Read Siyin Chin Thuhil kikna 31 Bible Online

Thuhil kikna 31 - Siyin Chin bible

Thuhil kikna 31

¹Moses in Israel mite tungah a thuson zom lai a,

²“Tu in kum za le kum kul ka pha a, note ii lampui hi zo nawn ngawl tu khi hi. Tua bek dom ngawlin TOPA in Jordan ngun kan ngawl tu ni hi, hong ci hi.

³Amate ngam na laak thei natu uh in TOPA na Pathian ama mama na mai uh ah pai tu a, tua ngam ah a teang minamte lalcipsak tu hi; Tuaciang TOPA ci sa bangin Joshua sia note lampui hi tu hi.

⁴TOPA in Amor kumpipate ahi Sihon le Og zo in, a ngam a lalcipsak bangma in tua mite lalcipsak tu hi.

⁵TOPA in amate hong zosak tu a, kong sonsa bang linlian in amate na vawt tu uh hi.

⁶Na thin khosak vun a, kimuang vun. Amate kiita heak vun. Na Pathian, TOPA ama mama in note hong ompui tu hi. Ama in note hong lelsak ngawl tu a, hong taisan ngawl tu hi,” ci hi.

⁷Tuaciang Moses in Joshua sam a, Israel mite theampo ii mai ama tungah, “Na thin khosak in a, kimuang in; a taanghpupite tungah TOPA kamciam omsa ngam a la tu hi mite a lampui tu sia nangma ni hi.

⁸TOPA ama mama in nangma lam hong pui in, hong ompui tu hi. Ama in nang hong nusia ngawl tu a, hong taisan ngawl tu hi, tua ahiciang thinno heak in a, lau heak in,” ci hi.

⁹Tuaciang Moses in Pathian Thukham at in, TOPA Thuciamna Thingkuang a keam Levi thiampite le Israel lampuite tungah pia hi.

¹⁰Moses in amate thupia a, “Kum sali a cin sim, leiba maisak kum hong thet ciang Buk Poai ah hisia a ngingin sim vun.

¹¹Biakna mun khat sia ah Israel mite TOPA na Pathian bia tu in hong pai uh ciang hi thukham sia amate tungah sim vun.

¹²A kuama po in hisia za thei a, TOPA na Pathian a zatak vawt thei natu le ama ii thuhilte thumaan takin a zui thei natu in pa, numei, patang te le noma khuate ah a teang ngamdangmite a vekpi in sam khawm vun.

¹³TOPA na Pathian ii Thukham a za ngeingawl na suan na paalte in hi bangin za tu uh hi. Tuasia ciang Jordan ngun ngalkhat na laak tu ngam sungah a teen laiteng ama thu a nit thei natu in amate in sin tu uh hi,” ci hi.

¹⁴Tuaciang TOPA in Moses tungah, “Khuangei nungta nawn ngawl tu ni hi. Keima in Joshua thu ka hil thei natu in ama samin Puanbuk ah hong paipui ta'n,” ci hi. Moses le Joshua Puanbuk ah pai a,

¹⁵tualai Puanbuk kongbiang ah meeikhuam khat sung pan amate tungah TOPA hong kilangh hi.

¹⁶TOPA in Moses tungah, “Thi pal tu ni hi, na thi zawkciang mihingte kei tungah hong thumaan ngawl tu a, amate taw ka vawt thuciamna sia palsat tu uh hi. Amate in kei hong taisan tu a, a tum natu ngamsung doai biate ii pathiante bia tu uh hi.

¹⁷Tuabang teng a pian ciang amate tungah ka thin uuk tu hi; amate ka taisan tu a, amate kimon tu hi. A lauhuai natna tuatuamte amate tungah theng tu hi, tuasia ciang keima a Pathian sia amate taw omkhawm nawn ngawl ka hikom hi thu teng piang hi cisia amate in tel tu uh hi.

¹⁸Tuasia hun ciang amate ka hu buatu hi, banghang ziam cile amate a sia in ngamta zo a, pathian dangte bia uh hi.

¹⁹“Tu in, la hisia at in. Amate langpanna tetti ahi natu in la hisia Israel mihingte hil in.

²⁰A taanghpupite tungah ka kamciamsa bangin hi ngampha le ngamnuam ah amate ka pui tu hi. Tualai ah amate du an theampo nei tu uh a, nuam takin teang tu uh hi. Ahizong amate in hong nungngat in pathian dangte bia tu uh hi. Amate in kei hong nial tu a, ka thuciam palsat tu uh hi,

²¹tuaciang, a lauhuai natna tuatuamte amate tungah tung tu hi. Ahizong hi la kisa lai tu a, tuasia in amate a kilangpanna tetti hi tu hi. Tu laitak amate piak tu in ka khapsa ngam ah ka tumpui ma ngawngawn in amate ngaisutna ka he hi,” ci hi.

²²Tua ni ma in Moses in tua la at a, Israel mite hil hi.

²³Tua zawkciang TOPA in Nun tapa Joshua a paupuina sungah, “Kimuang in a, na thin khosak in. Ka khapsa ngam sungah Israel mite lam na pui tu a, nangma taw kong omkhawm tu hi,” ci hi.

²⁴Moses in laibu khat sungah Pathian Thukham at a, khat zongh a kheet ngawl natu in kidawm hi.

²⁵A man zawkciang, TOPA Thuciamna Thingkuang a keam Levi thiampite tungah ama in,

²⁶“Pathian ii Thukham hi thubu sia la vun a, ama mite langkhat ah tetti in tua munah a om top thei natu in TOPA na Pathian ii Thuciamna Thingkuang hui ah koi vun.

²⁷Amate bang zata thinpui in bangbang hong langpan nuam cisia ka he hi. Ka nuntak sungin amate in TOPA sia hi zata langpan ahile ka thi zawkciang langpan seseam tu uh hi.

²⁸Hi thute amate tungah ka son thei natu in na nam lampuite le uliante a vekpi in ka mai ah khawmtua vun; Amate langkhat ah ka tetti tu in vantung le leitung ka ko tu hi.

²⁹Ka thi zawkciang, amate ka hil sa thute a nial mi seksol a sua tu sia ka he hi. Amate in TOPA ii a khaamte a vawtna taw in ama thin uuksak ahi hu in mai sangah tuasiatna thuak tu uh hi,” ci hi.

³⁰Tuaciang Moses in a nuai a la teng theampo suut a, Israel mite theampo in ngai uh hi.