Read Siyin Chin John 5 Bible Online

John 5 - Siyin Chin bible

John 5

¹Tua zawkciang, Jerusalem khua Biakna poai ah Jesus pai hi.

²Jerusalem Tuu Kongpi hui ah, talaap nga taw kithua tuicing khat om hi; tua mun sia Hebrew kam in Bethzatha kici hi.

³Mittaw, peangbai, pumzaw ciina honpui khat sia, tua talaapte sungah lum uh hi.

⁴Amate in tui a kilok tu ngak uh hi, banghang ziam cile tu le tu in Topa ii vantunglalang khat in tua tui sungah tuaksuk a, tui sau hi. Tui kinok laitak a tuaksuk phit cina sia in, bang natna po a vei zong dam thiang hi.

⁵Kum sawmthum le kum liat cina sa pasal khat tuak ah om hi.

⁶Jesus in tua pa a lup sia mu a, khuangei mama a ciinat hunlam he hi; tua ahikom, “Na dam nuam ziam?” ci in dongh hi.

⁷Cinapa in, “Syapa awng, tui a kinok laitak kei hong khiasuk tu, hi sungah kuama ka nei bua hi; tuisung theng nuamin, ka hanciam hang, ngualdang veu tuaksuk masa hi,” ci in zo hi.

⁸Jesus in “Tho in, na lupna phah luakin a, lampai in,” ci hi.

⁹Thakhat thu in tua pasalpa dam hi; ama in a phah luakin, lampai tu in kipan paih hi. Hi thu a pian ni sia Sabbath ni ahi hi.

¹⁰Tua ahikom Jew thuneite in a kidamsakpa munah, “Tuni Sabbath ni hi, na phah na puak tu sia ih thukham taw kisi ngawl hi,” ci uh hi.

¹¹Ama in, “Hong damsakpa in ka phah ka lua tu le lampai tu in hong sawl hi,” ci in zo hi.

¹²“Hi bang ngamta a hong sawlpa akua ziam,” ci in dongh uh hi.

¹³Ahihang damsakna a ngapa in, Jesus akua cisia a he bua hi, banghang ziam cile tua munah mihon khat om ahiciang Jesus kiheam hi.

¹⁴Tuasia zawkciang Jesus in Biakinnpi sungah ama mu a, “Hong ngai ta'n, tu in dam zo ni hi; tua ahiciang, mawna vawt nawn heak in, tua ahibuale a nasia zaw thuak thei tu ni hi,” ci hi.

¹⁵Tua zawkciang pasalpa in paisan a, ama a damsak sia Jesus ahi hunlam Jew thuneite kungah son hi.

¹⁶Tua ahikom, amate in Jesus vawtsia tu kipan uh hi, banghang ziam cile ama in hi ciidamsakna Sabbath ni in seam hi.

¹⁷Jesus in amate tungah, “Ka Pa a tawntungin naseam a, kei zongh ka sep kul hi,” ci in zo hi.

¹⁸Hi bang a pauna in, Jew thuneite ii Jesus a thalup nopna khangsak seseam hi; Sabbath thukham paltan bek dom ngawlin, Pathian sia ama ii aituam Pa hi a ci ciang, ama le ama Pathian taw a za kikimsak ahi hi.

¹⁹Tua ahikom amate kungah Jesus in, “A tatakin kong ci hi: Tapa in ama thu taw bangma vawt thei ngawl hi; a Pa ii vawt a mu teng bekma vawt hi. Pa ii vawt teng Tapa zongh in vawt hi.

²⁰Pa in Tapa it ahikom ama ii vawt teng theampo ma lak hi. Hite sangin a lian zaw lai, a vawtte ngawngawn lak tu a, note theampo in lamdang na sa tek tu uh hi.

²¹Pa in mithite thosak a, nuntakna a piak bangma Tapa in a piak nopte tungah nuntakna pia hi.

²²Pa in kuama tungah thukhen ngawl hi. Ama in a Tapa tungah thukhen theina thu a cingin pia hi,

²³tua thu sia mihing theampo in Pa a zatak bangma in, Tapa a zatak natu ahi hi. Tapa a zakta ngawl po in ama a sawl ahi Pa sia zakta ngawl hi.

