Read Siyin Chin John 12 Bible Online

John 12 - Siyin Chin bible

John 12

¹Paisan Poai tu ni luk a kisap ciangin, Bethany ah Jesus pai a, thina pan a thawsak Lazarus ii inn ah tung hi.

²Amate in ama atu nitak an tua munah huansak uh hi. Martha in an piak hu hi; Lazarus sia Jesus taw sabuai kiim ah a tokhawmte sungah a kihel khat hi.

³Tua zawkciang Mary in a manham mama nard sathau namtui litre lang hong paipui a, Jesus peang tungah buakin, a sam taw nawlsak hi. Sathau namtui in inn sung bup zel hi.

⁴Jesus nungzuite khat ahi Judas Iscariot — ama a leeheak tu pa — in,

⁵“Banghangin sathau namtui sia ngunn dangka zathum taw zuakin mizawngte kipia ngawl ziam?” ci in dongh hi.

⁶Ama ii hi bang a paute sia a zawngte awlmaw takpi hi ngawl a, ngutapa khat ahihang ahi hi. Ama in sum ip keam a, sumte ama atu in a la ku tawntung pa ahi hi.

⁷Ahihang Jesus in, “Ama koi po vun! Ka kiphum ni ciang atu in, ama ii neisunte keamsak po vun.

⁸Mizawngte sia no taw hong omkhawm tawntung tu hi, ahihang kei sia no taw hong omkhawm tawntung ngawl tu khi hi,” ci hi.

⁹Bethany ah Jesus om hi ci in a za mihing tam mama te in tua munah hong pai uh sia Jesus hang bek zongh hi ngawlin, thina pan Jesus ii a thawsak Lazarus mu nuam a, hong pai ahi uh hi.

¹⁰Tua ahikom thiampi liante in Lazarus zongh thalup natu vaihawmna nei uh hi,

¹¹banghang ziam cile ama tung thupiang hu in Jew mi tam mama te in amate nial a, Jesus um uh hi.

¹²A zing ciangin Paisan Poai siim tu in hong pai mihonpi in, Jerusalem khua ah Jesus hong pai natu thu za uh hi.

¹³Tua ahikom amate in palm thingbaakte la in, ama muak tu in pai uh a, “Pathian pok vun! Topa min taw hong paipa, Pathian in thupha pia tahen! Pathian in Israel Kumpipa thupha pia tahen!” ci in au uh hi.

¹⁴Jesus in laa khat mu in a tungah to hi, laithiangtho in hi bangin a at sia a taangtun natu ahi hi.

¹⁵“Zion khuapi awng lau heak in! Hi sungah na kumpipa hong pai a, laano tungah to hi.”

¹⁶A nungzuite in hi thu sia tua hun laitakin a tel bua uh hi; ahihang Jesus minthanna sungah a thawtosak ciangin, laithiangtho in ama huvau, hi bangin at a, amate in hi bangin ama atu in vawt hi, ci sia phawk kik uh hi.

¹⁷Lazarus thaan sung pan sam a, thina pan a thawsak lai in, Jesus taw a omkhawm mihingte in bang thu piang ci thu kiko tek uh hi.

¹⁸Tuasia hu in mihon in ama muak uh hi — banghang ziam cile hi nalamdang a vawt sia amate in za zo uh hi.

¹⁹Phariseete in khat le khat, “Na mu bang hi, eite in ih zo zo peuma bua hi! En vun, leitung bup in ama zui zo hi!” ci uh hi.

²⁰Jerusalem ah poai sung teng biakpiakna nei tu in a paite sungah Greek te pawlkhat om hi.

²¹Amate in Philip (Galilee ngam Bethsaida khua mi) kungah pai in, “Syapa awng, ko Jesus mu nuam khu hi,” ci uh hi.

²²Philip pai in Andrew kungah a son zawkciang, a nii in pai a Jesus munah son uh hi.

²³Jesus in, “Tu in Mihing Tapa ii a lian minthanna a saan tu hun hong tung zo hi.

²⁴A tatakin kong ci hi: zungtaang tang khat lei ah taak a, a thi phot buale tang khat nguak hi top hi. A thi le a tang tam piangsak hi.

²⁵A kuama po ama ii nuntakna a it sia in taan tu hi; ama ii nuntakna hi leitung ah a ngaimaw peuma in, tawntung nuntakna a keam ahi tu hi.

²⁶Ka naseampa sia keima omna po ah, keima taw a om thei natu in, kei atu hong sepsak nuam peuma in kei hong zui kul tu hi. Tuaciang kei atu a seam khat pawpo sia ka Pa in patoai tu hi.

