Read Siyin Chin Thuhil kikna 9 Bible Online

Thuhil kikna 9 - Siyin Chin bible

Thuhil kikna 9

¹“Israel mite awng, ngai vun! Tuni in Jordan Ngun na kaantan tu uh a, note sangin a lian zaw le a thahat zaw minamte neisa ngam le lei na la tu uh hi. Amate ii khuapite lian in, a luphungte van ban hi.

²Tua mihingte a tun saangin thahat a; a thatang lian a, kuama ii zaw zawk ngawl a ci sia na zaaksa uh ahi hi.

³Ahizong tu in TOPA na Pathian sia note mama in meikuang bangin na mai ah a pai na mu tu uh hi. Mainawtin na pai uh kawmin, ama hong kamciam bangin, na ngalte na nawkeak tu uh le, manlang takin na mot natu in tua mite hong zawsak tu hi.

⁴“TOPA na Pathian in note atu in amate a nawkeak zawkciang, note ii kilawm manin hi ngam nga tu in hong paipui hi ci heak vun. Note ii kilawm man hi ngawl a, hi mite a siat hu in no atu in TOPA in notkeak tu ahi hi.

⁵Na phatna le a maan na sepna uh hangin TOPA in amate ngam hong lasak tu hi ngawl hi. Hi mite seksolna hang le na taanghpupite Abraham, Isaac le Jacob tungah a kamciam a taangtutsak nop manin TOPA in amate notkeak tu hi.

⁶Note ii kilawm manin TOPA in hi ngampha hong pia ahi ngawlna thu telthiang vun. Tuabang hi ngawl hi, note sia mihing thinpuite na hi uh hi.

⁷“Sennealngam ah TOPA na Pathian na thin uuksaknate mangil ngei heak vun. Egypt na nusiat ni a kipan, hi lai na thet uh dong ama langpanin na leedo zo uh hi.

⁸Sinai Mual ah zongh TOPA a thin na uksak uh a — hong mot siat tu za dongin thin uuk hi.

⁹TOPA ii note taw thuciam a vawt sia a ki atna suangpheakte a saang tu in mual tungah ka kaato hi. Tualai ah sun sawmli le zan sawmli ka om a, an le tui ka ne bua hi.

¹⁰Tuaciang TOPA in ama ii khut taw ma a at suangpheak niite hong pia a, tuate sia mual tungah na kikhop uh ni in meikuang sung pan hong son thute ahi hi.

¹¹Hi hi, sun sawmli le zan sawmli zawkciang thuciam a atna suangpheak niite TOPA in keima hong pia hi.

¹²“Tua zawkciang TOPA in kei tungah, ‘Mualtung pan thakhatin tuaksuk in, banghang ziam cile Egypt pan na paipui na mihingte lalthaangin, a sia ngamta uh hi. A sep a vawt tu in ka thupiaknate pan amate lampial zo uh a, amate atu in milim khat vawt zo uh hi,’ hong ci hi.

¹³“TOPA in kei tungah, ‘Hi mihingte thin puizia ka he hi.

¹⁴Hong khaam heak in. Kuama ii a phawk nawn ngawl natu in amate lalcipsak tu ka sawm hi. Tuasia ciang amate sangin a lian zaw le a thahat zaw minam khat ii pa kong suaksak tu hi,’ hong ci lai hi.

¹⁵“Tua ahiciang thuciam ki atna suangpheakte nii toai in mualtung pan ka tuaksuk hi. Mualtung panin meikuang hong pai hi.

¹⁶TOPA na Pathian ii hong thupiak sia na zui ngawlna uh le leisung sumpiang khat taw khuitalno milim vawtin TOPA tungah na mawna uh kong mu hi.

¹⁷Tua ahikom, tua mun note mai ah suangpheakte nii lei denna in ka nei a, tamhthamsak khi hi.

¹⁸Tua zawkciang khatvei ma ni sawmli le zan sawmli sung, anne ngawl tuidawn ngawlin TOPA mai lei ah ka bok kik leleau hi. Tuabang ka hina sia TOPA tungah maw in a thin na uuksak uh hang ahi hi.

¹⁹Note hong lalcipsak tu za dongin a thinso ahikom TOPA ii thin uuk mama na sia ka kiita hi; ahizong khatvei ma TOPA in ka thu hong ngai kik hi.

²⁰TOPA sia Aaron tung zongh ah thalup tu za dongin thin uuk ahikom Aaron atu zonghin tua hun laitak ma in thu ka ngetsak hi.

²¹Note ii na vawt uh hong mawsak thil — leisung sumpiang taw na vawt uh khuitalno milim — la in mei sung denna ka nei hi. Tuaciang tua milim sia semneen in ka ngoaivui a, a vuite mualtung pan a luang suk lui sungah ka vawk hi.

²²“TOPA na Pathian sia Taberah, Massah, le Kibroth Hattaavah ah na om lai uh zonghin a thin na uksak uh hi.

²³Ama hong piak tu ngam sia a la tu in thupiaknate taw Kadesh Barnea pan hong paisak lai in, ama na langpan uh a; a thu um ngawlin na ni bua uh hi.

²⁴No kong heak pan kipan TOPA na langpan uh hi.

²⁵“Ama ii note mot tu a khensat sia he ka hikom, TOPA mai ah sun sawmli le zan sawmli sung lei ah ka bok hi.

²⁶Tuaciang keima in, ‘Vaanglianpipa TOPA awng, na thahatna le na vaangletna taw Egypt pan pusua in, na suatak sa na mite mon heak in.

²⁷Na naseam Abraham, Isaac le Jacob te phawk in a, hi mihingte ii thin puina, a seksolna le a mawnate awlmawk heak in.

²⁸Tuabang ahi buale amate tungah na kamciam omsa bangin na mite tua ngam ah thetpui zo ngawl hi, Egypt te in hong ci tu hi. Amate na ngaimawk manin na mite thalup tu in sennealngam ah paipui hi, hong ci tu hi.

²⁹Bangbang po ahitazong, hi mihingte sia nangma atu na tealsa te hi a, na vaangletna le na thahatna taw Egypt pan na pusuapui mihingte ahi hi,’ ci in thu ka ngen hi.