Read Siyin Chin Thuhil kikna 4 Bible Online

Thuhil kikna 4 - Siyin Chin bible

Thuhil kikna 4

¹Tuaciang Moses in mipite tungah, “Kong hil thukham theampo zui vun, tua hile na nungta tu uh a, TOPA na taanghpupite ii Pathian ii note hong piak tu ngam na la tu uh hi.

²Ka thupiakte bangma belap heak vun a bangma vawk heak vun. Keima kong piaksa, TOPA na Pathian uh ii thu piakte zui vun.

³Peor Mual ah TOPA nasepte noma mama in na mu uh hi. Ama in tualai ah Baal a bia theampo mon a,

⁴ahizong TOPA na Pathian tungah a thumaan note tuni dongin nungta lai nu hi.

⁵“TOPA ka Pathian hong sawl bangin thukham theampo note kong hil zo hi. Na sim tu uh le na laak tu uh ngam ah hi thute zui vun.

⁶Thumaan takin zui vun, tua hile hisia in minam dangte tungah, na ciimna uh lak tu hi. Hi thukhamte theampo a zaak uh ciang, amate in, ‘Hi minam liante sia bangza in ciim a thu he zen ziam?’ ci tu uh hi.

⁷“Bang zata minam lian hikale TOPA ih Pathian ii ih kitaangsap sim hong nai bangin minam dangte in tuabangin a hu tu pathian khat nei tuan ngawl hi. Ama in hong hu tu in ih ko simin hong zo hi.

⁸Bangzata minam lian hikale kuama in tuni in kong hil thukhamte bangin a maan thukham nei ngawl tu hi.

⁹Na kihuukna in kidawm tavun! Na mit taw na mute na nuntak lai teng mangil peuma heak vun. Na tate le na tute tung na son tu thu khat sia

¹⁰Sinai mual ah TOPA na Pathian ii mai ah noma dingin na om uh ni in hong kison thu hi a, ama in kei tungah, ‘Mipite ka kungah hong khawm tavun. Leitung ah a nuntak laiteng in amate in kei thu hong nit thei natu, a tate tung zongh ah tuabang ma in a hilsawn thei natu in, amate ka son tu te za le ka oai hi,’ ci in hong son thu ahi hi.

¹¹“Meikhu vom bangin meisate le van ah meikuang lengto te taw a kituam, tua mualpeang ah pai in, na dindan uh khawngte, na tate tungah son tavun.

¹²Tua mei sung pan TOPA in hong paupui ciang, a paunate za a, ahizong ama lim le meal na mu ngawlna thu zongh son tavun.

¹³Ama in note taw thuciamna a vawt sia na kep natu in bang vawt hamtang tu nu ziam ci in hong son hi — tua in suangpheak nii tungah a at Thupiak Sawmte na zui hamtang tu uh ahi hi.

¹⁴Na sim tu le na laak tu uh ngam ah na zui tu thukham theampo a hil tu in TOPA in kei hong sawl hi.

¹⁵“Sinai Mual meikuang sung pan TOPA ii noma hong paupui lai in, a lim a meal na mu bua uh hi. Tua ahiciang noma phattuam natu in,

¹⁶bangbang lim khat pawpo — pasal ahibuale numei meal

¹⁷nganhing ahibuale vacim meal,

¹⁸awmtaal nganhing ahibuale ngasa meal bang milim vawtna taw na maw heak vun.

¹⁹Note in van ah na mu — ni, tha le aksi te bia tu in hong kitheam thaak ngawl natu uh kidawm tavun. Hite sia TOPA na Pathian in midangte theampo tungah a biak tu in pia zo hi.

²⁰Ahihang note sia Egypt meikhuk linghna sung pan hong suatak mite na hi uh hi. Tuni na dinmun ahi, ama mihing na sua thei natu uh in note hong pusuapui hi.

²¹Note hangin TOPA na Pathian sia kei tungah hong thin uuk a, ama ii note hong piak leipha ngam ah a tum tu in Jordan ngun kaantan ngawl tu ni hi ci in hong thiang son hi.

²²Kei hi lai ngam ah thi tu khi hi, ngun kaantan ngeingawl tu khi hi, ahizong note in na kaantan dek tak zo uh a, tua leipha ngam la tu in a pai tu na hi uh hi.

²³TOPA na Pathian ii note taw thuciam a vawt sia na mangil peuma heak vun. Noma mama in milim nam peuma na vawt ngawl tu in hong thupiak sia zui tavun,

²⁴banghang ziam cile TOPA na Pathian sia meikuang khat taw kibang a; a dem dangte dual ngawl hi.

²⁵“Tua ngam ah kum tam mama om in, tu le ta na nei uh ciang zong noma atu in bangbang milim khat pawpo vawtna taw na maw heak vun. Hisia in TOPA muna ah a sia hi a, ama thin uuksak tu hi.

