Read Siyin Chin Sawltakte 13 Bible Online

Sawltakte 13 - Siyin Chin bible

Sawltakte 13

¹Antioch khua pawlpi sungah, kamsaang pawlkhat le syate om hi: Barnabas, (Civompa kici) Simeon, (Cyrene pan) Lucius, (Ngamuk mangpa Herod taw a no ciang a khang khawm) Manaen le Saul ahi uh hi.

²Topa ii na seamin antangin a om laitak, Thaa Thiangtho in, “Barnabas le Saul sia, amate ka sapna bangin nasep seam tu in, kei atu koituam tavun,” ci hi.

³Amate an tangin thungen a, amate tungah a khut uh a ngak zawkciangin, paisak hi.

⁴Barnabas le Saul sia, Thaa Thiangtho in tuabangin sawl ahi bangma, Seleucia khua ah pai a tua mun panin, Cyprus tuikulh ah teambaw taw ding uh hi.

⁵Salamis khua a thet uh ciangin, Jew te ii synagogue te ah Pathian thuhil uh hi. A nasepna hu tu in, John Mark zongh amate taw omkhawm hi.

⁶Amate in tuikulh kaantan in, Paphos ah pai uh a, tua munah mitbum thiampa Bar-Jesus min nei, kamsaang ka hi a ci Jew te khat taw kisii uh hi.

⁷Ama in tuikulh ngamuk mangpa Sergius Paulus ii ngualtamh khat hi a, tua pa in mihing ciim khat ahi hi. Ngamukpa in Barnabas le Saul ama mai ah sam hi, banghang ziam cile, ama in Pathian thu za nuam hi.

⁸Ahihang mitbum thiampa Elymas (Greek min) in amate langpan hi, ama in ngamuk mangpa sia tua upna panin, a lampial natu in, hanciam hi.

⁹Tuasia ciangin Paul a kici Saul in Thaa Thiangtho taw kidim hi; ama in mitbum thiampa tangtan in salh a,

¹⁰“Nang Doaimangpa tapa awng! Nang in a pha ci theampo ii ngalin pang ni hi. Nang in ngitlo thimthel pilna theampo taw kidim ni hi, tuaciangin, Topa ii thumaan thutakte sia leilot thu suaksak tu in hanciam tawntung ni hi!

¹¹Topa khut in tu in, nang tungah hong paisuk tu hi; na mit tawcip tu a, tuaciangin, sun khuavak sia hun khat sung teng na mu thei buatu hi,” ci hi. Thakhat thu in, Elymas in, ama mittangte khuavui tuamcip bangin, thuak a, ama khut lenin lamlak tu mihing zongin, vak kawkoai hi.

¹²Ngamuk mangpa in, thupiang teng a mu ciangin, ama in um hi. banghang ziam cile Topa thu a kihilciannate nasia takin, lamdang sa hi.

¹³Paul le a pawl a lawmte sia Paphos khua panin, teambaw taw ding a, Pamphylia ngam khuapi khat ahi Perga a thet uh ciangin, tuak ah John Mark in amate nusia in Jerusalem ah heak kik hi.

¹⁴Amate sia Perga pan paisuak in, Pisidia ngam Antioch khua theng a, tuaciang Sabbath ni in synagogue sungah tum in to uh hi.

¹⁵Moses Thukham le kamsaangte lai atte a sim zawk uh ciangin, synagogue uliante in: “Suapuite awng, hanthot nopna thupuak nong nei uh le, mihingte tungah nong son tu ka dei uh hi,” ci hi.

¹⁶Paul dingto in, a khut vaan a, thuson tu in kipan hi: “Hiak ah Pathian bia in a om, Israel minampuite le Gentile theampo awng: hong ngai tavun!

¹⁷Israel minamte ii Pathian in ih taanghpupite na teal a, Egypt ngam ah peamta in a teen hun sungin, minam lian khat in, na siam hi. Pathian in amate sia Egypt ngam panin, vaangletna lian taw pusua pui a,

¹⁸kum sawmli sung sennealngam sungah, amate a thuak kenkon hi.

¹⁹Amate in Canaan ngam ah, minam salite lalsak in ama minamte in, a ngam uh luasak hi.

²⁰Hi hun sung theampo kum zali le kum sawmnga sung bang ahi hi. “Tuasia zawkciang Pathian in amate sia, kamsaangpa Samuel hun dong, thukhenmangte pia hi.

²¹Tuaciang amate in, kumpi khat a nget uh ciang Pathian in Benjamin suan Kish ii tapa Saul sia kum sawmli sung kumpi seam tu in pia hi.

²²Saul a hep zawkciang Pathian in David sia kumpipa suaksak hi. Pathian in tua pa huvau hi bangin ci hi: ‘Jesse tapa David in ka thin taw a kisi mihing nam hi a, seam a ka oai theampo a seam tu pa khat hi ci in ka mu zo hi.’

²³David ii suan Jesus sia Pathian in kamciam a piaksa bangma in, Israel mite ii Hunpa hisak hi.

²⁴Jesus in a nasep a kipat ma in, John in Israel te theampo a mawnate uh pan, kisiik kik hamtang in, tui a kiphum uh kul tu hi, ci in thuhil hi.

²⁵Tuaciang, John in a nasep a zaw kuan sang ciangin, mihingte munah, ‘Kei sia akua hong sa nu ziam? Kei sia note ii lamen a na ngak uh pa hi ngawl khi hi. Ahihang ngai vun! Ama in kei nungah hong pai lai tu a, ama peangdap suut tu in, ka kilawm bua hi,’ ci hi.

