Read Siyin Chin Sawltakte 10 Bible Online

Sawltakte 10 - Siyin Chin bible

Sawltakte 10

¹Caesarea khua ah Rome kumpite ngalkap ahi “Italy Ngalkapte” kici ngalkap honkhat sungah ngalkap bu a seam Cornelius kici khat om hi.

²Ama sia biakna kin khat hi; ama le a innkuan bupin Pathian bia uh hi. Ama in Jew mizawngte a hu thei za in hu a, tuaciang tatsat ngawlin Pathian tungah thungen hi.

³Ni khat nitak nai thum bang hun mahiat in, ama in mang mu a, hi sitset in a muna ah Pathian vantunglalang khat in, “Cornelius awng!” ci hi.

⁴Ama in launa taw vangtunglalang sia salh a, “Topa awng, bang ziam?” ci hi. Vantunglalang in, “Pathian in na thungetna le, a zawngte na hunate hangin lungdam a, na thunget na te uh hong zo tu kithoai hi.

⁵Tu in mihing pawlkhat Joppa ah paisakin, Simon Peter kici mihing pa samsak ta'n.

⁶Ama sia tuipi hui ah a teang savun vawt Simon inn ah zintung hi,” ci hi.

⁷Tua zawkciangin, vantunglalang in paisan hi, tuaciang Cornelius in a inn sung a naseamte nii le biakna a kin, ama aituam a cing ngalkap khat sam hi.

⁸Thupiang teng amate tungah son in Joppa ah paisak hi.

⁹A zing ciangin, amate Joppa khua nai a thet laitak Peter in thungen tu in sun hun laitakinnkhum tungah kaato hi.

¹⁰Ama in a ngilkial ahikom an ne nuam zo hi; tuabangin an neak tu a kivawt saan laitak ama in mukholna nei hi.

¹¹Van kihongin mu a, bang ziam maw puanzapui bang khat, king li panin kikhai in lei ah kikhiasuk khat mu hi.

¹²A sungah nganhing namcin le awmtaal a, a vak theite le ngam vacimte om hi.

¹³Aw khat in ama munah, “Peter awng tho in; hite ngo lum in a, ne in!” ci hi.

¹⁴Ahihang Peter in, “Ne mama bua tong, Topa awng! Biakna taw kisai, a thiang ngawlin a kikoite le nin hi a kici sate ne ngawl het tu khi hi,” ci hi.

¹⁵Tua aw taw ma in paupui kik a, “Pathian ii thiansak sate a nin in ngaisun heak in,” ci hi.

¹⁶Hisia thumvei vaset a kici zawkciangin, van ah kila to kik hi.

¹⁷Peter in a mukholna sia huvau ii khiakna lungmangin a om laitakin, Cornelius sawltakte in Simon inn mu uh a, kongbiang ah ding uh hi.

¹⁸“Hi sungah, Simon Peter a kici zin khat hong tung ziam,” ci in dongh uh hi.

¹⁹Peter in a mukholna sia ii khiakna bangbang peuma ahi katawm, ci in tel tu in a hanciam laitak Thaa in, “Ngai in! hi lai ah pasal thum in nang hong zon saan laitak hi.

²⁰Tua ahikom kithoai in a, tuaksuk in. Tuaciangin amate taw kithawl tu nakna heak in, banghang ziam cile amate in keima sawl ahi hi,” ci hi.

²¹Tua ahikom Peter tuaksuk a, pasalte munah, “Na zon uh sia keima khi hi. Bang vai a hong pai nu ziam,” ci hi.

²²“Ngalkap bu Cornelius in kote hong sawl hi,” ci hi. “Ama sia Pathian a bia mihing pha khat hi a, Jew te theampo in zakta uh hi. Pathian vantunglalang khat in, ama tungah na son tu thute a zaak thei tu in nang hong sap tu in sawl hi,” ci hi.

²³Peter in amate sungtang tu in sam a, zan khat ngiaksak hi. A zing ciang kithoai in amate taw ding uh hi; tuaciangin Joppa pan nungzui pawlkhat taw zong, paikhawm uh hi.

²⁴A zing ciangin, Caesarea khua theng uh a, tua munah ama ii a sam mealheakte le a muan a ngualtamhte taw Cornelius in ngak hi.

²⁵Peter sia inn sung tum tu a kithoai ciangin Cornelius in muak a, a peang ah bokin ama mai ah a kun hi.

²⁶Ahihang Peter in dingsak hi. Ama in, “Ding in, keima sia mihing khat ma hi lel khi hi,” ci hi.

