Read Siyin Chin Sawltakte 15 Bible Online

Sawltakte 15 - Siyin Chin bible

Sawltakte 15

¹Judea panin, Antioch ah mihing pawlkhat hong pai a, thu umte tungah, hi bangin hilcian tu in hong kipan in, “Moses thukham om bangin, na vunteap uh na at bua uh le, ngupna na nga thei buatu uh hi,” ci uh hi.

²Paul le Barnabas in hi thu huvau ah, amate taw nasia takin, kinial uh hi. Tua ahikom Paul, Barnabas le Antioch khua a om pawlkhat, Jerusalem ah hi thu taw kisai in pai a, sawltakte le upate taw kimu tu in, khensat uh hi.

³Pawlpi ii sawlna taw amate a pai hi a, Phoenicia le Samaria kaantan in, a pai uh ciangin, Gentile te ii Pathian sangah a kikhealna thu ko uh hi. Tua thu in thu um theampo, nasia takin lungdamsak hi.

⁴Jerusalem a thet uh ciangin, pawlpi in amate vai na dawn uh a, sawltakte le pawlpi upate tungah amate tungtawnin Pathian ii a sepna theampo son uh hi.

⁵Ahihang Phariseete pawlsung panin, thu um mi pawlkhat ding a, “Gentile te in, vunteap a at uh kul tu hi. Moses Thukham a nit natu son kul tu hi,” ci uh hi.

⁶Sawltakte le pawlpi upate, hi thu huvau kikum tu in, kisitua uh hi.

⁷Ngei ma a kinial zawk uh ciang, Peter ding a, “Ka suapuite awng, khuangei pek lai in, Gentile te ii a zaak thei natu le a up thei natu in, Lungdamna Thupha hil tu in, no sung pan Pathian in keima hong teal ahi hunlam sia na heak uh hi.

⁸Tuaciang, a kuama po ii thinsung a tel Pathian in, Gentile te a saanna, a lakna in ei tungah hong piak bangma in, amate tungah Thaa Thiangtho pia hi.

⁹Ama in ei le amate hong doi tuan ngawl hi. Amate in um ahikom a mawnate maisak hi.

¹⁰Tua ahile eite ih hizong, taanghpupite ahizong, a puak zawk ngawl vanhte thu umte nungzaang ah suanhin, banghang tu in Pathian ze et sawm nu ziam?

¹¹Suak ngawl hi! Eite in zongh amate bangma ih um a, Topa Jesus thuthiamna taw ngupna ih nga hi,” ci hi.

¹²Paul le Barnabas in Pathian ii amate tungtawn a, Gentile te sungah, nalamdang laknate le a lamdang theampo a sep a vawt a ko uh a zaak uh ciangin, a pawl bup thim dide in om uh hi.

¹³A son tu teng a man zawkciangin, James hong pau a “Hong ngai tavun, suapuite awng!

¹⁴Amate sung panin, ama atu minam tuam khat a laakna taw Pathian in Gentile te a thinbotna a lak phitna thu sia, Simon in a son zawk bek ahi hi.

¹⁵Kamsaangte kammalte zongh hi thu taw kisi siat hi. Laithiangtho in hi bang ci hi.

¹⁶‘Hisia zawkciangin Topa in kong heak kik tu ci hi, tuaciangin David kumpi ngam ka pua pha kik tu hi. A lalcipna pan ka sa kik tu a, ka thahatsak kik tu hi.

¹⁷Tuaciangin midang theampo le, keima neisa tu in ka sapsa Gentile mi theampo in kei hong zuan tu hi ci in,

¹⁸hi thu taangh tawngh laipek pan a hesak Topa in son hi.’

¹⁹James in, “Kei ngaisutna ah, Pathian sangah a kiheak ahi Gentile te, ih buaisak ngawl tu sia thupi ka sa hi.