²⁶“Abraham suan Israel ka mipuite le, hi sungah Pathian a bia Gentile te theampo awng, hi ngupna thu ei tungah hong kipuak zo ahi hi!

²⁷Tua in banghang ziam cile, Jerusalem ah a om mihingte le a lampuite in ama sia Hunpa ahi hunlam he ngawl a, Sabbath ni sim a kisim kamsaangte ii kammalte zongh a tel bua uh hi. Ahihang amate in Jesus a puavawk na uh taw, kamsaangte sonna teng, a taangtungsak a suak hi.

²⁸Amate in, Jesus tungah thidaan a piak natu thu mu zo ngawl ahihang Pilate munah, a thalupsak natu in ngen uh hi.

²⁹Laithiangtho sungah ama huvau a kison theampo a vawt zawkciang amate in thinglamtee tung pan khiasuk a, thaankuul khat sungah koi uh hi.

³⁰Ahihang Pathian in thina pan thosak kik hi.

³¹Tuaciang Galilee pan Jerusalem ah a khualhaw puite tungah ni tam ma kilak hi. Tu in amate in Israel mite tungah ama ii tetti te ahi uh hi.

³²Tuaciangin Lungdamna Thupha no tungah hong puak tu in, kote hi sungah kong om uh hi: Pathian ii ih taanghpupite tungah a sep a vawt tu kamciam a piak sia, Jesus nungta kik tu in, a thaw kiksakna taw, ei a suan a paalte tungah, tu in tua kamciam hong tungsak ahi hi. Psalm a niina sungah hi bangin ki at hi, ‘Nang in ka Tapa na hi hi; tuni in na Pa ka suak zo hi.’

³³

³⁴Thina sung pan a thaw kik natu le, thaan sungah a muat ngeingawl natu in, Pathian sonna in hi bangin ci hi, ‘David tungah ka kamciam ahi a thiangtho le a maan thupha sia no tungah kong pia tu hi.’

³⁵Laithiangtho mundang khat ah zongh hi bangin ci takpi hi. ‘Nang tungah a thumaan na naseampa thaan sungah na muatsak nuam buatu hi.’

³⁶Banghang ziam cile David in a nuntak lai in Pathian ii deinate a sepsak zawkciang thi a, a taanghpupite taw kivui khawmin thaan sungah muat hi.

³⁷Ahihang Pathian ii thina pan a thaw kiksak pa sia thaan sungah muat ngawl hi.

³⁸Ka mipui Israel te awng, na heak tu ka dei uh thu sia Jesus tungtawnin mawnate kimaisakna hong kihilna thu hi; ama a um peuma in, Moses thukham ii hong suataksak zawk ngawl mawnate theampo panin, hong kisuataksakna thu ahi hi.

³⁹

⁴⁰Tua ahikom kamsaangte ii hi bangin a ci teng sia, no tungah hong tun ngawl natu in, kidawm tavun;

⁴¹‘En vun, ngual selno theite awng! Lamdang sa in thi tavun! Banghang ziam cile tuni in ka nasep sia a khiakna hong son a om hial zong, na um thei buatu hi!’ ” ci hi.

⁴²Paul le Barnabas in synagogue a nusiat uh laitakin, Sabbath ni kik ciang, amate pai kik a, hi thute a son thua lai natu in mite in sam uh hi.

⁴³Kikhopna panin mipite a cia zawkciangin, Paul le Barnabas sia Jew mi tam mama le Jew te biakna sungah a tum Gentile mi tam mama in zui uh hi. Pathian ii thuthiamna sungah kip in, a nuntak natu sawltakte in, amate sonpui in hanthawn uh hi.

⁴⁴Sabbath ni kik ciangin, khuapi sungah a om mihing theampo phial in Topa kammal ngai tu in pai uh hi.

⁴⁵Jew te in mihonpite a mu ciangin, eenna thin taw kidim uh a; Paul thusonte nialin, selno uh hi.

⁴⁶Ahihang Paul le Barnabas in, hang seseam in thuson uh hi: “Pathian thu, no kungah hong kihil maksak tu kisamh hi. Ahihang tuasia nialin tawntung nuntakna taw noma le noma kiphu na kisak ngawl uh hu in, no hong nusia in, Gentile te kungah pai tu khu hi,” ci hi.

⁴⁷Banghang ziam cile hi sia Topa ii hong thupiak ahi hi; ‘Leitung bup a kingup thei natu, Gentile te atu in nang sia khuavak khat in kong vawt zo hi,’ ci hi.

⁴⁸Gentile te in hi thu a zaak uh ciangin, lungdam a, Topa ii thupuak a pok uh hi; tuaciangin tawntung nuntakna nga tu a, a kiteal sate thu umte suak uh hi.

⁴⁹Tua ngamsung mun theampo ah Topa kammal kizel hi.

⁵⁰Ahihang Jew te in khuapi sung lampui upate le Pathian a bia Gentile numei a ci thei thu neite hol uh hi. Amate in Paul le Barnabas vawtsiat kipan a, ngam puasia ah hawlkeak uh hi.

⁵¹Sawltakte in amate a nalhna in, a peang tungah a baang leivuite thin san uh a, Iconium ah paitan uh hi.

⁵²Antioch khua ah thu umte in lungdamna le Thaa Thiangtho taw kidim uh hi.