Read Siyin Chin Thuhil kikna 29 Bible Online

Thuhil kikna 29 - Siyin Chin bible

Thuhil kikna 29

¹Hite sia Moab ngam ah Israel mite taw a vawt tu thuciamna taw kisai in, TOPA ii Moses tungah a sawl thute ahi hi; hi thuciamna theampo sia TOPA ii amate taw Sinai Mual ah a vawt thuciamna belapna ahi hi.

²Moses in Israel mite theampo sam khawmin amate tungah, “TOPA ii Egypt kumpipa, a uliante tung le a ngam bup ah a vawt nate noma ma in mu nu hi.

³A lauhuai natnate, nalamdang laknate le TOPA ii a vawt a lamdang thuliante mu nu hi.

⁴Ahizong na sinsa thute tuni dong mama in ama in no hong telthiangsak ngawl lai hi.

⁵Kum sawmli tawntung TOPA in sennealngam hong kaanpui a, ahizong na puansilhte le na peangdapte uh sia ngeingawl hi.

⁶Neak tu in anluum, dawn tu in sapittui ahibuale beer nei ngawl nu hi, ahizong ama sia na Pathian a hina thu hong hil nopna in na kisap bangin TOPA in hong pia hi.

⁷Tuaciang hi mun ih thet ciang ei hong sim tu in Heshbon kumpipa Sihon le Bashan kumpipa Og te hong pai hi. Ahizong eite in amate ih zo a,

⁸a ngam la in, Reuben nam, Gad nam le Manasseh nam a lang teng nga tu in kihawmsak hi.

⁹Na sep na vawt theampo na zaw natu in hi thuciam sungah a om theampo thumaan takin zui vun.

¹⁰“Tuni in note theampo — na lampuite le na uliante, na pasalte,

¹¹nupite, patangte le no atu in thing hong tomsak, tui hong toaisak a, note sungah a teang ngamdangmite taw TOPA na Pathian mai ah na ding siat uh hi.

¹²Hi lai ah tuni in TOPA na Pathian ii no taw a vawt hi thuciamna sungah a tum tu le, tuasia taw kisai sep tu te a saang tu in na om uh hi,

¹³tuasia ciangin, note le na taanghpupite ahi, Abraham, Isaac, le Jacob tungah a kamciamsa bangin TOPA in no ama mi na hina uh le ama note Pathian a hina kipsak thei tu hi.

¹⁴Hi thuciamna le sep tu te sia note taw bekin TOPA ii a vawt hi ngawl hi.

¹⁵Tuni in ama mai ah a ding eite theampo le a suak ngawl lai ih suan ih paalte taw zong ama in hi thuciamnate a vawt ahi hi.

¹⁶“Note in Egypt ah nuntakzia le minam dangte ngam sungah khualhawzia na phawk uh hi.

¹⁷Thing, suang, ngunn le khamh taw a kivawt a kiihuai a milimte na mu uh hi.

¹⁸Tuni in hi lai ah a ding, pa, numei, innkuan ahibuale minamte, kuama in TOPA ih Pathian nungngat in minam dangte ii pathiante bia peuma heak vun. Hisia in a khaa le ngu a nei thingkung a hinna a zung khat taw kibang tu hi.

¹⁹Tuni in hi lai ah a ciliaphuai hong nget tangkalnate za napi a thinpui in keima uuk bang pai leng ka ma vang tu zam a ci omsak peuma heak vun. Tuasia in note theampo a pha, a sia a kibangin hong lalsak siat tu hi.

²⁰TOPA in tuabang mihing khat ii mawna maisak ngawl tu hi. Tua luangin TOPA thin uukna sia tua pa atu in meileng bang hi tu a, TOPA in ama a lalsak mateng in hi thubu sungah a ki at tuasiatnate theampo tung tu hi.

²¹TOPA in ama Israel nam theampo mai ah teengatna khatin nei tu a, TOPA ii hilcianna thubu sungah a ki at ahi, thuciamna ah a kikoi haamsiatna theampo taw kizui in tuasiatna tungsak tu hi.

²²“Mailam khang kikte sungah na suan na paalte le ngam khuala pan ngamdangmite in na ngam sungah TOPA ii hong puak tuasiatnate le ngim thuaknate mu tu uh hi.

²³Na lote kolh siat tu a, kaan le ci taw kidim tu hi; bangma kiciing thei ngawl tu a, lopa ngawngawn po ngawl tu hi. Na ngam uh sia, TOPA ii a thinso lai in a lalcipsak Sodom le Gomorrah, Admah le Zeboiim khuapite taw kibang tu hi.

²⁴Tuasia ciang leitung buppi in, ‘Banghang TOPA in amate ngam hi bang vawt ziam? Bang thu hangin TOPA a thin uuk ziam?’ ci in dongh tu hi.

²⁵Tuaciang, ‘A taanghpupite ii Pathian in Egypt ngam pan a pusuapui lai in amate taw a vawt thuciamna sia TOPA ii mite in a palsat hang ahi hi.

²⁶TOPA ii a biak ngawl tu in a khaam pathiante, nidang a biak ngeingawl pathian dangte ii na seam uh hi.

²⁷Tua ahikom TOPA in a mite tungah thin uuk in, hi thubu sungah a ki at tuasiatnate theampo amate ngam sungah tungsak hi.

²⁸TOPA thin uuk mama a, a thin uukna lian ahikom a ngamsung pan longhkeak in ngamdang denna in nei a, tuni dongin tua munah amate om uh hi,’ ci sia a kizo kikna hi tu hi.

²⁹“TOPA ih Pathian ii a kep tuam thuku pawlkhat om hi; ahizong ama in a Thukham hong pualaak zo a, eite le ih suan ih paalte in tuasia a tawntungin a zui tute ih hi hi.