²⁷“Tu in ka thinngim hi — tua hi a, bang son tu khi ziam? ‘Pa awng, hi hun sia kei tungah hong tungsak heak in,’ ci tu khi ziam? Ahihang kong paina thu in hi thuakna hun a nawk tu ma in hong pai ka hi hi.

²⁸Pa awng, nangma min thangsak in!” ci hi. Tuaciang vantung pan aw nging khat in, “Minthangsak zo khi hi, tuaciang in minthangsak lai tu khi hi,” ci hi.

²⁹Tua munah a ding mihonte in tua awnging za a, amate sung pan pawlkhat in vanto hi ci a, a dangte in, “Vantunglalang khat in ama paupui hi!” ci uh hi.

³⁰Ahihang Jesus in, “Hi aw sia kei atu hi ngawlin no atu in hong nging ahi hi.

³¹Tu hun sia hi leitung ii thukhen thuak tu hun ahi hi; tu in hi leitung a ukpa kisuanthal tu hi.

³²Leitung pan hong kilapto ciangin mihing theampo ka kungah ka kai tu hi,” ci hi.

³³(Hi bangin a pau sia ama thuak tu thina zia a sonna ahi hi.)

³⁴Mihonpi in “Ih Thukham in Messiah nungta tawntung tu in hong son hi. Tua ahile bangbangin Mihing Tapa kilaamto tu hi, ci thei ni ziam? Hi Mihing Tapa sia akua ziam?” ci uh hi.

³⁵Jesus in zo kik a, “Khuavak sia no sungah tawmvei hong om lai tu hi. Khuazing sia no tungah hong thet man ngawl natu in, khuavak na nei uh laitakin, na paina lampi ah paisuak tavun; banghang ziam cile khuazing sungah a pai khat in a zot natu mun a he bua hi.

³⁶Tuaciang khuavak na nei uh laitak, khuavak ii mihingte na sua natu in, khuavak na um vun,” ci hi. Jesus in hi teng a ci zawkciang amate paisan in kiheam hi.

³⁷Nalamdang lakna hi zata amate mai ah vawt zo hi napi amate in ama a um bua uh hi,

³⁸Tua in kamsaangpa Isaiah ii sonna teng a tun natu ahi hi: “Topa awng, ko ii son thu sia akua in um na ziam? Topa in a kuate tungah a vaangletna pualaak ziam?”

³⁹Tua ahikom amate in um zo ngawl hi, banghang ziam cile Isaiah in hi bangin ci lai hi,

⁴⁰“Pathian in amate ii mit tawsak a, a thinsung khacipsak hi, tua in, a mit khua a mu ngawl natu, a thinsung taw a tel ngawl natu, tuaciang amate in keima ii amate ka damsak natu kei kungah hong heak kik ngawl natu, ahi hi, Pathian in ci hi.”

⁴¹Isaiah ii hi bangin a ci sia Jesus ii vaangletna mu a, ama huvau a son hang ahi hi.

⁴²Tua zawk ciang ngawngawnin Jew thuneite tam mama in Jesus um uh hi; ahihang Phariseete ii synagogue pan amate a hawlkeak ngawl natu in, a kilangh taakin a upna thu a son ngam bua uh hi.

⁴³Amate in, Pathian ii lungkimna sangin, mihingte lungkimna dei zaw uh hi.

⁴⁴Jesus in awnging takin, “A kuama po kei hong umte in kei bek hong um hi ngawl a, kei hong sawlpa zongh um ahi hi.

⁴⁵A kuama po kei hong mu te in kei hong sawlpa zongh a mu ahi hi.

⁴⁶Kei hong um peuma khuazing sungah a omcip ngawl natu in leitung ah khuavak bangin kong pai zo hi.

⁴⁷Kong thupuak sia za napi a ni ngawlte tungah thu ka khen buatu hi. Leitung ngum tu in kong pai a, a tungah thukhen tu in kong pai bua hi.

⁴⁸Kei hong nial a, kong thupuak a saang ngawl peuma ama tungah thukhen tu khat a nei hi. Ka pau sa kammal te in ni tawpkhak ni ciangin ama ii thukhenpa hi tu hi!

⁴⁹Hi thu in thumaan hi, banghang ziam cile keima aituam thuneina taw ka pau bua hi, ahihang kei hong sawl Pa in ka son tu le ka pau tu thu hong pia hi.

⁵⁰Tuaciangin ama ii thupiakna in tawntung nuntakna hong puak hunlam ka he hi. Tua ahiciang ka thuson teng sia Pa ii son a hong sawl teng ahi hi,” ci hi.