Read Siyin Chin Thuhil kikna 25 Bible Online

Thuhil kikna 25 - Siyin Chin bible

Thuhil kikna 25

¹“Sonteena in Israel te nii sia thu kinei in zum kithen a, thu a khen ciang khat sia maw ngawlin a dang khat sia maw hi.

²A maw pa sia saat thuak tu in thu a kikhen le, thukhenpa in ama, lei ah boksakin saatsak tu hi. Bang tanvei saat tu cisia ama khialna lian a vawtna bang hi tu hi.

³Ama sia sawmlivei dong kisaat thei tu a, ahizong tuaza sangin tamzaw ngawl tu hi; tuaza sangin a tamzaw le mipite mai ah maizum a pia suak tu nu hi.

⁴“Khuital khat an na cilsak laitakin a muk tuamsak heak vun.

⁵“Unau nii inn khat ah teang khawm a, khat sia tapa nei ngawlin a thi le, a zi sia innkuan dangah pasal nei thei ngawl tu hi; mithi pa ii suapuipa in ama a teenpui tu sia a vaipuak ahi hi.

⁶Mithi pa ii bee le ngui Israel minam sungah a bo ngawl natu in amate ii nei a tapaciil sia mithipa ii tapa in kingaisun tu hi.

⁷Ahizong mithi pa ii suapuipa in ama a teenpui nuam buale tua nu sia khua lampuite mai ah pai tu a, ‘Ka pasal suapuipa in a vaipuak seam ngawl hi. Ama in Israel mite sungah a suapuipa atu in suan le paal pia nuam ngawl hi,’ ci in son tu hi.

⁸Tuaciang khua lampuite in tua pa samin thu sonpui tu hi. Tua pa in a teenpui nuam bualai ahile,

⁹a suapuipa zi in khua lampuite mai, ama kungah pai in tua pa ii peangdap langkhat suutsak in, a maitang cilphii in, ‘A suapuipa atu in suan le paal a pia nuam ngawl sia tungah hi bangin kivawt hi,’ ci tu hi.

¹⁰Israel sungah tua pa ii innkuan sia, ‘A peangdap a kisuusak pa ii innkuan,’ kici tu hi.

¹¹“Pasal nii kihau a, a khat sia pa ii zi in a pasal hun nuamin, a khat sia pa ii cil le zang a zapsak ahile,

¹²tua nu hesuak ngawlin; a khut tansak vun.

¹³“Toaisuangte le piciangte na zak uh ciang theam heak vun.

¹⁵TOPA na Pathian ii hong piak tu ngam ah na khan a sau thei natu in toaisuangte le piciangte thumaan thutak taw zangh vun.

¹⁶TOPA in ngualtheamte ngaimaw hi.

¹⁷“Egypt ngam pan nong pai uh lai in, Amalek te ii hong vawtnate phawk vun.

¹⁸Amate in Pathian kiita ngawl ahiciang noma toi in na tha uh a bo ciang na nung pan hong simin, nungsangah a toi a baa theampo hong thatlum siat hi.

¹⁹Tua ahikom, TOPA na Pathian in ngam hong pia in, na kiim ah a teang na ngalte kung pan ngalmuanna hong piak ciang Amalek te theampo thatlum siat vun, tua hile kuama in amate phawk nawn ngawl tu hi. Tuasia mangil heak vun!