Read Siyin Chin John 9 Bible Online

John 9 - Siyin Chin bible

John 9

¹Jesus in lam a papai laitakin, mittaw sa a, a suak, pasal khat mu hi.

²A nungzuite in, “Syapa awng, akua mawna hangin, ama mittaw sa a suaksak ziam? Ama mawna hang ziam maw, a nu a pate ii mawna hang ziam,” ci in ama dongh uh hi.

³“Ama mawnate hang ahizong, a nu a pa mawnate hang ahizong, a mittaw hi ngawl hi. Pathian ii vaangletna ii nasepna ama sungah a kimu thei natu in a mittaw hi.

⁴Sun hun laiteng in kei hong sawlpa na ih sep kul tu hi; kuama ii na a sep thei ngawl zan hun hong theng tu hi.

⁵Leitung ah ka om laiteng, leitung atu in khuavak ka hi hi,” ci in zo hi.

⁶Hi bangin a ci zawkciang, Jesus in lei ah cilsia a, ciltee taw buan thau hi; ama in mittawpa ii mit buan noisak a,

⁷tuaciang, “Va pai ta'n a, Siloam Tuicing ah na mai phiat ta'n,” ci hi. (Siloam cisia “Kisawl” a cinopna hi). Tua ahikom mittawpa pai in, a mai a phia zawkciang, khuamu thei sa in hong heak kik hi.

⁸Tuasia ciangin a innpaamte le ama khutdaw ngenin a om lai a mu ngeite in, “Hisia pa sia khutdaw ngenin a to bul pa hi ngawl ziam?” ci uh hi.

⁹Pawlkhat in, “Ama hi peu hi,” ci hi, ahihang a dangte in “Ama hi ngawl hi; a kibanpui khat hi bek hi,” ci uh hi. Tua ahikom pasalpa in, “Keima in tuasia pa khi hi,” ci hi.

¹⁰“Tu in khua na mu thei sia bangbang tatak ziam?” ci in amate in dongh uh hi.

¹¹Ama in “Jesus a kici pa in buan tawm vawt a, ka mitte hong noisak zawkciang, Siloam ah na maiphiat ta'n, hong ci hi. Tua ahikom, pai a, ka mai ka phia zawk po ciangin, khua ka mu thei hi,” ci in zo hi.

¹²Amate in “Ama koisungah om ziam,” ci in dongh uh hi. Ama in “He ngawl khi hi,” ci hi.

¹³Tuaciang amate in a mittaw ngeipa sia, Phariseete kungah paipui uh hi.

¹⁴Jesus in buan vawt a mittawpa a damsak ni sia Sabbath ni ahi hi.

¹⁵Tuasia ciang Phariseete in a mit khua a mu kik theina thu, pasalpa munah dongh kik uh hi. “Ama in ka mitte buan hong noisak hi; ka mai ka phiat a, tu in khua ka mu thei hi,” ci in ama in zo hi.

¹⁶Phariseete pawlkhat in, “Hi bang a vawt, mihing in, Pathian kung pan hi thei ngawl tu hi, banghang ziam cile ama in Sabbath Thukham ni ngawl hi,” ci uh hi. Ahizong a dangte in, “Bangbangin mawnei mi khat in, hi bang nalamdang laknate vawt thei tu ziam,” ci uh hi. Tuaciangin amate sungah pawl kikhenna khat hong om hi.

¹⁷Tua ahikom, Phariseete in pasalpa khatvei ma dongh kik uh hi. “Ama in na khuamu ngawlna pan hong damsak hi, ci ni hi — ama huvau bangbangin na ngaisun ziam?” “Ama kamsaang khat hi,” ci in pasalpa in zo kik hi.

¹⁸Jew thuneite in, bang po ahizong hisia pa mittaw a, tu in khuamu thei hi ci thu, a pa le a nu samin a dok phot ngawl peuma in a um nuam bua uh hi;

¹⁹tuaciangin, “Hisia na tapa ahi ziam? Ama mittaw sa in suak hi ci nu hi; tua ahile tu in bangbang khuamu thei ziam?” ci in dongh uh hi.

