Read Siyin Chin John 14 Bible Online

John 14 - Siyin Chin bible

John 14

¹Jesus in, “Thinngim in thin kiam heak vun,” ci hi. “Pathian um vun a, kei zongh hong um tavun.

²Ka Pa inn sungah inndoi tuam tam mama om hi, no atu omna pua khol tu in, ka na pai tu hi. Tuabang hi buale hi bangin kong son buatu hi.

³No atu pai in, omna ka pua khol zawkciang kong heak kik tu a, keima omna ah na om thei natu in ka kungah kong la tu hi.

⁴Ka pai natu mun hong then thei lampi sia na he uh hi,” ci hi.

⁵Thomas in, “Topa awng, koisung zuan tu ni ziam ci in hong he ngawl khu hi; tua ahiciang tua mun thet thei natu lampi sia koibangin he thei tu khu ziam?” ci in dongh hi.

⁶Jesus in, “Keima in lampi ka hi hi, thumaan thutak ka hi hi, nuntakna ka hi hi; kei taw ngawlin kuama in Pa kung a theng buatu hi.

⁷Tu in kei hong he zo na hi uh ciang, ka Pa zongh na he tu uh hi, tuaciang tu pan kipan ama na he uh a, na mu zo uh hi,” ci hi.

⁸Philip in, “Topa awng, Pa hong lak ta'n; tuasia ka kisap uh a vekpi hi,” ci hi.

⁹Jesus in, “No teng taw khuangei mama hong omkhawm zo khi hi; tua hi napi Philip awng, hong he ngawl lai ni ziam? Kei hong mu po in Pa a mu zo hi. Tua ahile banghangin ‘Ko, Pa hong lak tan’ ci ni ziam?

¹⁰Philip awng, Pa sungah kei ka om a, kei sungah Pa a om hunlam um ngawl ni ziam?” ci hi. Tua zawkciang Jesus in a nungzuite munah, “No tung a kong son kammalte keima sung pan hong pusuak ahi bua hi. Ka sungah a om Pa in ama nasep seam ahi hi.

¹¹Pa sungah kei ka om a, kei sungah Pa a om hi kong ci ciangin, hong um tavun. Tua ahibuale zong ka sep ka vawtte hangin kei hong um tavun.

¹²A maan takin kong ci hi; kei hong um peuma in, ka vawt teng a vawt tu hi — hi hi, a thupi zaw zongh vawt tu hi, banghang ziam cile kei Pa kung ka zuan tu hi.

¹³Tuaciangin keima min suang a nong nget pawpo, Tapa tungtawnin Pa minthan natu in kong vawtsak tu hi.

¹⁴Na khat pawpo kei min suangin nong ngen uh le kong vawtsak tu hi.

¹⁵“Nong it uh le ka thupiakte na ni tu uh hi.

¹⁶Pa munah ka ngen tu a, ama in Hupa a dangkhat hong pia tu hi, ama in no taw a tawntungin hong omkhawm tu hi.

¹⁷Ama in Pathian ii thumaan thutak hong pualaak Thaa ahi hi. Leitung in ama saang thei ngawl hi, banghang ziam cile ama mu thei ngawl a, he ngawl hi. Ahihang no in ama na he uh hi, banghang ziam cile ama note taw omkhawm in, note sungah hong om hi.

¹⁸“Ka pai ciangin, no nguak kong nusia buatu hi; note kungah kong heak kik tu hi.

¹⁹Tawmvei zawkciangin, leitung in kei hong mu nawn ngawl tu hi, ahizong note in nong mu tu uh hi; tuaciang keima nungta ka hikom no zongh na nungta tu uh hi.

²⁰Tua ni hong thet ciang, kei Pa sungah om a, no sungah kei ka om bangma in, kei sungah no na om uh hunlam na he tu uh hi.

²¹“A kuama po ka thupiakte saangin, thu a nite sia kei hong it ahi hi. Ka Pa in kei hong it pawpo a it tu hi; kei zongh in ama ka it tu a, ama tungah keima le keima ka kilaak tu hi,” ci hi.

²²Judas (Judas Iscariot ahi ngawl sia) in, “Topa awng, bangbangin leitung ah kilaak ngawlin ko kungah hong kilaak tuam thei tu ni ziam?” ci hi.

²³Jesus in, “A kuama po kei hong it sia in ka hilcianna a zui tu hi. Ka Pa in tua pa it tu a, ka Pa le keima in ama kungah pai in, ama taw ka teang tu uh hi.

²⁴A kuama po kei hong it ngawl sia in ka hilcianna a zui buatu hi. Na zaaksa uh hi hilcianna sia kei aa hi ngawl a, kei hong sawlpa Pa kung pan hong pai ahi hi.

²⁵“No taw kong omkhop lai ma in, hi thu hong son zo khi hi.

²⁶Pa ii keima min taw hong paisak tu Thaa Thiangtho ahi Hupa in na theampo hong hil tu a, kong son teng zongh hong phawk kiksak tu hi.

²⁷“Thinnopna kong nusiat hi; keima aituam neisa thinnopna kong pia hi. Leitung ii piak bangin kong pia bua hi. Thinngim in thinkiam heak vun; lau heak vun.

²⁸‘Hong nusia tu khi hi, ahihang no kung hong pai kik tu khi hi, ka ci sia na za zo uh hi.’ Nong it uh le Pa kung ka zot tu sia na lungdam tu uh hi; banghang ziam cile ama kei sangin lianzaw hi.

²⁹Hite theampo a pian ma tu laitakin hong sonkhol zo khi hi, hong pian takpi ciangin, na up thei natu uh ahi hi.

³⁰No taw hun sauzaw thuson thei nawn ngawl tu khi hi, banghang ziam cile hi leitung a ukpa hong pai hi. Ama in kei tungah bangma vaang hong nei bua hi,

³¹ahihang Pa ka itna sia, leitung in a heak kul tu hi; tua hu in ama ii thu hong piak babangin, na theampo ka vawt hi. “Hong pai tavun, hi mun panin pai tawng.