Read Siyin Chin John 17 Bible Online

John 17 - Siyin Chin bible

John 17

¹Jesus in hi teng a son zawkciang van ento in, “Pa awng, a hun hong theng zo hi. Tapa in nang tungah minthanna hong piak thei natu in, na Tapa tungah minthanna hong pia ta'n.

²Banghang ziam cile ama tungah na piaksa mi teng tawntung nuntakna a piak thei natu in, mihing theampo tungah thuneina ama tungah na pia zo hi.

³Tuaciang in tawntung nuntakna ci sia in nangma bek Pathian a maan ahi sia heakna le na sawlpa Jesus Christ heakna ahi hi.

⁴Na minthanna leitung ah ka lak zo hi; sep tu a nong piak nasep sia ka man zo hi.

⁵Pa awng! simlei pian ma a nangma taw a kibangin ih nei khop tua minthanna sia, tu in na mai ah kei hong pia ta'n.

⁶“Leitung pan a nong piaksa mite kungah nangma kong hesak zo hi. Amate nangma neisa hi a, amate kei nong pia zo hi. Amate in na kammal hong ni hi,

⁷tuaciang tu in, nong piaksa theampo nangma kung pan hong pai hi ci in amate in he uh hi.

⁸Nong piak thu teng amate tungah ka pia a, amate in saang uh hi; amate in keima nang kung pan hong pai ka hi sia maan hi ci in he uh hi, tuaciangin nong sawl ka hi hunlam um uh hi.

⁹“Amate atu in, thu kong ngen hi. Leitung atu thu ka ngen bua hi, nangma neisa ahi nong piakte atu in kong ngen hi.

¹⁰Keima neisa theampo nangma aa hi a, nang neisa theampo keima aa ahi hi; ka minthanna amate tungtawnin kilak hi.

¹¹Tu in kei nangma kung kong zuan hi; leitung ah kei ka om nawn bua a, ahihang amate leitung ah om hi. A Thiangtho Pa awng! Nang le kei khat ih hi bangma in, amate pumkhat ahithei natu in, nong piaksa min ahi na min vaanglian taw amate keamcing ta in.

¹²Amate taw ka omkhop lai in, nong piaksa min ahi na min vaanglian taw, amate ka keamcing zo hi, laithiangtho a tun thei natu, a mangthang tu in a kilaitan sa khat simngawl amate ka keam a, ka bosua bua hi.

¹³Tu in nang kungah kong zuan a, hi bang teng leitung ah ka sonna sia in a thinsung uh ah ka lungdamna a cingin a nei thei natu ahi hi.

¹⁴Na thupuak amate ka pia a, tuasia ciang leitung in amate ensan hi, banghang ziam cile keima leitung ii neisa ka hi ngawl bangma, amate leitung ii neisa ahi bua hi.

¹⁵Hi leitung panin amate na laak natu in, kong ngen bua hi, ahihang Ngilo Pa khut sung pan na kepcing natu in kong ngen hi.

¹⁶Keima leitung ii neisa ka hi ngawl bangma in, amate leitung ii neisa ahi bua uh hi.

¹⁷Thumaan thutak taw nangma atu in amate na keam tuam in; na kammal in thumaan thutak hi.

¹⁸Nangma in leitung ah kei nong sawl bangma in, amate leitung ah ka sawl hi.

¹⁹Amate zongh maan tak a, nang tungah hong ki aap thei natu, amate atu ka ngaisutsakna in, keima le keima nang tungah kong ki aap hi.

²⁰“Amate atu bek ngen ngawlin, amate ii thupuak hangin, kei hong um teng atu zongh kong ngen hi.

²¹Amate a vekpi in pumkhat ahithei natu in kong ngen hi. Pa awng! Nangma in keima sungah nong om a, keima in nangma sungah kong om bangma in, amate in eima sungah hong om tahen. Leitung in nong sawl ka hi hunlam hong up natu amate pumkhat suak thei tahen.

²²Nang le kei pumkhat ih hi bangma, amate pumkhat ahithei natu in, kei nong piak minthanna sia ma amate ka pia hi:

²³Leitung in nong sawlna thu le, keima nong it bangma amate na itna thu a heak thei natu, amate pumkhat a sua bup thei natu in, keima in amate sungah om in, nangma in keima sungah nong om hi.

²⁴“Pa awng! Amate nong piaksa hi a, nong piaksa ka minthanna sia a mu thei natu in, ka omna munah hong om tek tu ka dei hi; banghang ziam cile, simlei a kipiansak ma in, nong it zo hi.

²⁵Thumaan thutang Pa awng! Leitung in nang hong he bua hi, ahihang keima in kong he hi, tuaciang hite in nong sawl ahi hunlam he uh hi.

²⁶Kei nong itna amate sungah a om thei natu le amate sungah kei zongh ka om thei natu in, nang sia amate in ka hesak zo a, tuabang ma in ka seam suak lai tu hi,” ci hi.