in Mesopotamia ngam Pethor khuapi pan Beor tapa Balaam cial uh hi.

⁵Ahizong TOPA na Pathian in Balaam thu ngai ngawl a; note hong it hu in a haamsiatna sia thupha suaksak zaw hi.

⁶Minam khat na hi uh laiteng, hi minamte hu natu ahibuale a nopsak thei natu bangma seam ngei heak vun.

⁷“Edom te zawngsak heak vun; na beete uh hi. Tuaciang Egypt te zawngsak heak vun; amate ngam ah teang ngei nu hi.

⁸A khang thumna pan kipan a suan a paalte TOPA ii mite sungah kihel thei tu uh hi.

⁹“Ngalsim hun sung ngiaphual ah na om uh ciang, biakna taw kisai a thiangtho ngawl hong suaksak tu peuma pial vun.

¹⁰Pasal khat zan a mut lanin a bawtui tee in a thiang ngawl a suak le, ama ngiaphual pua sangah pusuakin tualai ah om tu hi.

¹¹A nitak sangin ama kibual tu a, nitum ciang ngiaphual sungah tum thei tu hi.

¹²“Ngiaphual pua sangah awnghaw nop ciang pai thei natu mun khat na nei tu uh hi.

¹³Lei taw natu thingbaak khat keng vun a, na awnghaw zawkciang lei huk kik vun.

¹⁴Na ngiaphual sia biakna taw kisai in thiangsak vun, banghang ziam cile hong keam tu le na ngalte hong zosak tu in TOPA na Pathian sia na ngiaphual sungah note hong ompui hi. TOPA ii hong nungngat natu za dongin a deihuai ngawl bangma vawt heak vun.

¹⁵“Sila khat sia a topa kung pan tai in nang hong beal le puak kik heak in.

¹⁶Amate ii tealna khua khat pawpo ah teang thei tu a, vawtsia ngawl tu nu hi.

¹⁷“Israel mi, pa ahizong numei ahizong biakinn ah pumpi zuak khat suak thei ngawl tu hi.

¹⁸Hi bangin a thalaw sumte zongh kiciamna taangtutsakna in TOPA na Pathian inn sungah kipaipui thei ngawl tu hi. TOPA in biakinn ah pumpi kizuakte ensan hi.

¹⁹“Dangka, an, ahibuale na khat pawpo Israel na mipuite tungah na pukthaak uh ciang a meet la heak vun.

²⁰Ngamdangmite tungah na pukthaak uh ciang a meet na la thei tu uh a, ahizong Israel na mipuite tungah na pukthaak uh ciang a meet la heak vun. Hi ngeina zui vun, tua hile na laak tu uh ngam sungah na sep na vawt theampo TOPA na Pathian in thupha hong pia tu hi.

²¹“TOPA na Pathian tungah kiciamna na vawt uh ciang na kamciam sia peal heak vun; TOPA in na kamciamna len tu a, na len bua uh le mawna ahi hi.

²²TOPA tungah kiciamna vawt ngawl sia mawna hi ngawl hi,

²³ahizong thin zawna taw na vawt le len nanak vun.

²⁴“Midang khat ii sapithuan sungah lampi na tot ciang, sapitnga na du zaza na ne thei tu a, ahizong na bawm sungah heangin bangma ciapui ngawl het tu nu hi.

²⁵Midang khat ii lo sungah lampi na tot ciang na khut taw na deiza taanghuite sik in ne thei tu nu hi, ahizong phiau taw taanghui bangma attan heak vun.