Read Siyin Chin Thuhil kikna 27 Bible Online

Thuhil kikna 27 - Siyin Chin bible

Thuhil kikna 27

¹Tuaciang Moses in Israel lampuite taw kopin mipite tungah, “Tuni a kong piak kihilna theampo zui vun.

²Jordan ngun kaantan in TOPA na Pathian ii hong piakna ngamsung na tum uh ni in, suang lian pawlkhat phut in, buan taw zut vun a,

³tuate tungah hi thukhamte le hilnate theampo at vun. Na taanghpupite ii Pathian, TOPA ii hong kamciamna ahi ngamnuam le ngampha sungah na tum uh ciang,

⁴le Jordan ngun langkhat na thet uh ciang tuni in kong hil bangin Ebal Mual tungah hi suangte phut vun a, buan taw zut vun.

⁵Tua munah thik hiamh taw a kitan ngawl suang taw a kivawt biaknatau khat ciang vun,

⁶banghang ziam cile TOPA na Pathian atu in na cian biaknatau peuma a ki attan ngawl suangte taw bekin kivawt tu hi. Tualai ah meihal biakpiaknate na pia tu uh a,

⁷sangaw biakpiakna pia in pawlkhop biakpiaknate ne in TOPA na Pathian mai ah lungdamko vun.

⁸Buan taw a kizut suangte tungah Pathian ii thukham kammal theampo a kician in at vun,” ci hi.

⁹Tuaciang Moses in Levi thiampite taw Israel mite theampo tungah, “Israel mite awng, pha tak hong nadon tavun. Tuni in TOPA na Pathian ii mi na suak zo uh hi;

¹⁰tua ahiciang tuni in kong piak ama thukham theampo zui in keamcing tavun,” ci uh hi.

¹¹Tuaciang Moses in Israel mite tungah,

¹²“Jordan ngun na kaan zawk in, mipite tungah thupha a kipiak ciang a nuai a minamte sia Gerizim Mual tungah ding tu uh hi: tuate sia Simeon, Levi, Judah, Issachar, Joseph le Benjamin namte ahi hi.

¹³A kihaamsiat ciang a nuai a minamte Ebal mual tungah ding tu uh hi; tuate sia, Reuben, Gad, Asher, Zebulun, Dan le Naphtali namte ahi uh hi.

¹⁴Levi te in hi kammalte nging takin pau tu hi:

¹⁵“ ‘Suang, thing ahibuale leisung sumpiangte taw milim vawt a, tuasia a bia ku pawpo tungah Pathian haamsiatna tung tahen; TOPA in milim biakna ngaimaw hi.’ “Tuasia ciang mipi theampo in ‘Amen!’ ci in zo tu uh hi.

¹⁶“ ‘A pa ahibuale a nu a zatak vawt ngawl pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

¹⁷“ ‘A innpaam khat ii ngisuang a khiin pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

¹⁸“ ‘Mittaw khat a lamlak khial pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

¹⁹“ ‘Ngamdangmite, tangate le meingong nupite ii nga tute a khaktan pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

²⁰“ ‘A pa zite khat pawpo khialpuina taw a pa a maimawlsak pawpo tungah Pathian haamsiatna tung tahen.’ “Tuasia ciang mipi theampo in ‘Amen!’ ci in zo tu uh hi.

²¹“ ‘Nganhing taw a khial pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

²²“ ‘A suapuinu ahibuale a suapui sealhnu a khialpui pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

²³“ ‘A sunghnu a khialpui pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

²⁴“ ‘Mihing a that ku pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.

²⁵“ ‘Mawnei ngawl mihing khat thatlum tu in sumnguk a saang pawpo tungah Pathian haamsiatna tung tahen.’ “Tuasia ciang mi theampo in, ‘Amen!’ ci in zo tu uh hi.

²⁶“ ‘Pathian thukham theampo le hong hilna teng a zui ngawl pawpo tungah Pathian haamsiatna tung tahen.’ “Tuasia ciang mipi theampo in, ‘Amen!’ ci in zo tu uh hi.