²⁷Peter sia Cornelius taw thuson kawmin, inn sungah a tum ciangin, mihing tam mama kikhawm mu hi.

²⁸Amate tungah, “Na heak tek uh hi a, Jew te khat sia Gentile te khat ii inn ah a haw tu ahizong, kithawl tu ahizong a biakna in oai ngawl hi. Ahihang Pathian in mihing khat pawpo biakna taw kisai in, thiang ngawl hi, nin hi, ka ci ngawl het natu in hong lak hi.

²⁹Tua ahikom nong samsak uh ciangin nial ngawlin kong pai hi. Tua ahiciang nong sapna thu sia banghang ziam ci in kong dongh hi,” ci hi.

³⁰Cornelius in, “Tu nung ni thum lai tubang hun nitak nai thum hun khawngin ka inn ah thu ka ngen hi. Thakhat thu in a tee vakil puan a silh pasal khat ka mai ah hong ding a,

³¹‘Cornelius awng! Pathian in na thungetna hong za a, ngual na hu thongna teng hong musak zo hi.

³²Mihing pawlkhat Joppa ah paisak in a, a min tatak Simon Peter kici, pasal khat sia samsak ta'n. Ama sia tuipi hui a teang savun vawt pa Simon kici khat ii inn ah tung hi,’ hong ci hi.

³³Tua ahikom thakhatin kong samsak a, na dikna hangin nong pai hi. Tu in Pathian mai ah ko teng na om ung, Topa ii nang son a hong sawl po ngai tu in hong ngak khu hi,” ci hi.

³⁴Peter sia thuson tu hong kipan a, “Tu in Pathian in mihing theampo a kibangin ngaisun hi ci in ka phawk hi.

³⁵Ama a biate le a maan a ngamtate sia, bang minam po ahizong ama in saang hi.

³⁶Israel te tungah a puak thu na heak uh hi, mihing theampo ii Topa ahi, Jesus Christ tungtawnin kilemna Lungdamna Thu thansakna ahi hi.

³⁷Tuiphumpa John in tui kiphumna thu a hil zawkciang Galilee ngam pan Israel ngam bup sungah thu lian a piang sia, na heak uh hi.

³⁸Nazareth khua mi Jesus tungah Pathian in Thaa Thiangtho le vaangletna a buak thu huvau tel nu hi. Ama in mun theampo ah pai in, thupha vawt a, Doaimangpa vaangletna nuai ah a om theampo damsak hi. Banghang ziam cile Pathian sia ama taw omkhawm hi.

³⁹Israel te ngamsung le Jerusalem ah a sep a vawt theampo tungtaang ah, kote in tetti ka hi uh hi. Amate in ama sia thinglamtee tungah kilh in, thisak uh hi.

⁴⁰Ahihang Pathian in a ni thum ni ciangin, thina pan thosak a, ama kilanghsak hi,

⁴¹ahihang mihing theampo tungah hi ngawlin, Pathian ii tetti tu a hong teal sate, thina panin a thaw kik zawkciangin, ama taw an nekhawm tui dawnkhawmin a om kote tungah hong kilangh hi.

⁴²Tuaciang ama in, lungdamna thu sia mihingte tungah a hil tu le a thisate le a nungta laite tungah thukhen tu in, Pathian in ama a aap hunlam tetti pang tu in ko hong sawl hi.

⁴³Kamsaang theampo in ama huvau sonsiat uh hi. Ama a umte theampo mihing sim in ama min vaangletna taw a mawnate kimaisak tu hi ci in son uh hi,” ci hi.

⁴⁴Tuabangin Peter a papau laitakin, thu ngai theampo tungah, Thaa Thiangtho tuaksuk hi.

⁴⁵Peter taw Joppa khua pan hong pai, Jew thu umte in, Gentile te tung zongh ah, Pathian Thaa Thiangtho letsong a buak sia lamdang sa uh hi.

⁴⁶Banghang ziam cile amate in, kam tumdangte taw pau in, Pathian letna pok uh hi. Peter in,

⁴⁷“Hi mite in, eima saan bangma in, Thaa Thiangtho saang zo uh hi. Tua ahile amate tui taw ki baptize tu, akua in khaam thei tu ziam?” ci hi.

⁴⁸Tua ahikom Jesus Christ min taw, a ki baptize natu in thupia hi. Tua zawkciangin, ni tawmvei amate kungah a taam lai natu in, Peter tho uh hi.