Read Siyin Chin Thuhil kikna 24 Bible Online

Thuhil kikna 24 - Siyin Chin bible

Thuhil kikna 24

¹“Sonteena in pa khat in numei khat teenpui a, hun khat ciang dei nawn ngawl hi, banghang ziam cile tua numei tungah ama diksak ngawl thu khat mu hi. Tua ahiciang ama in kikhulna lai vawt a, tua nu pia in a inn pan ciasak hi.

²Tuaciang sonteena in tua nu in pasal dang nei kik hi.

³Tua pa in zongh dei ngawlin kikhulna lai vawt a, ama pia in, a inn pan ciasak hi. Tua ahibuale, sonteena in a pasal niina thi hi.

⁴Hi bang thute tungtaang ah a pasal masa in ama teenpui kik ngawl tu hi; tua pa atu in a numei sia a thiang ngawl ahi hi. Tua pa in a teenpui kik ahile TOPA a do suak tu hi. TOPA na Pathian ii hong piak tu ngam ah hi bang a cizathuai mawna vawt ngawl tu nu hi.

⁵“Zi nei tuung khat sia ngalkap kitumsak ngawl tu a, taangpi nasep khat pawpo zongh kiseamsak ngawl tu hi; a inn ah om in, a zi a lungdamsak thei natu in ama sia kum khat sung na kiseamsak ngawl tu hi.

⁶“Mihing khat tungah na khat na zawn le, khapna in, a zak lai an ngoaina suangte na laaksak buatu hi. Tua in amate innkuan ii nuntak natu in a anneak vawtna ahi hi.

⁷“Israel a mipui khat ngu a, sal in a khoai pawpo ahibuale sal in a zuak pawpo kithatlum tu hi. Tuabangin hi siatnate na bosak tu uh hi.

⁸“A lauhuai mama vun natna na vei uh ciang, Levi thiampite ii hong son bang linlian in vawt vun; amate tungah ka thupiakte zui vun.

⁹Egypt pan nong pai uh lai, TOPA na Pathian ii Miriam tungah a vawtnate phawk vun.

¹⁰“Ngual tungah na khat na zawn le khapna in hong piak tu a puansilh sia a inn sungah tumin la heak vun.

¹¹A puasang pan ngak vun a, ama in piasak vun.

¹²Ama sia mizawng khat ahile, tuasia zan taamsak ngawlin,

¹³a mut thei natu in nitak simin ama pia kik vun. Tuasia ciang ama lungdam tu a, TOPA na Pathian sia na tungah hong lungkim tu hi.

¹⁴“Israel na mipuite ahibuale na khua sungah a teang ngamdang mite, zawngin a cimaw na cial uh naseamte theam heak vun.

¹⁵Ni sim nitum ma in a nitha pia vun. Ama sum kisamh in, a nga nanak tu sia muang nginge hi. Na pia bua uh le ama in TOPA tungah hong khia tu a, noma a maw na hi tu uh hi.

¹⁶“A tate khialna liante hangin a nu le a pa thina thuak ngawl tu a, a nu le a pa ii khialna liante hangin a tate thina thuak ngawl tu hi; Mihing khat sia ama ii khialna lian a vawt hang bekin thina thuak tu hi.

¹⁷“Ngamdangmite le tangate ii a nga tu te khaktan heak vun a; meingong nu ii puansilh sia leiba khapna in la heak vun.

¹⁸Egypt ngam ah sal na hina uh le TOPA na Pathian ii hong suataksakna thu phawk vun; tua hu in hi thupiakna sia kong pia hi.

¹⁹“Lo ante na laak uh ciang na laak sa na puak ngawl uhte pai in la kik heak vun; TOPA na Pathian in na nasepna po ah, thupha hong piak natu in, tuate ngamdangmite, tangate le meingong nupite atu in kinusiat tu hi.

²⁰Olive kungte khatvei na law zawk uh ciang a taanglaite pai in lo kik heak vun; tuate ngamdangmite, tangate le meingong nupite atu ahi hi.

²¹Na sapitngate khatvei na law zawk uh ciang, sapithuan ah a nii veina lun kik heak vun; tua sapit a taanglaite ngamdangmite, tangate le meingong nupite atu ahi hi.

²²Egypt ngam ah sila na hina uh mangil ngei heak vun; tua hu in hi thupiakna sia kong pia hi.