Read Siyin Chin John 19 Bible Online

John 19 - Siyin Chin bible

John 19

¹Tua zawkciangin, Pilate in Jesus pusua a, velsak hi.

²Ngalkapte in lingnguite taw kumpilukhu khat vawtin, a lu tungah khusak uh hi; tua zawkciang puantual sandup khat silhsak uh hi,

³tua zawkciang ama kungah hong pai uh a, “Jew te Kumpipa a khansau tahen!” ci hi. Tuaciang amate pai in beang uh hi.

⁴Pilate khatvei ma pusuak kikin mihon tung ah, “En vun, ama mawsak natu bangma ka mu ngawlna thu na mu natu in, ama hi sungah hong paipui tu khi hi,” ci hi.

⁵Tua ahikom Jesus sia kumpi ling lukhu khu in, puantual sandup silhin hong pusuak hi. Pilate in, “En vun! Hi sungah ama om hi!” ci hi.

⁶Thiampi liante le biakinn cingte in a mu uh ciang, “Thinglamtee tungah that vun! Thinglamtee tungah that vun!” ci in au uh hi. Pilate in amate munah, “Tua ahile noma in ama la in, thinglamtee tungah that vun. Ama ka mawsak natu bangma thu mu ngawl khi hi,” ci hi.

⁷Mihon in zo kik a, “Ama in Pathian Tapa ka hi ci ahikom thidaan piak tu in kilawm hi a ci thukham khat nei khu hi,” ci uh hi.

⁸Pilate in hi thu a zaak ciangin, lau vaial hi.

⁹Ama kumpi inn sungah tum kik a, Jesus munah, “Nang koisung pan hong pai ni ziam,” ci in dongh hi. Ahihang Jesus in zo ngawl hi.

¹⁰Pilate in ama tungah, “Ka kam hong zo ngawl tu ni ziam? Phawk in, na suatak natu le thinglamtee tungah hong kithalup natu thu nei khawm khi hi,” ci hi.

¹¹Jesus in, “Pathian hong piak hu bek in, kei tungah thu na nei hi. Tua ahiciang nang tungah kei hong aap pa in, mawna nasia zaw vawt ahi hi,” ci in zo hi.

¹²Pilate in hi thu a zaak ciangin, Jesus a suatak natu in lam zong hi. Ahihang mihon au kik a, “Ama na suatak le Kumpilianpa ii lawm na hi bua hi! Kumpi khat ka hi a ci pawpo in, Kumpilianpa a leedo pa ahi hi,” ci uh hi.

¹³Pilate in hi thute a zaak ciangin ama in Jesus doipua ah paipuisak a, “Suangpheak Kiphana” a kici thukhente tona ah (Hebrew kam in Gabbatha kici hi) to hi.

¹⁴Tua hun sia Paisan Poai a thet ma ni khat sunkim dektak hun ahi hi. Pilate in, “Hi sungah na Kumpipa uh om hi,” ci hi.

¹⁵Amate in, “Ama that vun! Ama that vun! Thinglamtee tungah that vun!” ci in au uh hi. Pilate in “Na kumpipa uh thinglamtee tungah ka thalup tu dei nu ziam,” ci in dongh hi. Thiampi liante in, “Kumpipa khat bek ka nei uh sia Kumpilianpa sia hi!” ci in zo hi.

¹⁶Tuasia ciang Pilate in Jesus thinglamtee tungah thalup tu in, amate tungah aap hi. Tua ahikom amate in Jesus la uh hi.

¹⁷A thinglamtee pua in ama hong pusuak a, “Lungu Mun” a kici na hong theng hi. (Hebrew kam in Golgotha kici hi)

¹⁸Tua munah amate in thinglamtee tungah khai uh hi; pasal nii zongh Jesus lang le lang ah thinglamtee tungah khai uh hi.

¹⁹Pilate in heaksakna laino khat at in, thinglamtee tungah taak hi. “Jew te Kumpipa Nazareth khua mi Jesus,” ci in a at hi.

²⁰Jew mite tam ma in sim uh hi, banghang ziam cile, Jesus a kikhaina mun sia khuapi taw a kikhuala bua hi. A lai taak sia Hebrew kam, Latin kam, le Greek kam in ki at hi.

²¹Thiampi liante in Pilate mun ah, “ ‘Jew te ii Kumpipa,’ ci in at heak in, ‘Hisia pa in, Jew te Kumpipa ka hi hi, ci hi,’ ci in at zaw in,” ci uh hi.

