Read Siyin Chin Sawltakte 14 Bible Online

Sawltakte 14 - Siyin Chin bible

Sawltakte 14

¹Iconium khua zongh ah tuabang ma in thu piang hi: Paul le Barnabas sia synagogue ah pai in thu a son uh ciangin, Jew te le Gentile mihing tam mama thu um hong suak uh hi.

²Ahihang a um nuam ngawl Jew te in, Gentile te holin thu umte langpansak hi.

³Sawltakte tua munah khuangei ma taamin, Topa huvau hangsan takin hil uh hi; Topa thuthiamna huvau amate ii thupuakna maan hi sia le nalamdang lakna te le a lamdangte vawt thei na vaang Topa in amate tungah a piakna taw kiciansak hi.

⁴Khuapi sungah mihingte kikhen uh a: pawlkhat in Jew te panpui a, a dang teng in sawltakte sangah pang uh hi.

⁵Tua zawkciang, Gentile te le Jew te pawlkhat in amate ii lampuite taw kopin, sawltakte vawtsiat tu khensat a, suangtum taw den sawm uh hi.

⁶Sawltakte in hi thu a phaw uh ciangin, Lycaonia ngam khuapi liante ahi Lystra le Derbe khuate le a kiim ngam teng ah tai uh hi.

⁷Tua munah amate in Lungdamna Thupha hil uh hi.

⁸Lystra khua ah a pian pan kipan, a peangbai a, lampai thei ngeingawl, pasal khat om hi.

⁹Tuak ah Paul ii thuson ngai in to hi. Paul in ama ii upna mu a, kidamsak thei tu ci in mu ahikom ama tangtan in en a,

¹⁰“Na peang taw dingmaam in!” nging takin ci hi. Pasalpa zongh kilawn to in, vak kawkoai hi.

¹¹Mihonpite in Paul nasepna a mu uh ciangin, amate in Lycaonia kam taw au tek uh a, “Pathiante sia mihing bang suakin, ei kungah hong paisuk hi!” ci uh hi.

¹²Amate in Barnabas sia Zeus ci in min pia a, Paul sia a thusonpipa ahikom, Hermes ci in min pia uh hi.

¹³Zeus pathian biakinn sia khuapi pua sangah om a, a thiampipa in khuitalte le paakte taw biakpiakna vawt natu in, khuapi kongbiang ah paipui hi. Banghang ziam cile, ama le mihonpite in sawltakte sangaw biakpiakna pia nuam uh hi.

¹⁴Tua mite in bang vawt sawm ci thu a zaak ciangin Barnabas le Paul in, amate puansilh lai uhte baltham in tai a, mihonpite laizang tuu in,

¹⁵“Banghangin hi bangin, ngamta thong nu ziam? Ko zongh mihing thawthong hi a, noma bangma hi lel khu hi! Ko sia hi sungah, Lungdamna Thupha thangsak tu, hi a man nei ngawl nate panin a nungta Pathian sangah hong kiheaksak tu ka hi uh hi. Tua Pathian in vantung, leitung, tuipi, le tuate sung a om theampo a vawtpa ahi hi.

¹⁶A bosa hunte sungah, ama in mihing theampo a uuk bang tek po in ngamtasak hi.

¹⁷Ahihang, ama ii na pha a vawtte taw ama a om hunlam sia kitelthiangsak tawntung hi: Ama in note vantung pan nguatui hong pia a, lo ante a hun maanin hong pia hi. Ama in an hong pia a, na thinsung uh lungdamna taw, hong kidimsak hi,” ci in au hi.

¹⁸Sawltakte in, hi bang teng pau napi mihonte ii amate sangaw biakpiakna a piak nopna pan khaam la dektak uh hi.

¹⁹Pisidia ngam Antioch khua pan le Iconium panin Jew te pawlkhat hong pai hi; amate sangah mihonpite zol zo in Paul sia suang taw deang a, tuaciang thi zo sa ahikom khua pua ah taalkai uh hi.

²⁰Ahihang thu umte ama kiimkot ah hong kikhoptua uh ciangin, ama thoto a, khua sungah pai kik hi. A zing ciangin ama le Barnabas sia Derbe khua zuan uh hi.

²¹Paul le Barnabas in Derbe khua ah Lungdamna Thupha hil uh a, nungzui tam mama nga uh hi. Tua zawkciangin amate Lystra ah pai kik a, tua mun panin Iconium ah, tua zawkciang Pisidia ngam Antioch khua ah paisuak uh hi.

²²Amate in thu umte thakho sua uh a, upna sungah thumaan in a kip natu uh hanthawn uh hi. “Pathian Ngam sungah ih tum thei natu in, ngimna tam mama ih kaantan kul tu hi,” ci in hil uh hi.

²³Amate in pawlpi sim ah pawlpi upate tealin koi uh a, thungetna le an tanna taw amate ii muan ahi Topa tungah tua upate aap uh hi.

²⁴Pisidia ngam a kaantan zawk uh ciangin, Pamphylia ngam theng uh hi.

²⁵Perga khua mite tungah thu a hil zawkciangin, Attalia khua ah pai uh hi.

²⁶Tua mun panin Antioch khua ah teambaw taw ding kik uh hi. Tua khua sia, tu a, amate ii nasep a mansa uh sia atu in Pathian ii thuthiamna sungah a ki aapna khua ahi hi.

²⁷Antioch a thet uh ciangin, amate in, pawlpi mite khawmtua a, amate tungah, Pathian nasepna theampo le Gentile te ii thu a up natu lampi a honsakna thute son uh hi.

²⁸Amate tua munah thu um mite taw khuangei ma taam uh hi.