²⁴“A tatakin kong ci hi: ka kammalte za a, kei hong sawlpa a um pawpo tawntung nuntakna nei hi. Amate tungah thu kikhen ngawl tu a, thina pan nuntakna sungah theng zo hi.

²⁵A tatakin kong ci hi: a hun hong tung tu a — hong tutung zo hi — tua hun ciang a thisate in Pathian Tapa ii aw za tu a, tuaciangin a zate hong nungta tu uh hi.

²⁶Pa mama in nuntakna ii naak ahi bangma ama Tapa zongh nuntakna ii naak suaksak zo hi.

²⁷Tuaciang ama ii Tapa sia thukhen theina thupia zo hi, banghang ziam cile ama Mihing Tapa ahi hi.

²⁸Hi thu tungtaang ah lamdang sa heak vun; a thisate theampo in ama aw za tu a,

²⁹thaankuul sung panin hong pusua tu hun hong theng tu hi; na pha a seamsate tho in nungta tu a, siatna vawtte tho in mawsakna thuak tu hi.

³⁰“Keima aituam thuneina taw bangma ka vawt thei bua hi; Pathian hong son bang bekin thukhen ka hikom, ka thukhenna maan hi, banghang ziam cile, keima dei bangin sep tu ka hanciam bua a, hong sawl pa dei bangin ka seam hi.

³¹Keima le keima tetti in ka kipang le ka son sia maan tatak hi, ci in kisaang ngawl tu hi.

³²Ahihang kei taangin tetti hong pang a dang khat om a, tuaciangin kei huvau ama sonte maan hi, ci in ka he hi.

³³John sia na kamtaite na paisakna uh pa hi a, tuaciang ama in thumaan thutak son hi.

³⁴Mihing khat ii tetti panna ka nei tu kul tuan ngawl hi; hisia noma ii na suatak thei natu ka ci bekma ahi hi.

³⁵John sia meiinn taw kibang a, kuangin taang hi, tuaciangin tawmvei sung teng ama ii khuavak sia na leaplaw nuam uh hi.

³⁶Ahihang John ii tetti panna sangin, a lianzaw kei taang a ding tu tetti khat ka nei hi: Pa ii sep tu hong piakte ka sepna po in kei taangin a pau hi a, kei sia Pa hong sawl ahi hunlam lak hi.

³⁷Kei hong sawlpa ahi Pa zongh in, keima taangin tetti pang hi. Note in ama aw na za ngei bua uh a, a maitang zongh na mu ngei bua uh hi,

³⁸tuaciangin ama ii thu hong puak sia na thinsung ah na keam bua uh hi, banghang ziam cile a ma ii hong puakpa na um bua uh hi.

³⁹Laithiangthote na entel uh hi, banghang ziam cile tuate sungah tawntung nuntakna mu tu na ki um uh hi. Tuaciangin hi Laithiangthote mama in, keima ii thu son hi!

⁴⁰Tua hi napi nuntakna na nga natu in kei kungah nong pai nuam bua uh hi.

⁴¹“Keima in mihingte ii pokna a zong hi ngawl khi hi.

⁴²Ahihang no bangbang mihing nam ci sia le na thinsung uh ah Pathian ii itna na nei ngawl uh kong he hi.

⁴³Pa ii thuneina tengma kengin kong pai hangin nong saang bua uh hi; ahihang khat po in ama ii thuneina taw hong pai ciang na saang tu uh hi.

⁴⁴No khat le khat kipok tu na thangai uh hi, ahihang khat bek ahi Pathian tung pan pokna nga tu na hanciam bua uh hi; tua ahile bangbangin kei hong um thei tu nu ziam?

⁴⁵Ahihang ka Pa mai ah note maw hong pusak tu sia, kei hi tu in hong um heak vun. Na lam et uh pa Moses sia note hong mawsak tu pa ahi hi.

⁴⁶Moses na um takpi uh le kei nong up tu uh hi zo hi, banghang ziam cile ama in keima thu at hi.

⁴⁷Ahihang ama at thute um ngawl na hi uh nungsang, kei kampau bangbangin um thei tu nu ziam?” ci in zo hi.