²²Pilate in, “Ka at sa sia ka at sa bangma in kip tahen,” ci in zo hi.

²³Jesus thinglamtee tungah a kilh zawkciang ngalkapte in ama puansilh te suutin, ngalkap khat sim in, khen khat tek a cin tu in, khen li sua in hawm uh hi. Amate in puantual a silhsak sia zongh la uh hi, tua puantual sia a kikhuina om ngawl, a tuantung khat ahi hi.

²⁴Ngalkapte khat le khat kikum a “Hi sia balkeak bua tawng; akua in ih nga ziam, meesawk tawng,” ci uh hi. Laithiangtho sungah hi bang a ci sia a taangtun natu ahi hi: “Amate in ka puante hawm a, ka Puantual atu in kikhaam uh hi,” Hisia in ngalkapte ii ngamtatna ahi hi.

²⁵Jesus ii thinglamtee taw a kinaina ah, a nu, a nu ii suapuinu, Clopas ii zi Mary le Mary Magdalene te ding uh hi.

²⁶Jesus in a nu le ama ii it nungzuipa a ding khawm mu hi; tua ahikom a nu munah “Ama sia na tapa hi,” ci hi.

²⁷Tua zawkciang a nungzuipa munah, “Ama sia na nu hi,” ci hi. Tua hun pan kipan nungzuipa in, a inn ah teang tu in, ama la in ciapui hi.

²⁸Tu in na theampo khuangkhim siat zo hi, ci in Jesus in he hi; tuaciang laithiangtho kammal a tun natu in, Jesus in, “Ka dangko hi,” ci hi.

²⁹Tua munah kuang khat sungah sapittui haau om hi, tui huupna khat pap sukin, Hyssop thingbaak dawn ah a thua zawkciang, Jesus muk ah taa uh hi.

³⁰Jesus in tua sapittui a neak zawkciang, “Kizo zo hi!” ci hi. Tua zawkciang a lu kunsuk in thi hi.

³¹Jew thuneite in, Pilate munah a kithatte ii peang a thiatan natu le, thinglamtee tung pan a luangte a laaksuk thei natu in ngen uh hi. Hi bang a nget theina uh sia banghang ziam cile tua ni sia nipi zawk Ni nga ni hi a, hong pai tu Sabbath sia a thiangtho tuam a kingaisun ahikom Sabbath ni in a luangte thinglamtee tungah a om tu a dei bua uh hi.

³²Tua ahikom a ngalkapte in, Jesus taw a kikhai khawmte a masa sia pa ii peangte thiaktan a, tua zawkciang a dang khat sia ii peangte zongh thiaktan uh hi.

³³Ahihang Jesus kung hong thet uh ciang, ama a thisa in mu ahikom, a peang a thiaktan bua uh hi.

³⁴Ahizong ngalkapte khat in, a tei taw Jesus pang a sut ciangin thakhatin chi le tui hong kee hi.

³⁵(Hi thu na up thei natu in, hi thupiang a mu pa in ama muna bangin hong son ahi hi. Ama thusonte a maan hi a, thumaan son ahi hunlam zongh a son pa in he hi.)

³⁶Hi bangin a kivawt sia laithiangtho kammal a tun natu ahi hi: “Ama ii ngute khat zongh taltan ngawl tu hi,” ci hi.

³⁷Laithiangtho mundang khat ah, “Mihingte in amate ii holletpa sia a en tu uh hi,” ci si hi.

³⁸Hisia zawkciang Arimathea khua mi Joseph in Pilate munah, Jesus luang a laak thei natu in ngen hi. (Joseph sia Jesus nungzui khat hi a, ahizong Jew thuneite a kiitakna taw a thimtham in a zuipa khat ahi hi.) Pilate in a luang phaam thei natu thupia ahikom Joseph in a luang la in paipui hi.

³⁹Zan lai in Jesus taw kimu tu in, a pai masa pa, Nicodemus sia Joseph taw ton hi, ama in thing namtui myrrh le aloe te a kihel kilogramme 30 bang hong paipui hi.

⁴⁰Tua pasalte nii in, Jew te ii kiphum tu ciang, a luang a pua kholna ngeina om bangin, Jesus luang la in, hel namtui thau taw zutin, puanneal taw tun uh hi.

⁴¹Jesus a kithalupna munah huan khat om a, tua munah kuama a kiphum ngeingawl lai thaankuul thak khat om hi.

⁴²Sabbath hun a tun ma ni khat ni ahi hu le, a thaankuul taw kinai si ahikom, amate in Jesus luang tualai ah sial uh hi.