Read Siyin Chin Thuhil kikna 30 Bible Online

Thuhil kikna 30 - Siyin Chin bible

Thuhil kikna 30

¹“Tu in note thupha le haamsiatna khat sasang na teal tu in kong pia zo hi. Hi thu theampo note tungah hong pian zawkciang le TOPA na Pathian ii hong thethaang na mun minamte sungah na teen uh ciang, na teal tu in kong piak sia na phawk kik tu uh hi.

²Note le na suan na paalte in TOPA kungah heak kikin, tuni a kong piak ama thupiakte na thin theampo taw na zui uh le,

³TOPA na Pathian in no hong hesuak tu hi. Ama in note hong thethaang na ngamte pan hong pui kik tu a, hong nuamsasak kik tu hi.

⁴A khualabel leimong tengah na kithethaang keak uh zongin TOPA na Pathian in note hong kaikhawm in hong pui kik tu a,

⁵khatvei lai na taanghpupite ii teenna ngam le lei na nga kik tu uh hi. Tuaciang ama in na taanghpupite om ngei bang sangin a nuamsa zaw le a pung zaw in hong siam tu hi.

⁶Na thin theampo taw ama na it natu uh le tua ngam ah na teen suak thei natu uh in TOPA na Pathian in note le na suan na paalte tungah thu nit nopna thin hong pia tu hi.

⁷Ama in no hong ngaimaw le hong nengniam na ngalte tungah hi haamsiatna theampo tungsak tu hi,

⁸tuni in kong piak ama thupiakte theampo na keamcing tu uh a, ama thu na ni kik tu uh hi.

⁹Na nasepna theampo ah TOPA in hong nuamsasak tu a; ta tam le nganno tam mama nei in, na lote pan an tam tatak piang tu hi. Na taanghpupite bangma in no zong a nuamsa in hong siam tu sia ama lungdam tu hi,

¹⁰ahizong ama hilciannate a kikhumna hi thubu sungah a ki at a thukham theampo zui in a thu na nit uh kul tu hi. Note in na thinsung theampo uh taw ama na zot uh kul tu hi.

¹¹“Tuni kong thupiak sia haksa lei ngawl a, zui laak tu zongh hi ngawl hi.

¹²Tuasia van ah a om hi ngawl hi. ‘Eite zaak thei tu le zui thei tu in akua kaato in tua thu hong puaksuk tu ziam?’ ci in kidok kul ngawl hi.

¹³Tuipi ngalkhat ah a om thu zongh hi ngawl hi. ‘Eite zaak thei tu le ih zui thei tu in akua in tuipi kaantan in ei kungah hong paipui tu ziam’ ci in dok kul ngawl hi.

¹⁴Tuabang hi ngawl hi, hi lai ah note taw omkhawm hi. Note in na he uh a, zongh, na son kaak thei uh hi, tua ahiciang tu in zui vun.

¹⁵“Tuni in a pha le a sia, nuntakna le thina khat sasang na teal tu kong pia hi.

¹⁶Tuni in kong piak TOPA na Pathian ii thupiakte na zui uh le, tuaciang ama it in, a thu ni in a thukham theampo na zui uh le, note na nuamsa tu uh a, a pung minam khat na suak tu uh hi. Note laak tu ngam ah TOPA na Pathian in thupha hong pia tu hi.

¹⁷Ahizong a thu ni ngawl nangai ngawlin, pathian dangte a bia tu in lam na pial uh le,

¹⁸tu in hi lai ah kidop natu in kong son hi — note hong kilalcipsak siat tu hi. Na laak tu uh ngam, Jordan ngun ngalkhat ah khuangei nungta ngawl tu nu hi.

¹⁹Tu in khat sasang na teal tu uh nuntakna le thina, Pathian ii thupha le Pathian ii haamsiatna kong pia a, na teal uh sia hong heakpui tu in vantung le leitung ka ko hi. Nuntakna teal vun.

²⁰TOPA na Pathian it vun, a thu ni vun, ama tungah thumaan vun, tuasia ciang, na taanghpupite ahi Abraham, Isaac, le Jacob tungah piak tu a, a kamciamna ngam sungah noma le na suan na paalte khansau in na nungta tu uh hi,” ci hi.