Read Siyin Chin Thuhil kikna 34 Bible Online

Thuhil kikna 34 - Siyin Chin bible

Thuhil kikna 34

¹Moses sia Moab zaangtam pan Nebo Mual, Jericho nisuana sang Pisgah Mual dawn ah paito a, tualai ah TOPA in ngam le lei buppi lak hi: Gilead ngam saksang Dan khua dong;

²Naphtali ngam bup, Ephraim le Manasseh ngam teng; Judah ngam nitumna sang ah Mediterranean tuipi dong;

³Judah ngamkhen thangsang; tuaciang Zoar zaangtam panin palm pona khuapi Jericho dong zaangtam teng lak hi.

⁴Tua zawkciang TOPA in Moses tungah, “Hi ngam le lei sia a suan a paalte tungah piak tu in Abraham, Isaac, le Jacob tungah ka kamciamsa ahi hi. Nang kong musak zo a, ahizong tua munah kong paisak buatu hi,” ci hi.

⁵Tua ahiciang TOPA ii naseampa Moses sia, TOPA ii a cisa bangin tua mun Moab ngam sungah thi hi.

⁶TOPA in Moses sia Bethpeor khua langkhat, Moab kuam sungah phum a, ahizong tuni dongin ama a kiphumna mun san tatak kuama in he ngawl hi.

⁷Moses sia kum za le kum kul a phak ciang thi a; a tha a ngal zongh a hat ngei za ma in hat lai in, a mit khua muna zongh pha lai hi.

⁸Israel mite Moab zaangtam ah ama atu in ni sawmthum sung khuangai in om uh hi.

⁹Nun tapa Joshua sia ciimna taw kidim hi, banghang ziam cile Moses in ama zalaih tu in koi zo hi. Israel mite in Joshua thu ni a, TOPA ii Moses tungtawnin a thupiakte zui uh hi.

¹⁰TOPA in ama taw maitang kisi in paupui hi. Moses bang ahi Israel mite sungah kamsaang khat zongh om ngeingawl hi;

¹¹TOPA in Moses sawlin Egypt kumpipa, a uliante tung le a ngamsung tengah nalamdang laknate le a lamdangte a vawt bangin a vawt ngei kamsaang dang om ngawl hi.

¹²Israel te theampo ii mit mu in Moses ii na lianpi le a lauhuai nate a vawt bangin a vawt thei kamsaang dang om ngawl hi.