Read Siyin Chin John 8 Bible Online

John 8 - Siyin Chin bible

John 8

¹[Tua zawkciang ngual theampo cia siat ahihang Jesus in, Olive Mualtung ah pai hi.

²A zing ciang zing tuungin ama Biakinnpi ah pai kik hi. Mihing theampo ama ii kiim ah kikhawmtua uh a, tuaciangin ama to in amate hilcian tu in kipan hi.

³Thukham hil syate le Phariseete in, numei le pa palngul khialna a vawt laitak a mat uh numei khat hong paipui uh a, amate theampo ii mai ah, dingsak hi.

⁴Amate in Jesus munah, “Syapa awng, hi numei nu sia numei le pa palngul khialna a vawt laitakin kiman hi.

⁵Ih Thukham sungah Moses in tuabang numei khat sia suang taw denlup natu in thupia hi. Tu in bang na ci tu ziam?” ci uh hi.

⁶Amate in hi bangin a ci uh sia Jesus a mawsiat thei natu in a aitaana hi. Ahihang ama kunin, a khutme taw lei ah lai at hi.

⁷Amate in tuabangin thu a dok ciang, ama hong dingmaam a, amate tungah, “Note sungah akua po ahizong, mawna a vawt ngeingawl het sia in ama suang taw deang masa tahen,” ci hi.

⁸Tua zawkciang, kunsuk kikin lei ah lai at kik hi,

⁹Amate in hi thu a zaak ciangin, nusia siat uh hi, khanghaam teng masa in, khat zawkciang khat a vekpi cia uh hi. Tua munah a ding lai numei le Jesus bek taang hi.

¹⁰Jesus dingmaam in, ama munah, “Amate koisung om siat ziam? Nang hong mawsak tu kuama om nawn ngawl ziam,” ci hi.

¹¹“Kuama om nawn ngawl hi, Topa awng,” ci in ama in zo hi. “Tua ahile pha hi, kei zongh in, kong mawsak bua hi. Pai ta'n, ahihang mawna vawt kik nawn heak in,” ci hi.] [1]

¹²Jesus in Phariseete tungah, “Keima in leitung khuavak ka hi hi. Kei hong zuite peuma in nuntakna khuavak nei tu a, khuazing sungah a vak ngei buatu hi,” ci hi.

¹³Pharisee te in, “Tu in nangma le nangma tetti a kipang hi bek ni hi; na sonte in bangma a maan thu lak tuan ngawl hi,” ci uh hi.

¹⁴Jesus in, “Hi ngawl hi, keima le keima tetti kipang hi leng zong, ka thuson teng maan hi, banghang ziam cile koisung pan kong pai a, koisung zuan tu khi ziam ka kihe hi. Kei koisung pan hong pai a, koisung zuan tu ci sia note in nong he bua uh hi.

¹⁵Note in mihing pianzia taw bek thu na khen uh hi; kei in kuama tungah thu ka khen bua hi.

¹⁶Ahihang tuabangin vawt tu hi leng zong, ka thukhenna maan tu hi, banghang ziam cile hisia sungah kei nguak hi ngawl khi hi; kei hong sawl Pa in keima taw omkhawm hi.

¹⁷Noma ii thukham sungah tetti nii in a thukim ciang amate ii son sia maan hi, ci in ki at hi.

¹⁸Keima le keima tetti in ka kipang a, hong sawl Pa zongh in kei luangin tetti hong pang hi,” ci in zo hi.

¹⁹“Na pa koisung om ziam?” ci in amate in dongh uh hi. Jesus in, “Keima ahizong, ka Pa ahizong, na he bua uh hi. Keima hong he le uhte ka Pa zongh he tu nu hi,” ci in zo hi.

²⁰Jesus in hi thute theampo, Biakinn sung sumpi bungte koina inndoi sungah a hilcian laitakin a son ahi hi. Tuaciangin ama kuama in a man bua uh hi, banghang ziam cile ama ii hun a tung bualai hi.

