Read Siyin Chin John 11 Bible Online

John 11 - Siyin Chin bible

John 11

¹Bethany ah a teang Lazarus a kici pa a cina hi. Tua Bethany sia Mary le a suapuinu Martha ii teenna khua ahi hi.

²(Hi Mary sia Topa ii peang tungah sathau namtui buak a, a sam taw a nawlsak sia nu ahi hi. A cina Lazarus sia ama ii suapuipa ahi hi.)

³Unau numeite nii in Jesus tungah zasak a, “Topa awng, na it na lawmpa a cina hi,” ci uh hi.

⁴Jesus in a zaak ciangin, “Hi natna sia Lazarus ii thi natu natna hi ngawl hi; hi thu in Pathian minthan natu a piang hi a, tuaciang, tua tungtawnin Pathian Tapa ii minthanna a nga natu ahi hi,” ci hi.

⁵Martha, a suapuinu le Lazarus te sia Jesus in it hi.

⁶Tua hi napi Lazarus ii natna thu a zaak zawk zong, ama omna tua munah ni nii taam lai hi.

⁷Tua zawkciang a nungzuite munah, “Judea ngam ah pai kik tawng,” ci hi.

⁸A nungzuite in, “Syapa awng, tu nung hiat ma in, tua munah mihingte in suang taw hong deang nuam zo hi; pai kik sawm lai ni ziam?” ci in zo uh hi.

⁹Jesus in, “Ni khat sungin, nai sawm le nai nii om hi kana ngawl ziam? Tua ahikom, a kuama po suntangin a vak peuma in lutu ngawl hi, banghang ziam cile ama in hi leitung khuavak mu hi.

¹⁰Ahihang ama in zan in a vak le lutu tu hi, banghang ziam cile ama in khuavak nei ngawl hi,” ci hi.

¹¹Jesus in hi teng ci a, tua zawkciang, “Ih lawmpa Lazarus mutthip zo hi, ahihang pai in ka phong tu hi,” ci lai hi.

¹²Nungzuite in, “Topa awng, ama mutthip ahile a ciidam tu hi,” ci in zo uh hi.

¹³Jesus in Lazarus thi zo hi a cinopna ahihang amate in mut ngeina bang sia a son sa uh hi.

¹⁴Tua ahikom, Jesus in thiang takin, “Lazarus thi zo hi,

¹⁵ahihang, no atu ka ngaisut ciang, na up thei natu in, ama taw ka omkhop ngawl sia ka lungdam hi. Ama kungah ih pai tu hi,” ci hi.

¹⁶Thomas (Apeang cina) in, a nungzui puite munah, “Ama taw ih thi khop thei natu in Syapa taw pai tek tawng!” ci hi.

¹⁷Jesus hong thet ciang, Lazarus a kivui zawk ni li pha zo, ci in mu hi.

¹⁸Bethany sia Jerusalem panin kilometre 3 zongh a pha bua hi,

¹⁹tuaciangin, Judea mi tam mama Martha le Mary taw kimu tu in pai a, amate ii suapuipa thi hu in heeneam tu in pai uh hi.

²⁰Martha in Jesus hong pai hi ci in a zaak ciang, ama muak tu in pusuak hi, Mary ahile inn sungah om hi.

²¹Martha in Jesus munah, “Topa awng, hi sungah hong om hile te, ka suapuipa thi ngawl tu hi!” ci hi.

²²“Ahizong tu mama zongin, Pathian tungah na nget pawpo hong pia tu, ci in ka he hi,” ci hi.

²³Jesus in, “Na suapuipa sia nuntakna sungah tho tu hi,” ci hi.

²⁴Martha in, “Ni tawpkhak ni ciang ama nuntakna sungah tho tu hi, ci in ka he hi,” ci hi.

²⁵Tua nu munah Jesus in, “Keima in thawkikna le nuntakna ka hi hi. Kei hong um peuma a thi zongin a nungta tu hi;

²⁶tuaciang kei hong um a, a nungta theampo a thi ngei buatu hi. Hi thu na um ziam,” ci hi.

²⁷Ama in, “Um khi hi, Topa awng! Leitung ah hong pai tu, Pathian Tapa Messiah na hi sia hong um khi hi,” ci in zo hi.

²⁸Martha in hi teng a ci zawkciang heak kik in, a suapuinu Mary sam tuam hi. “Syapa hi sungah om hi, ama in nang hong kan hi,” ci in son hi.

²⁹Mary in hi thu a zaak ciang dingto a, ama taw kisi tu in manlang takin pai hi.

³⁰(Jesus khua sung hong theng ngawl lai a, Martha taw a kimuna munah om lai hi.)

