Read Siyin Chin John 16 Bible Online

John 16 - Siyin Chin bible

John 16

¹“Na upna uh na thasua ngawl natu in, hi teng hong son khi hi.

²Note synagogue pan hong kihawlkhia tu a, tuaciang note hong thatlum khat po in tuabang a ngamtat sia Pathian atu naseam in a kingaisut hun hong theng tu hi.

³Mihingte in note tungah hi bang a ngamtat natu te sia amate in Pa ahizong kei ka hizong hong heak ngawl hang ahi hi.

⁴Ahihang hi bang kong sonna in, amate atu in hite a sep tu hun hong thet ciang kong sonsa teng na phaw thei natu uh ahi hi. “A kipatciil in hite kong son bua hi, banghang ziam cile keima in note taw ka omkhawm hi.

⁵Ahihang tu in hong sawlpa kung zuan tu khi hi, tua hi napi kuama in ka pai natu mun nong dongh bua uh hi.

⁶Tuaciang tu in hi thu kong son zawkciang na thinsung uh heena taw kidim hi.

⁷Ahihang thumaan thutak hong son khi hi: kei pai leng no atu phazaw hi, banghang ziam cile kei ka pai buale Hupa note kungah hong pai ngawl tu hi. Ahihang kei ka pai le ama no kungah kong paisak tu hi.

⁸Tuaciangin ama hong pai ciangin, mawna thu, a maan thu le Pathian thukhenna huvau a ngaisutna uhte maan ngawl hi ci in leitung mihingte tungah kilanghsak tu hi.

⁹Amate in mawna huvau ngaisun khial hi, banghang ziam cile amate in kei hong um ngawl hi.

¹⁰Amate in a maan thu zongh ngaisun khial hi, banghang ziam cile kei Pa kung ka zuan tu a, note in nong mu nawn buatu uh hi;

¹¹tuaciang amate in, thukhenna thu telkhial hi, banghang ziam cile hi leitung a ukpa tungah thu kikhen zo hi.

¹²“Thu son tu tam ma ka nei lai hi, ahihang tu laitak ahile note thuciin tu in tam lei tu hi.

¹³Ahizong Thaa hong pai ciangin, Pathian thumaan thutak hong pualaak pa in thumaan thutak theampo sungah lam hong pui tu hi. Ama in ama aituam thuneina taw hong son ngawl tu hi, ahizong ama zaak teng hong son tu a, hong piang tu thute hong son tu hi.

¹⁴Ama in kei minthanna hong pia tu hi, banghang ziam cile ka sonte la tu a, tua teng note tungah hong son tu hi.

¹⁵Ka Pa ii neisa theampo keima neisa hi; tua hu in Thaa in ka piakte la in no tungah hong son tu hi,” kong ci hi.

¹⁶“Tawmvei no sungin kei nong mu nawn buatu uh a, tuaciang tawmvei zawkciangin nong mu tu uh hi,” ci hi.

¹⁷A nungzuite pawlkhat in amate sungah kidongh uh a, “Bang ci nuam hi tu ziam? Tawmvei sung eite in ama mu nawn ngawl tu a, tawmvei zawkciang ih mu tu hi; tuaciang ama in, ‘Banghang ziam cile Pa kungah ka pai tu hi’ ci si hi.

¹⁸‘Tawmvei sung’ a ci sia bang a cinopna ziam? Ama in bang thu teng son ci sia ih he bua hi!” ci uh hi.

¹⁹Jesus in ama thu dongh nuam ahi sia tel ahikom amate tungah, “ ‘Tawmvei sungin nong mu buatu uh a, tuaciang tawmvei zawkciangin nong mu tu uh hi,’ hong ci khi hi. Noma sung a na kidok thu in tu sia ahi ziam?

²⁰A tatakin kong ci hi: note au in kap tu nu hi, ahihang leitung lungdam tu hi; note hee tu nu hi, ahihang na heena uh sia lungdamna hong suak tu hi.

²¹Numei khat nau a sua tu ciangin, hee hi, banghang ziam cile a ngim natu hun hong theng ahi hi; ahihang nau hong sua ciang ama in a ngimna teng mangil hi, banghang ziam cile leitung ah nausen khat hong suak ahi hu in, ama lungdam hi.

²²Tuasia bangma na hi tu uh hi: tu in hee nu hi, ahizong kei in note kong mu kik tu a, na thinsung uh lungdamna taw kidim tu hi, tua lungdamna in kuama ii hong laaksak thei ngawlte ahi hi.

²³“Tua ni hong thet ciangin, kei tungah bangma nong ngen buatu uh hi. A maan tatak kong ci hi: Pa in kei min suangin na nget pawpo hong pia tu hi.

²⁴Tuciang dong kei min suangin, bangma na ngen bualai uh hi; na lungdamna uh a pawlcin thei natu in, ngen vun na nga tu uh hi.

²⁵“Sonteena kammalte zangh in, hi thute kong son zo hi. Ahihang sonteena kammalte zangh ngawlin, Pa ii thu thiang takin kong son tu hun hong theng tu hi.

²⁶Tua ni hong thet ciangin kei min suangin na ngen tu uh hi; tuaciang no luangin kong ngetsak tu hi kong ci bua hi,

²⁷banghang ziam cile Pa, ama mama in note hong it hi. Ama in banghang note hong it ziam cile noma in kei nong it uh a, tuaciang Pathian kung pan hong pai ka hi sia nong um uh hi.

²⁸Pa kung panin kong pai takpi a, leitung ah kong pai zo hi; tu in leitung nusia in, Pa kungah ka pai tu hi,” ci hi.

²⁹Tuasia ciang nungzuite in, “Tu ahile sonteena kamte zangh ngawlin a thiangin na son hi.

³⁰Na theampo na heak sia tu in kong he uh hi; kuama ii thu hong dok tu na kulsak bua hi. Hi thu in Pathian kung pan nong paina hong umsak hi,” ci uh hi.

³¹Jesus in, “Tu in na um uh ziam?

³²Note theampo kithethaang in, na inn tek zuanin, kei nguak nong nusiat tu uh hun hong theng tu hi, hi sung hong theng zo hi. Ahihang keima nguak ka hi bua hi, banghang ziam cile Pa in kei taw omkhawm hi.

³³Kei taw ih kikopna hangin thinnopna na nga natu hi thu kong sonsa hi. Leitung in ngim le kham hong thuaksak tu hi. Ahihang na thin uh liansak vun! Leitung ka zo zo hi,” ci in zo hi.