²¹Tuaciang Jesus in, “Kei ka pai tu hi; nong zong tu uh a, ahizong na mawnate sungah na thi tu uh hi. Ka pai natu munah, na pai thei buatu uh hi,” ci hi.

²²Tua ahikom Jew thuneite in, “Ama paina ah ei pai thei ngawl tu hi ci hi. Ama le ama kithatlum tu a cinopna ziam,” ci uh hi.

²³“Note sia hi leitung, hisung a nuaisang ii neisa na hi uh hi, ahihang kei sia tungsang pan hong pai ka hi hi. No sia hi leitung pan na hi uh a, ahihang kei sia hi leitung pan ka hi bua hi.

²⁴Na mawnate sungah thi tu nu hi, kong ci sia tua hang ahi hi. Tuaciangin, ‘Keima sia keima ka hi hi,’ ci in nong um bua uh le, na mawnate sungah na thi tu uh hi,” ci in Jesus in zo hi.

²⁵“Nang akua ni ziam,” ci in amate in dongh uh hi. Jesus in, “A kipatciil pan ma a, kong sonsa sia ka hi hi.

²⁶No ii tungtaang ah ka pau tu tam mama, kong mawsak natu tam mama ka nei hi. Ahizong kei hong sawlpa thumaan a, tuaciangin, ama tung pan ka zaaksa teng bekma leitung ah ka son hi,” ci in zo hi.

²⁷Jesus in Pa thu sawson ahi hunlam amate in a tel bua uh hi.

²⁸Tua ahikom ama in amate tungah, “Mihing Tapa na lapto uh ciangin, ‘Keima sia Keima ka hi’ hunlam na he tu uh hi; tuasia ciangin, keima aituam thuneina taw bangma vawt ngawlin, Pa hong sawl bang bekin, pau ka hi sia nong he tu uh hi.

²⁹Tuaciangin kei hong sawlpa in kei hong ompui hi; kei nguak hong nusia bua hi. Banghang ziam cile, ama diksakte ka vawt tawntung hi,” ci hi.

³⁰Jesus ii a son thu teng a za mihing tam mama in ama um uh hi.

³¹Tua ahikom Jesus in, ama a umte munah, “Ka hilciannate na ni uh le, ka nungzui tatakte na hi uh hi;

³²thumaan thutak na he tu a, tua thumaan thutakin no hong suaktasak tu hi,” ci hi.

³³Amate in, “Ko in Abraham suante hi a, kuama ii sila hi ngeingawl khu hi. Tua hi a, ‘Na suakta tu uh hi’ na ci sia bang na cinopna ziam,” ci in zo hi.

³⁴Jesus in, “A maan takin kong ci ciang, a kuama po mawna a vawt theampo in mawna ii sila ahi hi.

³⁵Sila khat sia bangkua khat ii neisa hi tawntung ngawl hi, ahihang tapa khat ahile bangkua khat ii neisa hi tawntung hi.

³⁶Tapa in hong suaktasak le na suakta takpi tu uh hi,

³⁷Abraham suan le paalte na hi uh sia kong he hi. Tua hi kasap kei hong thatlum nuamin hanciam nu hi, banghang ziam cile ka hilcianna na saang thei buatu uh hi.

³⁸Kei sia ka Pa ii hong lak bang teng ka pau a, no sia na pa uh hong sawl teng na seam uh hi,” ci hi.

³⁹Amate in, “Ko ii pa sia Abraham hi,” ci in zo uh hi. Jesus in, “Abraham ii tate hi takpi le uhte, ama ii vawt teng ma vawt tu nu hi.

⁴⁰Pathian tung pan ka zaak thumaan sia ma kong son hi bek napi, hong thatlum nuamin hanciam nu hi. Abraham sia hi bangin ngamta ngawl hi!

