Read Siyin Chin Thuhil kikna 32 Bible Online

Thuhil kikna 32 - Siyin Chin bible

Thuhil kikna 32

¹“Van le lei awng, ka kammalte za vun a, ka ci teng hong ngai cinten tavun.

²Kong hilcianna nguamal bangin taak tu a, leitung ah daaitui kia bang hi tu hi. Ka kammalte sia thingkungnote tungah nguamal phiin bangin lopa moite tungah dam takin a zu nguatui bangin taak tu hi.

³TOPA min ka pok tu a, a mite in a letna son tu uh hi.

⁴“TOPA sia note hong dal a hatbelpa hi a, A sepzia theampo kicing in maan hi; Na Pathian thumaan in thutak a; Ama in a maan le a pha in seam hi.

⁵Ahizong note sia thumaan ngawlin ama ii mi tu in na citaak bua uh a, mawnei le a ngualtheam thei minam na hi uh hi.

⁶A mawmaw, khuangaisut nei ngawl mite awng, hi bangin TOPA vawt tu nu ziam? Ama sia no hong Bitphua pa, na pa uh hi a, minam khatin hong vawt pa ahi hi.

⁷“A bosa hunte, nidang lai hunte, ngaisun tavun; Thupiangte hong son tu in na pate dongh tavun, a bosa thute son tu in khanghaamte dongh tavun.

⁸A Saangbel Pa in minamte a ngam a lei tu pia a; mite teen natu mun khensatsak hi. Ama in minam simin vantung mi khat tek pia a,

⁹ahizong Jacob suan le paalte sia ama atu in teal hi.

¹⁰“Ama in a ngamtongta vuipi vakna duisung ngampa sennealngam sungah amate vakkotna mu hi. Ama in ama le ama a kikep bangin amate keamcing hi.

¹¹Muvanlai in a note len tu sinpui a, manin a kiphal thakhuite tungah bit tak a koi bangin, TOPA in Israel te a taak natu pan keamcing hi.

¹²TOPA bek in ama mite lampui a, ngamdang pathian khat ii huna kihel ngawl hi.

¹³“TOPA in amate mualtung munte uksak a, amate in lo pan a piangte ne uh hi. Amate in suang kawmah khuaitui mu uh a, suanghol lei sungah a olive kungte limci hi.

¹⁴A khuipuite le a kealpuite in noai tam tatak ma pia a, amate in tuu, keal le khui phabel, zungtaang phabel le sapittui deitealte nei uh hi.

¹⁵“TOPA ii mite hau uh a, ahizong TOPA leedo uh hi; amate an khamin thau uh hi. Amate in a Bitphuapa Pathian taisan uh a, a vaanglian hunpa nial uh hi.

¹⁶A milim biakna TOPA in ensan a; a pha ngawl a sepna in TOPA thin uuksak hi.

¹⁷Amate in pathian tatak ahi ngawl pathiante, a taanghpupite ii a heak ngawl pathian thakte Israel te ii a thu a nit ngeingawl pathiante tungah sangaw biakpiakna vawt uh hi;

¹⁸Amate in a vaanglian ngumpa, amate nuntakna a pia pa, a Pathian mangil uh hi.

¹⁹“Hi thu teng TOPA in a mu ciang a thin uuk a, a tapate le a tanute nial hi.

²⁰‘Amate ka hu nawn buatu hi,’ ama in ci hi; ‘tuasia ciang a thinpuite le a thumaan ngawl mite tungah bang piang ziam ka en tu hi.

²¹Amate in a milimte taw ka thin hong uuksak a, Pathian tatak a hi ngawlte amate ii pathian a ci uhte taw ka etsat natu hong vawt uh hi. Tua ahikom amate thin a uuksak tu in minam a kici thawthong khat ka zangh tu hi; a mawmaw minam khat in amate ka ensansak tu hi.

²²Ka thin uukna sia mei bangin kuang a, leitung a om na theampo kaangh siat tu hi. Leinuai dong thengsuk tu a, mualpeangte zongh kaanghtum siat tu hi.

²³“‘Keima in amate tungah a bo thei ngawl tuasiatnate ka tungsak tu a, ka thaltang theampo taw amate ka kap tu hi.

²⁴Amate ngilkial le cisa natna taw thi tu a; a lauhuai natnate taw thi tu uh hi. Ngamsa ngilote in amate ka simsak tu a, ngul ngu neite in ka tusak tu hi.

²⁵Ngalpi hangin amate lam lai ah thi tu uh a; a bangkua uh sungah patauna tung tu hi. Tangvalno le ngaknuno te thi tu uh a; nausente le khanghaamte zongh kikhoaikhe ngawl tu hi.

