Read Siyin Chin Thuhil kikna 3 Bible Online

Thuhil kikna 3 - Siyin Chin bible

Thuhil kikna 3

¹“Tua zawkciang saksang Bashan ngam sang ih manaw a, Edrei khua hui ah eite hong sim tu in Og Kumpipa sia a mi theampo taw hong pai hi.

²Ahizong TOPA in kei tungah, ‘Ama kiita heak in. Ama, a mi teng le a ngam theampo nang kong pia tu hi. Heshbon a uk Amor Kumpipa Sihon tungah na vawt bangin, ama tungah vawt in,’ hong ci hi.

³“Tuabangin TOPA in Kumpipa Og le a mite eite khut sungah hong koi a, eite in amate ih thatlum siat hi.

⁴Tua hun laitak ma in eite in a khua theampo ih la siat a — ih laak ngawl khua khat zongh om ngawl hi. A vekpi khuapi 60 eite in ih la a — Bashan Kumpipa Og ukna, Argob ngam buppi ahi hi.

⁵Hi khuate theampo luphung saangte, a kalhna taw a kithua kongpite taw ki uum hi, tuaciang luphung a nei ngawl khuano tam mama zongh om hi.

⁶Khua theampo eite in ih susia siat a, Heshbon Kumpipa Sihon ii khuate ih vawt bangin pasal, nupi le patang theampo ih that siat hi.

⁷A ngannote le khuate eite in ih laaksak hi.

⁸“Tua hun laitak ma in Jordan Ngun ii nisuana sang ngam Arnon Ngun pan Hermon Mual dong, tua Amor kumpi niite khut tung pan eite in ih la hi.

⁹(Sidon te in Hermon Mual sia Sirion ci uh a, Amor te in Senir ci uh hi.)

¹⁰Bashan Kumpipa Og ii ngam theampo eite in ih la a: mual zaangtam tungah khuapite, Gilead le Bashan ngamte nisuana sang Salecah le Edrei khuate dong ahi hi,” ci hi. (

¹¹Kumpipa Og sia Rephaim kumpi khakbel ahi hi. Ama ii thaankuang, suang taw kivawt sia a kitee ngeina bang a tee ciang, metre 4 sau in metre 2 dedek zai hi. Tuasia sia Ammon te khuapi Rabbah ah kimu thei lai hi.)

¹²“Tua ngam eite in ih laak zawkciang Arnon ngun hui ah a om Aroer khua ii saksang ngam le Gilead mualtung ngam khenkhat, a khuate taw in Reuben le Gad namte tungah ka pia hi.

¹³A taanglai Gilead ngam le Bashan ngam buppi, Og ukna ngam buppi, Argob ngam theampo Manasseh minam a langte tungah ka pia hi.” (Bashan sia Rephaim te ii ngam kici hi.

¹⁴Bashan a kici, Argob ngam buppi sia Geshur le Mascah ngamngi dongin Manasseh nam Jair in la hi. Tua khuanote sia ama min tapsakin minphuak a Jair khuanote kici lai hi.)

¹⁵“Manasseh nam Machir bee le phung tungah Gilead ka pia hi.

¹⁶Gilead khua pan Arnon Ngun dong ngam le lei sia Reuben le Gad namte tungah ka pia hi. Ngunpi laizang sia amate ii thangsang ngamngi hi a, Jabbok Ngun sia a saksang ngamngi hi a, Ammon te ngamngi khen khat zongh ahi hi.

¹⁷Nitumna sangah a ngam sia Jordan Ngun dong hi a, saksang ah Galilee Tuili, tualai pan thangsang ah Tuipi Thi dong, nisuana sang ah Pisgah Mualpeang dong ahi hi.

¹⁸“Tua hun laitak ma in amate tungah a nuai a kihilnate ka pia hi: ‘TOPA ih Pathian in Jordan nisuana ngam sia na laak tu uh in no hong pia zo hi. Tu in na ngalkapte ngalhiam pia vun a, a dang Israel namte ii a ngam laak a hu tu in tuate ih mai ah Jordan kan in puak vun.

¹⁹Na zite, na tate le na nganno teng — nganno tam na nei uh kong he hi — bek kong piakna khuate ah taang tu hi.

²⁰Hi lai ah note atu hong vawtsak bangma in TOPA ii amate a piak tu Jordan nitumna sang ngam teng a laak mateng le amate tua munah thinnuam takin TOPA in a teensak mateng in na Israel mipuite hu vun. Tuasia zawkciang kong piaksa ngam hi munah nong cia kik thei tu uh hi.’

²¹“Tuaciang keima in Joshua ka hil a: ‘TOPA na Pathian ii kumpi niite ahi, Sihon le Og tungah a vawtna theampo na mu siat zo hi; tuaciang nangma in sim a na laak tu ngam a neite theampo tung zongh ah ama in tuabang ma in vawt tu hi.

²²Amate kiita heak in, banghang ziam cile TOPA na Pathian in no atu ngal hong simsak tu hi,’ ka ci hi.

²³“Tua hunlai ma in thintakpi taw thu ka ngen a,

²⁴‘Vaanglianpipa TOPA awng, na lian le nalamdang na vawt tu te ii kipatna bek nong lak pheang hunlam ka he hi. Nangma sepna sa bangin nalamdang nasiate a seam thei, vantung ah ahizong leitung ah ahizong pathian om ngawl hi!

²⁵TOPA awng, Jordan Ngun hong kaantansak ta'n a, a langkhat lei phana, mualtung ngamhoi le Lebanon Mualte hong musak tan’, ka ci hi.

²⁶“Ahizong no mipite hangin TOPA in kei tungah hong thin uuk a, ka thungetna hong ngai ngawl hi. Tua sangin ama in kei tungah, ‘Pha zo hi! hi thu son kik nawn heak in!

²⁷Pisgah Mualdawn ah pai in a saksang le a thangsang, nisuana sang le nitumna sang teng va en ta'n. Na mu teng pha tak en in banghang ziam cile Jordan ngun kaantan ngeingawl tu ni hi.

²⁸Joshua a pha takin na hil in. Ama tha pia in, a thin khosak in, banghang ziam cile na mu ngam teng a la tu in ama in mipite lampui tu hi,’ hong ci zaw hi.

²⁹“Tuabangin eite Bethpeor khua ngalkhat kuam sungah ih taam hi,” ci hi.