⁴¹Note in, na pa sep teng na seam uh hi,” ci in zo kik hi. “Pathian bekma, kote ii khat bek ka nei ka Pa uh hi a, tuaciangin ko sia ama tate tatak ka hi uh hi,” ci in amate in zo uh hi.

⁴²Jesus in, “Pathian sia na Pa uh ahi takpi le kei nong it natu ahi hi, banghang ziam cile, Pathian kung panin kong pai a, tu in hi munah ka om hi. Keima aituam thuneina taw hong pai ka hi bua a, ama ii hong sawl ka hi hi.

⁴³Ka son teng banghangin tel ngawl nu ziam? Banghang ziam cile kong thu puak sia na ngai zawk ngawl uh hang ahi hi.

⁴⁴No sia na pa uh doaimangpa ii tate na hi uh a, tuaciangin na pa uh ii deinate na zui nuam uh hi. A kipatciil pan kipan, ama sia mi thatpa hi a, thumaan sangah a pang ngei bua hi, banghang ziam cile, ama sungah thumaan thutak a om bua hi. Ama in leilot thu a son ciangin, ama pianzia bangin pau ahi lel hi, banghang ziam cile, ama sia leilot thei pa hi a, leilotna theampo ii a pa ahi hi.

⁴⁵Ahihang kei in thumaan kong son hi, tua hu in nong um bua uh hi.

⁴⁶No sungah akua in kei sia mawnei hi ci in hong lak thei tu nu ziam? Thumaan a son ka hi nale, banghangin hong um ngawl nu ziam?

⁴⁷Pathian kung pan hong pai pa in, Pathian kammalte ngai hi. Ahizong no sia Pathian kung pan na hi bua uh a, tua hu in hong ngai nuam ngawl nu hi,” ci hi.

⁴⁸Amate in Jesus munah, “Nang sia Samaria mi hi a, doai vei ni hi kong ci uh sia, maan hi ngawl khu ziam,” ci uh hi.

⁴⁹Jesus in, “Doai vei ngawl khi hi, ka Pa ka thasia hi, ahihang note in kei nong thasia bua uh hi.

⁵⁰Keima atu in patoaina ka zong bua hi. Ahihang tuabangin zong a, kei hong panpui in thu a khen khat om hi.

⁵¹A maan takin kong ci hi: a kuama po ka hilcianna a nite, a thi ngei buatu hi,” ci in zo hi.

⁵²Amate in, “Tu in nang sia doai vei na hi hunlam kong telcian uh hi! Abraham thi a, kamsaangte zongh thi hi, tua hi napi na hilcianna a nite peuma thi ngeingawl tu hi, ci ni hi.

⁵³Ih pa Abraham thi zo hi; Abraham sangin lianzaw khi hi a ci nuam na hi bua na ziam? Tuaciangin kamsaangte zongh thi zo hi. Nang akua kisa ni ziam,” ci uh hi.

⁵⁴Jesus in, “Keima le keima ki upat tu hi leng, tua ki upatna sia, bangma man nei ngawl tu hi. Kei hong upat sia in ka Pa hi a, ka Pathian uh hi, na ci sia pa ma ahi hi.

⁵⁵No sia ama na he ngei bua uh hi, ahihang kei in ka he hi. Ama he ngawl khi hi, ci tu hi leng, noma bangma in a leilot ka suak tu hi. Ahihang ama ka heak hi a, tuaciangin ama ii thu ka ni hi.

⁵⁶Na pa uh Abraham in kong pai hun a mu tu sia lawp hi; ama in mu zo a, a lungdam hi,” ci in zo hi.

⁵⁷Amate in ama munah, “Nang kum sawmnga zongh pha ngawl lai ni hi — Abraham sia mu zo ni ziam?” ci uh hi.

⁵⁸A maan takin kong ci hi, “Abraham pian ma in, ‘Keima’ ka om zo hi,” ci in Jesus in zo kik hi.

⁵⁹Tuasia ciangin, amate in a den natu suangte zamh ahihang Jesus kiheam a, Biakinnpi nusia hi.