²⁶Keima in amate ka mon siat tu a, tua hile kuama in amate ciamtee ngawl tu hi.

²⁷Ahizong amate a hualcip pa keima ma ka hi ciang a ngalte in ka mite a zawna thu sia kiphatsakna in ka neisak thei buatu hi,’ ci hi.

²⁸“Israel sia khua ngaisutna nei ngawl minam khat hi a; ciimna bangma nei ngawl hi.

²⁹Amate in a ngallelna ii ahang sia mu ngawl a; thupiangte tel zo ngawl uh hi.

³⁰Banghangin mi khat in tulkhat zo a, mi nii bek in tulsawm zo thei ziam? TOPA a Pathian in amate nusia zo hi; a thahat Pathian in amate koithong zo hi.

³¹A ngalte in amate ii pathiante thazawm a, a thahat Israel te ii Pathian taw a kiban ngawlna thu he uh hi.

³²A ngalte Sodom le Gomorrah bangin tatsia a, a ngate khaa in ngu a nei sapitkungte taw kibangin,

³³sapittui sia ngulngu taw vawt bang ahi hi.

³⁴“TOPA in a ngalte ii vawtna teng ciamtee a; daan a piak hun tu ngak nginge hi.

³⁵TOPA in amate phula in daan pia tu a; a kiamsuk tu hun hong pai tu a; a lal tu ni nai hi.

³⁶A thahatna teng a bo a mu ciang TOPA in a mite suatak tu hi. Ama in a naseamte a panpui tu a om ngawl hunlam a mu ciang, ama na a seamte hesuak tu hi.

³⁷Tuasia ciang TOPA in a mite tungah, ‘Na suan na muan tua a thahat pathiante koisungah om ziam’ ci in dongh tu hi.

³⁸Noma in na sangaw biakpiakna sathau taw amate na vaak uh a, a neak tu in sapittui na pia uh hi. Tu in amate hong hu tu in paisak vun. Noma hong suatak tu in delsak vun.

³⁹“ ‘Keima, keima bekma Pathian ka hi hi; pathian tatak a dang om ngawl hi. Ka thatlum a, nuntakna ka pia hi, ka liamsak a, ka damsak hi, ka nasepte kuama in hong nalh thei ngawl tu hi.

⁴⁰Keima in a nungta Pathian ka hi takpi bangma in, ka khut laamin,

⁴¹a tee vazal ka namsau ka taat tu a, thutang khenna ka musak tu hi, ci in ka kiciam hi. Ka ngalte tungah phu ka la tu a, keima hong ngaimawte daan ka pia tu hi.

⁴²Ka thaltangte amate chi sungah kidia tu a, ka namsau in kei hong nalh theampo that tu hi. Kei hong dote kuama ka khoaikhe buatu a; a liamte le thongtaakte ngawngawn thi tu uh hi.’

⁴³“Minamte awng TOPA ii mite pok hamtang tu nu hi — ama in ama ii mite a thatte theampo daan pia hi. Ama in a ngalte phula a, a mite mawnate maisak hi.”

⁴⁴Moses le Nun tapa Joshua in Israel mite zaak thei tu in, hi la suut uh hi.

⁴⁵Moses in mite tungah Pathian ii hilnate a son zawkciang,

⁴⁶ama in, “Tuni in kong piak thupiakte theampo zui hamtang vun. Pathian ii hilnate theampo thumaan takin a zui thei natu in na tate tungah son kikik vun.

⁴⁷Hi hilnate kammal thawthong hi ngawl a; na nuntakna tatak uh ahi hi. Tuate zui vun, tua hile na laak tu uh Jordan ngalkhat ngam ah khansau in na nungta tu uh hi,” ci hi.

⁴⁸Tua ni ma in TOPA in Moses tungah,

⁴⁹“Jericho khuapi ii langkhat a om Moab te ngamsung Abarim Mual te ah pai in a, Nebo Mual tungah kaato in, Israel mite ka piak tu Canaan leitang en in.

⁵⁰Na suapuipa Aaron ii Hor Mual tungah a thi bangin tua mual tungah na thi tu hi,

⁵¹banghang ziam cile note ngeal in Israel mite mai ah keima hong melsia in nong thumaan bua uh hi. Zin ngampa sung Kadesh khua nai tui omna Meribah ah na om uh lai in, mite mai ah kei nong zatak vawt bua uh hi.

⁵²Tua ngam sia na ngal et tu a, ahizong Israel mite ka piak tu ngam sungah na tum buatu hi,” ci hi.