Read Siyin Chin Sawltakte 1 Bible Online

Sawltakte 1 - Siyin Chin bible

Sawltakte 1

¹Theophilus awng: Ka laibu masa sia sungah Jesus nasep a kipat pan a, kipan a sepna le hilnate theampo kong at zo a,

²ama vantung ah a kilaakto ni dong, huam hi. A kilaak to ma in, sawltak tu a tealte tungah Thaa Thiangtho vaang taw thupiakna nei hi.

³A thi zawk ni sawmli sungah amate tungah tamvei ma kilak a, ama sia nungta nginge ahi hunlam up laak om ngawl tu in, a nanam in kilak hi. Ama sia sawltakte in mu uh a, Pathian Ngam thu ama in sonpui hi.

⁴Amate hong kikhoptua uh ciangin, hi bangin thupia hi: “Jerusalem nusia heak vun, no tungah kong sonsa Pa ii kamciam hong piaksa letsong sia, na ngak vun,

⁵John in tuidam taw tui hong phum hi, ahihang ni tawmvei no sungin, note Thaa Thiangtho taw na ki baptize tu uh hi,” ci hi.

⁶Sawltakte in Jesus taw a kisik uh ciangin, “Topa awng, Israel mite tungah a Ngam na pia kik tu ziam?” ci in dongh uh hi.

⁷Jesus in, “Hunte le thunei theinate sia ka Pa zeak hi a, bang hun ciang hi tu cisia no heak tu thu hi ngawl hi.

⁸Ahihang Thaa Thiangtho note tungah hong pai ciang, vaangletna taw na kidim tu uh a, Jerusalem pan kipan Judea ngam bup le Samaria ngam le leimong dongin, ka tetti na hi tu uh hi,” ci hi.

⁹Hi teng a ci zawkciang, amate mu tangin, van ah ama kilato a, meeikaai in lia hi.

¹⁰Ama ii paina san vantung salh in, a om uh laitakin, puankaang silh pasal nii sia amate kungah hong ding a,

¹¹amate in, “Galilee mite awng, van ento in banghangin tua munah ding top nu ziam? Hi Jesus sia note kung pan vantung ah a kilaak to na mu uh bang tatak ma in hong pai kik tu hi,” ci uh hi.

¹²Tua zawkciang Sawltakte in Jerusalem pan kilometre khat bang a khualana Olive Mual panin, Jerusalem ah cia kik uh hi.

¹³Amate Jerusalem khua sungah tumin, a taam ngeina mun inn tung dawl sungah om uh hi. Amate teng sia Peter, John, James le Andrew, Philip le Thomas, Bartholomew le Matthew, Alphaeus, ii tapa James, Minam it Simon, le James ii tapa Judas ahi uh hi.

¹⁴Jesus ii suapui pate, a nu Mary le numei dangte taw amate pawlkhat, thungen tu in kikhawmtua nithi uh hi.

¹⁵Ni tawmvei zawkciangin, thu um teng kikhopna khat om a, mihing za le kul bang pha uh hi. Tuaciang Peter sia thuson tu in, ding hi.

¹⁶“Ka suapuite awng, Thaa Thiangtho in David tungtawnin, Jesus a man tute, lam a lak Judas huvau a sonkholna laithiangtho kammalte a taangtut kul hi.

¹⁷Judas sia koma ii pawl mi khat ahi hi, banghang ziam cile koma ii nasepna sungah, ama zongh nasep khat nei tu in, a kiteal pa ahi hi.”

¹⁸(Judas in ama ii ngitlo ngamtatna taw a nga sum taw lo khat lei a, tuasung ah pukvawk in thi hi; ama sia puaktham in, a ngil keekeak hi.

¹⁹Jerusalem ah a teang mihing theampo in tua thu za ahikom, tua lo sia, amate kam in Akeldama, a khiakna sia “Chisan Lo” ci in min phuak uh hi.)

²⁰“Banghang ziam cile Psalm late ii sungah, ‘Ama ii bangkua awngthong tahen a, kuama a teang om heak hen,’ ci in ki at a, ‘A nasepna mun zongh midang khat in laih tahen,’ ci in ki at si hi.

²¹“Tua ahikom, Topa Jesus thaw kikna tetti in a pang tu mihing khat kote sungah hong kibelap kul hi.

²²Ama sia bangbang mihing hi tu ziam cile, John ii tuiphumna huvau a hil hun pan kipan Jesus van ah a kilaak to dong a kilaklaw teng, Jesus khualhawna theampo sung, ko pawl sungah hong kihel top khat ahi kul hi,” ci hi.

²³Tua ahikom amate in, mihing nii ii min aap uh hi. Barsabbas a kici Joseph (Justus zongh kici si) khat le, Matthias ahi uh hi.

²⁴Tua zawkciang amate in, “Topa awng, mihing theampo ii thinsung na he hi. Tua ahiciang, Topa awng, hite nii sung pan koisia teal ni ziam hong lak ta'n.

²⁵Judas in a zot natu zuanin a nusiat sawltak za a awng sia dip natu in hong hesak ta'n” ci in thungen uh hi.

²⁶Tua zawkciangin amate in, tua mite nii sung pan, a kiteal natu in, lai aisaan a, Matthias kiteal ahikom, sawltak sawm le khat te ii pawl sungah ama kibelap hi.