Read Siyin Chin John 7 Bible Online

John 7 - Siyin Chin bible

John 7

¹Tua zawkciang, Galilee ngam sungah Jesus khualhaw hi; ama in Judea ngam sungah khualhaw nuam ngawl hi, banghang ziam cile, tuasung a om Jew thuneite in ama thatlum nuam uh hi.

²Buk Poai hun nai zo hi,

³tua ahikom Jesus munah a suapuite in, “Nang nung hong zuite in na vawvawt nate hong mu thei natu, hi mun nusia in Judea ah va pai ta'n.

⁴Ngual heak tu a nuam sia in, a sepna a sealcip bua hi. Hi bang nate seam na hi ciang na thu leitung bup in hesak lete pha hi!” ci uh hi.

⁵(A suapuipate ngawngawn in ama a um bua uh hi.)

⁶Jesus in amate munah “Kei atu in a hun hong tung ngawl lai hi. Hun khat pawpo sia noma hun ahi hi.

⁷Leitung in note hong ensan thei ngawl tu hi, ahihang kei hong ensan hi, banghang ziam cile, amate ii paiziate pha ngawl hi, ci in ka son tawntung hi.

⁸Poai ah noma pai tavun. Hi poai ah kei pai ngawl tu khi hi, banghang ziam cile kei atu in a hun hong tung ngawl lai hi,” ci hi.

⁹Hi teng ci in Galilee ah taam thua hi.

¹⁰A suapuipate poai siim tu in a pai zawkciang, Jesus zongh pai hi; ahihang a kilangh ngawlin pai ku hi.

¹¹Jew thuneite in, poai sungah ama zong uh hi. Amate in “Ama a koisungah om ziam?” ci in dongh uh hi.

¹²Mihon sungah ama huvau kihuau tek uh hi. Pawlkhat in “Ama mihing pha khat hi,” ci hi. A dangte in “Hi ngawl hi, ama in mihingte lamlak khial hi,” ci uh hi.

¹³Ahihang kuama in ama thu a kilangh in a son ngam bua uh hi, banghang ziam cile amate in Jew thuneite kiita uh hi.

¹⁴Poai a lang bang a kiman zawkciang, Biakinn ah Jesus pai in hilcianna kipan hi.

¹⁵Jew thuneite in lamdang sa mama uh a, “Bangbangin hisia pa in, sang ah sinna bangma nei ngeingawl napi hiza in he ziam?” ci uh hi.

¹⁶Jesus in, “Kei kong hil thu in keima aituam hilcianna hi ngawl a, kei hong sawlpa Pathian kung pan hong pai hi.

¹⁷Pathian dei bang a ngamta nuamte peuma in, Pathian kung pan hong pai thu ziam, tua ahibuale keima aituam thuneina taw hil khi ziam, he tu hi.

¹⁸Ama aituam thuneina taw a paupa sia, ama atu bek minthanna nga nuam a hanciam ahi hi. Ahihang a sawlpa ii minthan natu a deisakpa sia thumaan a, ama sungah leilot thu a om bua hi.

¹⁹Moses in note Thukham hong pia hi ngawl ziam? Ahihang note kuama in tua Thukham na zui bua uh hi. Kei banghangin thalup hong sawm nu ziam?” ci in zo kik hi.

²⁰Mihonte in “Na sungah doai khat om hi! Akua in nang hong thatlum nuamin hanciam na ziam?” ci in zo uh hi.

²¹Jesus in, “Nalamdang lakna khat kong vawt a, lamdang mama na sa uh hi.

²²Moses in na tapate ii vunteap at natu in thu hong pia hi, (tua nasep a pan sia in Moses hi ngawl a, na taanghpupite ahi hi), tua ahikom Sabbath ni in patang khat ii vunteap na at uh hi.

²³Patang khat Sabbath ni in vunteap na atsak uh ciangin, Moses Thukham paltan kisa ngawl na hi uh le, Sabbath ni in mihing khat ka dam thiangthosak hu in, banghangin kei tungah thin uuk nu ziam?

²⁴A puatham munate taw thukhennate kheal vun, thumaan munate taw thukhen vun,” ci in zo hi.

²⁵Jerusalem a om mihing pawlkhat in, “Thuneite ii hanciamin a thalup nop uh sia, hisia pa hi ngawl ziam?

²⁶En vun! mipi mai ah a kilangh in a pau ciang zong, amate in ama langpanna kam bangma pau ngawl hi! Ama Messiah hi ci in amate in tel takpi ahithei tu ziam?

