Read Siyin Chin Thuhil kikna 6 Bible Online

Thuhil kikna 6 - Siyin Chin bible

Thuhil kikna 6

¹“Hi thukham theampo note kong hil tu in TOPA na Pathian in thu hong pia hi. Note tumin na laak tu uh ngam sungah tua teng zui tavun.

²Tua ngam ah khuangeipi na teen thei natu uh in noma nuntak lai teng noma le na suan na paalte in TOPA na Pathian zakta in, kong piak a thukham theampo zui vun.

³Israel mihingte awng, tuate ngai in zui vun! Tuasia ciang na ma uh vang tu a, ih taanghpupite TOPA Pathian ii hong kamciamsa bangin a thahat minam lian na suak tu uh a, tua ngamnuam le lei phana munah na teang tu uh hi.

⁴“Israel awng hi thu ciamtee vun! TOPA — tuaciang TOPA bek — eite Pathian ahi hi.

⁵TOPA na Pathian sia na thin theampo, na thaa theampo le na thahatna theampo taw it vun.

⁶Tuni a kong piak hi thupiakte mangil ngei heak vun.

⁷Tua thupiakte na tate hil vun. Inn ah ahizong, a pua sang na paina ah ahizong, na tawlngak ciang le na nasep ciang ahizong tuate hil kik suut kik vun.

⁸Tuate hong phawksak kik tu in na baan ah khit vun a, na talki ah suang vun.

⁹Na innkha khuamte le na kongbiangte tungah at vun.

¹⁰“TOPA na Pathian in na taanghpupite ahi Abraham, Isaac le Jacob tungah a kamciam bangin ama in note ii saat ahi ngawl a lian a nuamsa khuapite a om ngam khat note hong pia tu hi.

¹¹A innte sia noma khol ngawl naphate taw kidim tu a, na taw ngawl uh tuikhukte om in, na ciin ngawl uh sapithuan le olive huante om tu hi. TOPA in hi ngam ah hong paipui ciang le na neak nop theampo na nei uh ciang,

¹²sila in na omna Egypt pan hong suatak TOPA mangil peuma heak vun.

¹³TOPA na Pathian zatak vawtin ama bek bia tavun a, ama min taw bekin kamciamnate vawt tavun.

¹⁴A dang pathiante le na kiim na paam ah a teang mite ii pathiante khat pawpo bia heak vun.

¹⁵A dang pathian na bia uh le na tungah Pathian thin uukna meikuang bangin hong theng tu a, hong lalcipsak tu hi, banghang ziam cile note taw a omkhawm TOPA na Pathian in a ma a demte dual ngawl hi.

¹⁶“Massah ah na ze et uh bangin TOPA na Pathian ze et heak vun.

¹⁷Ama ii hong piak thukham theampo pha takin zui vun.

¹⁸TOPA ii maan hi, pha hi, a ci teng seam vun, tua hile na ma uh vang tu hi. Na taanghpupite tungah TOPA ii a kamciamsa ngam phana sia na tang thei tu uh a,

¹⁹ama kamciam bangin na ngalte na notkeak tu uh hi.

²⁰“Mailam sangah na tate in, ‘Banghangin TOPA ih Pathian in hi thukhamte theampo zui tu in thu hong pia ziam?’ ci in hong dongh tu hi.

²¹Tuasia ciang amate tungah, ‘Eite sia Egypt kumpipa sila ih hi a, TOPA in ama ii vaangletna taw hong suatak hi.

²²Ama in nalamdang lakna te vawt a, Egypt te le a kumpipa, tuaciang a uliante theampo tungah a lauhuai nate a vawt sia ka mittang taw ka mu uh hi.

²³Ama in ka taanghpupite tungah a kamciam omsa bangin hi ngam hong pia tu le hi lai ah hong paipui tu le hi ngam lua tu in Egypt pan hong suatak hi.

²⁴Tua zawkciang TOPA ih Pathian in hi thukham theampo zui tu le ama zatak vawt natu in thu hong pia hi. Tuabangin ka vawt uh le ama in ih ngam hong cing tawntung tu a, hong nuamsasak tu hi.

²⁵Pathian ii hong thupiak theampo thumaan takin ih zui le ama eite tungah lungkim tu hi,’ ci in son tavun.