Read Siyin Chin John 18 Bible Online

John 18 - Siyin Chin bible

John 18

¹Jesus in hi thungetna teng a nget zawkciang a nungzuite taw Kidron luam a kici sia kaantan in pai hi. Tua munah huan khat om hi. Jesus le a nungzuite huan sungah tum uh hi.

²Leeheakpa Judas in hi huan ii omna he hi, banghang ziam cile, Jesus in a nungzuite taw tamvei mama tua munah kisi ngei zo uh hi.

³Tua ahikom Judas in huan sungah pai a, Rome ngalkap honkhat Thiampi liante le Phariseete ii sawl biakinn cing pawlkhat keng hi, amate ngalhiam toai a, meiinn le meila lom keng uh hi.

⁴Jesus in ama tungah a piang tu na theampo he ahikom ama, mai ah pai in, “Na zon uh sia akua ziam?,” ci in dongh hi.

⁵“Nazareth khua mi Jesus hi,” ci in amate in zo uh hi. “Keima khi hi,” ama in ci hi. Leeheakpa Judas sia amate taw tua munah ding hi.

⁶Jesus in, “Keima khi hi,” a ci ciangin, amate nungkin uh a, lei ah puk uh hi.

⁷Jesus in khatvei ma, “Na zon uh sia akua ziam?” ci in dongh hi. Amate in, “Nazareth khua mi Jesus hi,” ci uh hi.

⁸Jesus in “Keima khi hi, kong ci zo hi. Kei hong zong na hi uh le hi a dang teng ciasak vun,” ci hi.

⁹(“Pa awng, nong piak sate khat zongh ka bo sua bua hi,” a ci teng a taangtun thei natu in hi bang teng ci ahi hi.)

¹⁰Namsau khat a nei Simon Peter in a namsau dokin, Thiampi Lianbelpa ii silapa bil ziatsang satansak hi. Tua silapa ii min Malchus ahi hi.

¹¹Jesus in Peter munah, “Na namsau a pai sungah thun kik in! Ka Pa ii ka dawn tu a hong piak thuakna hai sia, dawn ngawl tu in hong um ni ziam?” ci hi.

¹²Tua zawkciang Rome ngalkapte, ngalkap hon ukpa le Jew biakinn cingte in Jesus man uh a, khaukhii in,

¹³Annas kungah paipui masa uh hi. Ama sia tua kum a Thiampi Lianbel ahi Caiaphas ii sunghpa ahi hi.

¹⁴Mihing theampo atu in mihing khat thi le phazaw hi ci in Jew thuneite tungah ngaisutna a pia pa sia Caiaphas ahi hi.

¹⁵Simon Peter le a dang nungzui khat in Jesus zui uh hi. Tua nungzui dang khat sia in Thiampi Lianbelpa ii heak mama pa hi a, tua ahikom ama in Jesus taw Thiampi Lianbelpa huang sung dong pai hi,

¹⁶tua laitakin Peter kongpi puasia ah om hi. Tuaciang nungzui dangkhat sia pusuak kik a, kongpi ah a om numei sia a paupui zawkciang Peter tumpui hi.

¹⁷Kongpi a om numei sia in Peter munah, “Nang zongh ziasia pa ii nungzui khat hi kana ngawl ni ziam,” ci hi. “Kei ka hi bua hi,” Peter in ci hi.

¹⁸Khuasik ahikom silate le biakinn cingte in meihol thut in, a kiim ah mei oai in ding uh hi. Tua ahikom Peter zongh pai in amate taw dingin mei oai khawm hi.

¹⁹Thiampi Lianbelpa in Jesus munah a nungzuite thu le ama ii hilcianna huvau thu dongh hi.

²⁰“Mihingte mai ah ka sonsa hi; ka hilcianna theampo sia mihing theampo hong paina mun synagogue te le Biakinnpi sungah kivawt hi. A thimtham in bangma ka son ngei bua hi.

²¹Tua hikasap banghangin, thu hong dongh ni ziam? Ka pau hong zate dongh ta'n. Ka son thute amate munah dongh ta'n — amate in ka son thu teng he uh hi,” ci in Jesus in zo hi.

