Read Siyin Chin Thuhil kikna 33 Bible Online

Thuhil kikna 33 - Siyin Chin bible

Thuhil kikna 33

¹Hite sia Pathian ii teal pa Moses in a thi ma in Israel mite tungah a thansak thuphate ahi hi.

²Sinai Mual pan TOPA hong pai a; Edom ngam tungah ni bangin suak in, Paran Mual pan a mite tungah taang hi. Vantunglalangte tulsawm ama taw omkhawm a, a ziatsang khut taw meikuang khat toai hi.

³TOPA in a mite it a, ama ii neisa mite sungsia hi. Tua ahikom, eite a peang ah kunin ama thupiakte ih zui hi.

⁴Ih minam ii neisa a manphabel Moses ii hong piaksa thukham ih zui hi.

⁵Tua nam teng le a lampuite a kikaikhop ciang, TOPA sia ama ii Israel mite kumpi suak hi.

⁶Moses in Reuben nam huvau hi bangin ci hi: “A mite a tawm hangin Reuben nam mong ngei heak hen.

⁷Ama in Judah nam huvau hi bangin ci hi: “TOPA awng, amate ii hu hong ngetna aw ngai in; Nam dangte taw ngawm khawm kik in. TOPA awng, amate atu ngaldosak in. Tuaciang a ngalte ii a sim ciang amate hu in,” ci hi.

⁸Ama in Levi nam huvau hi bangin ci hi: “TOPA awng, nangma deina sia Urim le Thummim taw pualaak in. A thumaan na Levi naseamte tungtawnin pualaak in; Massah ah amate na ze et a Meribah tui ah amate ii a maanna thu na lak hi.

⁹Amate in nangma tungah a nute a pate, a suapui pate le a tate tung sangin a lian zaw thumaan na lak hi. Amate in na thupiakte ni in, na thuciam tungah thumaan uh hi.

¹⁰Amate in na thukham a zui thei natu in na mite hil tu hi; Na biaknatau tungah sangaw biakpiaknate pia tu uh hi.

¹¹TOPA awng, amate nam ii a thahat natu in hu in; A nasepna ah lungkim in. A ngalte theampo hualcip in; tuate tho kiksak ngei heak in,” ci hi.

¹²Ama in Benjamin nam huvau hi bangin ci hi: “Hite TOPA ii it le a kepcing nam ahi hi. Ama in sunkhuateakin amate cing a, tuaciang amate sungah ama teang hi,” ci hi.

¹³Ama in Joseph nam huvau hi bangin ci hi: “TOPA in a ngam a lei sia nguatui le leinuai tui taw thupha pia tahen.

¹⁴A ngam a lei in thupha nga hen a, ni taw a min thingngate le khuahun zui in a nga thingnga phabelte taw kidim tahen.

¹⁵A taanghtawng mualte sia deiteal thingngate taw kidim tahen.

¹⁶A ngam a lei sia napha theampo taw kidim hen a, Sawlpaang kuang sung pan a pau TOPA ii phatna taw thupha nga tahen. Hi thuphate Joseph ii nam tungah tung tahen, Banghang ziam cile ama sia a suapuipate sungah lampui ahi hi.

¹⁷Joseph in khuital khat ii thahatna nei a, Ngam khuital kiite nei hi. Ama kiite sia Manasseh mi a tul a tul le Ephraim mi tulsawmte ahi hi. Tuate taw minamte sii a, leimong dongah nawk hi,” ci hi.

¹⁸Ama in Zebulun le Issachar minamte huvau hi bangin ci hi: “Zelubun sia tuipi tungah sum vawtna taw nuamsa tahen a, Issachar ii hauna sia inn sungah khang tahen.

¹⁹Amate in a mual tungah ngamdang mite sam a, tualai ah a maan sangaw biakpiaknate pia hi. Amate in a hauna sia tuipi pan le tuipi hui sen panin nga uh hi,” ci hi.

²⁰Ama in Gad nam huvau hi bangin ci hi: “Amate ngam a zaisak pa Pathian pok vun. Gad in tawpi khat bangin a lu a baan khat balkeak tu in pang hi.

²¹Amate in amate atu in ngam phabelna mun la tu hi; Lampui khat ii tel amate kipia hi. Israel lampuite a kikaikhop tek ciang, amate in TOPA ii thupiakte le thukhamte zui uh hi,” ci hi.

²²Ama in Dan nam huvau hi bangin ci hi: “Dan sia tawpi no khat ahi hi; Ama sia Bashan panin leang hi,” ci hi.

²³Ama in Naphtali nam huvau hi bangin ci hi: “Naphtali sia TOPA ii maipha nga in nasia takin thupha kipia hi, A ngam sia Galilee tuili pan thangsang dong thengsuk hi,” ci hi.

²⁴Ama in Asher nam huvau hi bangin ci hi: “Asher sia nam dangte sangin thupha kipia zaw hi. Ama a suapuipate ii diksakbel hi hen a, a ngam olive kungte taw kidim tahen.

²⁵A khuate thik kongpite taw kidal hen a, Ngammuang in nungta tawntung tahen,” ci hi.

²⁶Israel mite awng, noma hong hu tu in meei tungah a to, a vaangletna taw van kaantan in a pai Noma ii Pathian taw a kibang pathian peuma om ngawl hi.

²⁷Pathian in note hong dal tawntung zo a; A tawntung a om ama ii khutte in no hong panpui hi. Ama in maisang na manaw kawkawmin na ngalte notkeak a, Amate a mon tu in no hong sawl hi.

²⁸Tuabangin Jacob suan le paalte van pan a taak daaitui ii a kawtsakna mun, an le sapittui taw a kidimna ngamah ngammuang thinnuam in teang uh hi.

²⁹Israel awng, bangza in lungdam nu ziam! TOPA ii a ngup note taw kibang minam khat zongh om ngawl hi. TOPA ama mama na lum le na namsau hi a, note hong dal tu le zawna hong pia tu ahi hi. Na ngalte in hesuak ngenin hong pai tu a, tuaciang amate na tuanhcil tu uh hi.