²⁰A pa le a nu in “Ama ka tapa uh hi a, tuaciangin mittaw sa in suak ci sia he khu hi.

²¹Ahihang bangbangin tu in khuamu thei a, akua in damsak ziam ci zongh ka he bua uh hi. Ama dongh vun; a khan haam zo hi, ama ii thu ama in hong zo thei hi!” ci uh hi.

²²Jew biakna thuneite ii lungkimna sa khat om a, a kuama po Jesus sia Messiah hi ci in a um peuma, synagogue sung pan kihawlkhia tu hi, ci ahikom amate in Jew biakna thuneite a kiitak hu in, a nu le a pa in hi bangin ci ahi hi.

²³Tua hangin, “Ama a khan haam zo hi, ama dongh vun!” a nu le a pa in ci hi.

²⁴Mittaw sa a suakpa sia, a nii veina sam kik uh a, ama tungah, “Thumaan ka son tu hi, ci in Pathian mai ah kiciam in! Nang hong damsak pa sia, mimaw khat hi ci in he khu hi,” ci uh hi.

²⁵“Ama mimaw ahile ahi ngawl he ngawl khi hi. Ka heak thu khat sia: ka mittaw ngei a, tu in khua ka mu hi,” ci in zo kik hi.

²⁶“Ama in bang hong law ziam? Na khuamu ngawlna pan, bangbangin hong damsak ziam?” ci in dongh uh hi.

²⁷“Kong son zo a, noma in nong ngai bua uh hi. Banghangin za kikik nuam nu ziam? No zongh ama nungzuite suak nuam nu ziam?” ci in ama in zo hi.

²⁸Amate in ama lang a, “Tuasia pa nungzui sia nangma ni hi; ko sia Moses ii nungzuite khu hi.

²⁹Pathian in Moses paupui hi, ci in he khu hi; ahizong ziasia pa ahile koisung pan hong pai ziam, ci sia he beak ngawl khu hi!” ci uh hi.

³⁰Tua pa in, “Bangza in a lamdang thu ziam! Ama koisung pan hong pai ziam ci in he ngawl nu hi, ahihang ama in kei sia ka khuamu ngawlna pan hong damsak zo hi.

³¹Pathian in mimawte ii ngetna ngai ngawl hi, ci in ih he hi; ama in ama zakta a, a sawlna bang a seamte ngetna bek ngai hi.

³²Simlei pianciil pan kipan, mittaw sa in a suak khat sia khua muna a pia kuama ii thu kiza ngeingawl hi.

³³Hisia pa Pathian kung pan hong pai hi buale, bangma vawt thei ngawl tu hi,” ci in zo hi.

³⁴Amate in, “Nang sia mawna sungah suak a, mawna sung ma a khangto ni hi — ko hong hil tu in hanciam ni ziam?” ci in zo uh hi. Tuaciangin amate in ama synagogue panin hawlkhia uh hi.

³⁵Jesus in bang thu teng piang ci in a zaak zawkciang, tuasia pa mu a, “Mihing Tapa na um ziam,” ci in dongh hi.

³⁶“Syapa awng, ka up thei natu in ama akua ziam hong son ta'n,” ci in zo hi.

³⁷Jesus in, “Ama mu zo ni hi, ama sia tu laitak nangma taw a kipaupui sia ahi hi,” ci hi.

³⁸“Ka um hi, Topa awng!” ci in Jesus mai ah ama khupdin hi.

³⁹Jesus in, “Mittawte khua a mu natu le khuamute mittaw a sua natu in, hi leitung ah thukhen tu in kong pai hi,” ci hi.

⁴⁰Ama kung a om Pharisee mi pawlkhat in, tu bang a pau za a, “Koma zongh mittaw hi hong ci nuam na hi bua na ziam?” ci in dongh uh hi.

⁴¹Jesus in, “Mittaw hizaw le uh te, a maw ngawl hi tu nu hi; ahihang khuamu thei khu hi, ci na hi uh kom, a maw nginge hi lai nu hi,” ci hi.