²⁶Ka thu nong ni bua uh ahile hi ngam pan a mangthang pal tu na hina thu note langkhat ah ka tetti tu in tuni in vantung le leitung ka ko hi. Ngam na laak natu Jordan ngalkhat ah khuangei na nungta buatu uh hi. Note hong kimon siat tu hi.

²⁷Minam dangte sungah TOPA in hong thethaang tu a, no tawm bek na suakta tu uh hi.

²⁸Note in tualai ah mihingte khut taw a kivawt pathiante, thing le suang taw a kivawt pathiante, khuamu thei ngawl, khuaza thei ngawl, an ne thei ngawl, a nam za thei ngawl pathiante na na seam tu uh hi.

²⁹Tualai ah TOPA na Pathian na zong tu uh a, na thinsung theampo taw na zong uh le na mu tu uh hi.

³⁰Note ngim thuak in, tua thute no tung hong tun ciang, a khakbel in TOPA kungah na heak kik tu uh a, a thu na ni tu uh hi.

³¹Ama in hong hesuak thei Pathian ahi hi. Note hong nusia ngawl tu a, hong mon ngawl tu a, na taanghpupite taw a vawt thuciamna mangil ngawl tu hi.

³²“A bosa hunte, na sua ma hun le leitung ah Pathian ii mihing a piansakna thute kan kik vun. Leitung buppi ah kan vun. Hi bang na lian khat pawpo nidang in piang ngei na ziam? Hi bang thute akua in za ngei ziam?

³³Meikuang sung pan pathian ii pauna a zaak zawkciang no bangin, a nungta mihing om ngei na ziam?

³⁴TOPA na Pathian in Egypt ah note atu hong vawtsak bangin pathian khat pawpo in minam dangte khut sung pan la in ama mi sua ngam ngei na ziam? Ama in note mitmu in a hatna le a vaangletna hong kilanghsak a; natna le ngal thengsakin, nalamdang laknate le a lamdangte vawt a, a lauhuai nate piangsak hi.

³⁵Ama bek Pathian hi a, a dang a om ngawlna thu hi nate taw TOPA in hong lak vateak ahi hi.

³⁶Ama in thu hong hil thei natu in vantung pan a aw hong zasak a; hi leitung ah ama ii a thiangtho meikuang hong musak in, tua sia pan hong paupui hi.

³⁷Na taanghpupite a it manin note hong teal a, a vaangletna taw Egypt ngam pan hong pusuapui hi.

³⁸Tu ma zonghin noma neisa ahi, hi ngam sungah hong paipui natu le tua ngam noma hong piak natu in na mainawt kawkawm in ama in note sang a lianzaw le a thahat zaw minamte notkeak hi.

³⁹Tua ahiciang vantung le leitung ah TOPA sia Pathian a hina thu, tuni in phawk vun a, mangil heak vun: Pathian dang om ngawl hi.

⁴⁰Tuni in kong piaksa ama thukhamte theampo zui tavun, tua hile nangma le na suan na paalte theampo na nuamsa tu uh hi. TOPA na Pathian ii a tawntung na lua tu in hong piakna ngam ah na teang top tu uh hi,” ci hi.

⁴¹Tua zawkciang Moses in Jordan Ngun nisuana sangah khuapi thum koituam a,

⁴²tua te sia mihing khat in a ngal a hi ngawl khat a thatlum tha le ngammuangin a suatak thei natu khuapite ahi hi. Hi khuapite khat sungah tai thei tu a, ama kithat ngawl tu hi.

⁴³Reuben nam atu in senneal mual zaangtam tungah Bezer khuapi om a; Gad nam atu in Gilead ngam sungah Ramoth om a; tuaciang Manasseh nam atu in Bashan ngam ah Golan khuapi om hi.

⁴⁴Moses in Pathian thukham le a hilciannate Israel mite tungah pia hi.

⁴⁵Hi thukhamte sia Egypt pan a pusua zawk, Bethpeor khua ii langkhat Jordan ngun nisuana sang kuam ah a om lai in pia hi. Tua mun sia Heshbon khua a uk Amor Kumpipa Sihon ii ngam sungah om hi. Egypt pan a pusua zawkciang Moses le Israel mite in ama zo uh hi.

⁴⁶

⁴⁷Amate in ama ngam le Jordan ngam nisuana ah a teang Amor kumpi dangkhat ahi Bashan Kumpipa Og ii ngam teng laaksak hi.

⁴⁸Tua ngam sia Arnon Ngun hui ah a om Aroer khua pan saksang Sirion Mual ahi Hermon mual dong kipee hi.

⁴⁹Tuate sungah Jordan Ngun nisuana sang theampo, thangsang pan Tuipi Thi dong, le nisuana sang pan Pisgah Mualpeang dong kihel hi.