²⁷Ahihang Messiah hong pai ciang ahile, ama koisung pan hong pai ci sia kuama in he ngawl tu hi. Hisia pa ahile hong paina ih he tek hi,” ci uh ih.

²⁸Jesus in Biakinnpi sungah a hil laitakin, awnging taw, “Kei hong he takpi nu ziam, tuaciang kei koisung pan hong pai ci in hong he nu ziam? Keima aituam thuneina taw hong pai ngawl khi hi. Ahizong kei hong sawlpa ahile thumaan hi. Note in ama na he bua uh hi,

²⁹ahihang keima in ka he hi, banghang ziam cile, ama kung pan kong pai a, ama in hong sawl hi,” ci hi.

³⁰Tuasia ciangin amate in Jesus man tu in hanciam ahihang kuama in ama a thutha bua uh hi, banghang ziam cile ama hun tung ngawl lai hi.

³¹Ahihang mihon sung pan, mihing tam mama in ama um a, “Messiah hong pai ciang, ama in hisia pa ii vawtte sangin a tamzaw nalamdang laknate, a vawt tu ziam,” ci uh hi.

³²Pharisee te in Jesus huvau mihonte ii kihuauna uh a zaak uh ciang, amate le thiampite in, Jesus a man tu in, biakinn cingte paisak uh hi.

³³Jesus in, “No taw tawmvei sung kong omkhawm lai tu a, tua zawkciang, kei hong sawlpa kungah ka pai tu hi.

³⁴Kei nong zong tu uh a, ahihang nong mu buatu uh hi, banghang ziam cile, kei om natu munah no na pai thei buatu uh hi,” ci hi.

³⁵Jew thuneite in, amate teng kikum uh a, “Ei mu ngawl tu in, ama koisung pai sawm ziam? Ih mihingte teenna Greek khuapite ah ama pai in, Greek mite hilcian tu ziam?

³⁶Eite in ama ih zon hang ama ih mu buatu a, ama om natu munah ei pai thei ngawl tu hong ci hi. Bang a cinopna hi tu ziam?” ci uh hi.

³⁷A thupibel ni poai khaam tawp ni in, Jesus dingto in awnging tak taw, “A kuama po a dangkote kei kungah hong pai in tui dawn tahen.

³⁸Laithiangtho ii ci bangma in, kei hong um peuma in ama sung pan nuntakna a pia luitui hong luang tu hi,” ci hi.

³⁹Jesus in hi bang a pau sia ama a umte ii saan tu Thaa thu son ahi hi. Tua hun laitakin Thaa kipia ngawl lai hi, banghang ziam cile minthanna sungah Jesus kithosak ngawl lai hi.

⁴⁰Mihon sung pan, mihing pawlkhat in, hi thu a son za a, “Hisia pa in Kamsaang tatak sia hi!” ci uh hi.

⁴¹A dangte in, “Ama Messiah hi!” ci uh hi. Ahihang a dangte in, “Messiah sia Galilee pan hong pai ngawl tu hi.

⁴²Laithiangtho ii ci bangin Messiah sia David Kumpipa suan hi tu a, David teenna khua ahi Bethlehem ah suak tu hi,” ci uh hi.

⁴³Tua ahikom Jesus hangin, mihonte sungah kikhenna om hi.

⁴⁴Pawlkhat in Jesus man nuam ahihang kuama in ama a thutha bua hi.

⁴⁵Biakinn cingte hong heak kik uh ciang, thiampi liante le Phariseete in, “Banghangin ama hong paipui ngawl nu ziam,” ci in dongh uh hi.

⁴⁶Biakinn cingte in, “Hisia pa bangin, kuama kampau ngei om ngawl hi,” ci uh hi.

⁴⁷Pharisee te in “Ama in no zongh hong theam ahi ziam?” ci in dongh hi.

⁴⁸“Thuneite khat ahibuale Pharisee te khat in ama um hi ci in na he ngei uh ziam?

⁴⁹Hi mihonte in Moses Thukham he ngawl ahikom amate Pathian ii haamsiatna nuai ah a om uh hi!” ci uh hi.

⁵⁰Tua munah a om Pharisee te khat sia Jesus taw kimu tu in, a pai ngeipa Nicodemus ahi hi. Ama in a dangte munah,

⁵¹“Ih Thukham bangin ci leang, mihing khat sia bang ngamtatna teng nei ci, ih sit ih mu mateng in, ih mawsak thei bua hi,” ci hi.

⁵²Amate in, “Tua ahile pha hi. Nang zongh Galilee pan ma na hi ziam? Laithiangtho pha takin sim lete, Galilee pan kamsaang hong pai ngeingawl hi, ci in na he tu hi,” ci uh hi.