²²Jesus in hi bangin a ci ciang, tua munah biakinn cingte khat in Jesus beang a, “Bangbangin Thiampi Lianbelpa tungah tubangin pau ngam ni ziam!” ci hi.

²³“Pau khial nei ka hile hi sungah omte theampo munah ka pau khialna son in. Ahihang ka pauna sia a maan thu ahile banghangin hong vua ni ziam?” ci in Jesus in zo hi.

²⁴Tuasia ciang Annas in Jesus heencip sa ma in Thiampi Lianbel Caiaphas kungah puak hi.

²⁵Peter tua mun ma ah mei oai in om lai hi. Tua ahikom a dangte in, “Nang zongh ziasia pa ii nungzui khat hi ngawl ni ziam?” ci uh hi. Ahihang Peter in nial hi. “Kei ka hi bua hi,” ama in ci hi.

²⁶Peter ii a bil a satansak pa ii beete khat ahi Thiampi Lianbelpa ii sila khat in, “Ama taw huan sungah na om lai hong mu hi ngawl khi ziam?” ci in dongh hi.

²⁷Peter in, “Kei ka hi bua hi,” a ci leleau laitak — thakhatin aklui khat hong khuang hi.

²⁸Zing tuungin Jesus sia Caiaphas ii inn pan ngamuk mangpa kumpi inn ah kipaipui hi. Jew thuneite in kumpi inn sungsang ah a tum bua uh hi, banghang ziam cile Paisan Poai anneak thei natu in amate zeksa vai in a thiangtho in om nuam uh hi.

²⁹Tua ahikom Pilate sia amate omna sangah pusuak in, “Hisia pa bang teng taw mawsak nu ziam?” ci in dongh hi.

³⁰Amate in, “Ama in khialna lian vawt buale nang kungah hong paipui ngawl tu khu hi,” ci in zo uh hi.

³¹“Tua ahile noma in, ama la vun a noma thukham taw kizui in thusit tavun,” Pilate in ci hi. Amate in, “Kote in kuama tungah thidaan dong piak thei natu thu nei ngawl khu hi,” ci uh hi.

³²(Jesus in a thi natu zia a sonna kammalte a tun natu hi bangin piang ahi hi.)

³³Pilate in kumpi inn sungah tum kikin Jesus sam hi, “Nang Jew mite ii Kumpipa na hi ziam?” ci in dongh hi.

³⁴Jesus in, “Hi thu dokna sia nangma thinsung pan hong piang ziam, ahibuale kei thu ngual in nang tungah hong son ziam?” ci hi.

³⁵Pilate in zo kik a, “Jew mi khat hong sa ni ziam? Nangma kei tungah hong aapte sia nangma mipuite le thiampi liante ahi hi. Bang vawt nei ni ziam,” ci hi.

³⁶Jesus in, “Ka ngam sia hi leitung ah a om bua hi; ka ngam sia hi leitung ah om hile, Jew thuneite tungah hong ki aap ngawl natu in, ka nung hong zuite in do in hong hung tu hi. Hi ngawl hi, ka ngam sia hi sung hi ngawl hi!” ci hi.

³⁷Pilate in, “Tua ahile kumpipa khat na hi ziam?” ci in dongh hi. Jesus in, “Kumpipa hong ci sia nangma na hi hi. Hi leitung ah suak a, thumaan thutak sia ii thu son tu tupna khat taw in kong pai hi. Thumaan thutak ii neisa ahite peuma in kei thu hong ngai hi,” ci in zo hi.

³⁸“Tua ahile thumaan thutak sia bang ziam?” Pilate in dongh hi. Tua zawkciang Pilate doipua ah pai kik a, mihingte tungah, “Hisia pa mawsak natu thu bangma ka mu zo bua hi,” ci hi.

³⁹“Ahihang noma ngeina khat na nei uh bangin, Paisan Poai sungah thongtaak khat ka suaktasak tawntung hi. Note atu Jew te Kumpipa suaktasak leng nong oai uh ziam,” ci hi.

⁴⁰Amate au khat sua in, “Hi ngawl hi, ama hi ngawl hi! Barabbas dei khu hi!” ci in zo uh hi. (Barabbas sia ngual suampa ahi hi.)