³¹Mary heeneam a inn sung a omte in ama dingin manlang tak pusuak a mu uh ciang ama zui uh hi. Thaan ah a kap tu in pai tu hi vak ci in ngaisun uh hi.

³²Jesus omna ah Mary theng hi, ama a mu po ciangin, a peang ah bok hi. Ama in “Topa awng, hi sungah hong om hile te ka suapuipa thi ngawl tu hi!” ci hi.

³³Jesus in ama kakap a, ama taw a om mihingte zongh, kakap in a om mu hi; a thin hong suu a, khuangai mama hi.

³⁴“Ama koisungah phum nu ziam?” ci in dongh hi. Amate in “Topa awng, hong pai in hong en ta'n,” ci in zo uh hi.

³⁵Jesus kap hi.

³⁶Mihingte in, “En vun, bangza in ama it ziam!” ci uh hi.

³⁷Ahihang amate sung pan pawlkhat in, “Mittawpa zongh khuamusak hi ngawl ziam? Lazarus sia a thi natu pan keam thei ngawl ziam?” ci uh hi.

³⁸Jesus, khatvei ma hong khuangai kik mama a, suanghawng khat ii kongvang ah suangtum khat taw a kikhak thaan khat ah pai hi.

³⁹“A suang lakeak vun!” ci in Jesus in thupia hi. Mithipa suapuinu Martha in “Topa awng, uih zo tu hi. Ama a kiphum zawk ni li pha zo hi,” ci in zo hi.

⁴⁰Jesus in ama munah, “Na um le Pathian minthanna na mu tu hi ci in hong son hi ngawl khi ziam?” ci hi.

⁴¹Amate in suangtum lakeak uh hi. Jesus in khuadak to a, “Pa awng, ka thu nong ngai hu in lungdam kong ko hi.

⁴²Nong ngai tawntung hi, ci in kong he hi, ahizong tubangin ka ci sia hi sungah om mihingte atu in kei nong sawl ahi hunlam a up thei natu ka deina ahi hi,” ci hi.

⁴³Hi bang teng a ci zawkciang, awnging tatak taw au in, “Lazarus awng, hong pusuak ta'n!” ci hi.

⁴⁴Ama hong pusuak a, a khut le a peangte thaanpuan taw kituun in, a maitang puan khat taw kituam hi. “Phelsak vun, ama paisak vun,” ci in Jesus in sawl hi.

⁴⁵Mary kungah haw tu a pai mihing tam mama in Jesus vawt teng mu uh a, ama um uh hi.

⁴⁶Ahihang pawlkhat Phariseete kungah heak kikin, Jesus sep teng ko uh hi.

⁴⁷Tua ahikom Pharisee te le thiampi liante Council te taw kisitua in, “Bang law tu hi ziam? Hisia pa ii nalamdang lakna a vawt theampo en vun!

⁴⁸Hi bangin ama ih tha thong le, mihing theampo in ama um tu a, Rome thuneite in ih Biakinn le ih minam hong susia tu hi,” ci uh hi.

⁴⁹Amate sung pan tua kumin Thiampi Lianbel ahi Caiaphas kici sia in “Bang mawmawt nu ziam!

⁵⁰Minam bup ii lal tu taangin, pasal khat sia mihingte atu thi le note atu phazaw ahi hunlam phawk ngawl nu ziam?” ci hi.

⁵¹A tatak sia ama uuk thu taw, hi bangin pau ahi bua hi; tua taangin, ama tua kum sung Thiampi Lianbel ahi bangma, Jesus sia Jew mite atu in thi tu ci sia a sonkhol ahi zaw hi,

⁵²tuaciang, amate atu bek hi ngawlin, Pathian mihing a kithethaang theampo pumkhat suak tu in kaikhop natu zongh a sonkhol ahi hi.

⁵³Tua ni pan kipan Jew thuneite in Jesus a thalup natu, ngealnate nei uh hi.

⁵⁴Tua ahikom Jesus, Judea ngam ah a kilangh takin, khualhaw nawn ngawl hi, ahihang tua mun nusia a, sennealngam nai Ephraim a kici khua khat ah pai in, a nungzuite taw taam hi.

⁵⁵Paisan Poai hun hong nai a, poai hun ma in ngamsung pan mihing tam mama kithiansua zeksa vawt tu in, Jerusalem ah pai uh hi.

⁵⁶Amate in Jesus zawzong uh hi, tuaciang, Biakinnpi sungah a kikhoptua uh laitakin khat le khat, “Bang na ngaisun uh ziam? Poai sungah hong pai ngawl het tu hi ngawl ziam?” ci in kidongh uh hi.

⁵⁷Thiampi liante le Phariseete in Jesus a kimat thei natu in ama omna a he a om le thu hong puak nanak tu nu hi, ci in thupia uh hi.