²⁰Tua hi ngawl zawin, amate tungah lai ih thaak tu a, milim biakna in a kizak hu in a thiangtho ngawl ante a neak ngawl natu; numei le pa khialna panin, a kikep natu; nganhing a tawl kimeaklumte sa a neak ngawl natu le sachi neak ngawl natu, lai thaakin ih son tu hi.

²¹Banghang ziam cile, Moses Thukham sia Sabbath ni simin, synagogue te ah khuangei hialma kisim zo a, ama kammalte sia khua sim ah kihil zo hi,” ci hi.

²²Tua zawkciangin, sawltakte le pawlpi upate in pawlpi mi bup taw kikum a, Paul le Barnabas taw Antioch ah pai tu in, pawl sung pan mihing pawlkhat a teal natu khensat uh hi. Amate in Barsabbas kici Judas le Silas teal uh hi. Amate ngeal sia thu umte ii a zatak mama ahi uh hi,

²³amate in hi laithakte puasak uh hi: “Ko sawltakte le pawlpi upate, na suapuite in Antioch, Syria le Cilicia a teang Gentile suapuite theampo tungah, kipaupuina lai kong thaak uh hi.

²⁴Eima pawl sung panin, mihing pawlkhat in, amate ii sonna taw no hong thinngimsak, hong nawngkaisak tu in, hong pai hi, ci in za khu hi; ahihang hi bangin hong ngamtat natu in, ko tung pan amate in bangma sawlna nga ngawl uh hi.

²⁵Tua ahikom ka kikhawm uh a, thataak pawlkhat tealin no kungah paisak tawng, ci in ka thukim siat uh hi. Amate sia ih it ih lawmte ahi Barnabas le Paul taw hong paikhawm tu hi,

²⁶amate sia Topa Jesus Christ nasepna atu, a nuntakna uh a bo tu a lauhuai dongin, a kipumpiakte ahi hi.

²⁷Tua ahikom, Judas le Silas kong paisak uh hi. Amate in lai taw kong at uh teng, kam taw hong son tu uh hi.

²⁸Thaa Thiangtho le ko ii thukimna pan, hi zui tu a kul ngeinate ngawl buang a dang vanhngit kong suan nuam bua uh hi:

²⁹milim biakna ah a kipiasa an peuma na ne heak vun; sachi na ne heak vun; a tawl a kimeaklum nganhingte sa na ne heak vun. Numei le pa khialna panin, na kikeam tavun. Hi teng na tang zo po le uhte pha tu hi. Dam tek tawng.” ci in at uh hi.

³⁰Thataakte kipaisak a, Antioch khua theng uh hi. Tua munah thu umte pawl bupin kikhawm a, a laithak sia pia uh hi.

³¹A laithak a sim uh ciangin, hanthotna kam in, amate lungdamna taw kidimsak hi.

³²Amate mama kamsaang ahi Judas le Silas in, thu umte taw ngei ma thuson khawm uh a, thin letna le tha ngana neisak uh hi.

³³Tua munah hun tawmvei a zak zawk uh ciangin, thu umte in amate thinnuam takin tha kik uh a, amate in pai tu a sawlte kungah heak kik uh hi.

³⁴Ahihang Silas in tua munah taam tu in khensat hi.

³⁵Paul le Barnabas in, Antioch ah hun tawmvei sung zangh uh a, mi dang tam mama taw kikop in, Topa kammal hilcian in thuhil uh hi.

³⁶Tawmvei zawkciang Paul in Barnabas tungah, “Heak kik tawng i, Topa kammal ih thuhilna khua sim ah a om ih suapuite munah haw kikin, amate bangbang om ziam, ci in dawp tawng,” ci hi.

³⁷Barnabas in, John Mark sia amate taw tonpui nuam hi.

³⁸Ahihang Paul in, tua pa a kaizot tu sia suak a sa bua hi. Banghang ziam cile, a nasep man dong, ompui ngawlin, John Mark in amate sia Pamphylia ah nusia in heak kik hi.

³⁹Amate nasia takin kinial a, kikhen uh hi: Barnabas in Mark samin Cyprus zuan tu in, teambaw taw ding hi.

⁴⁰Thu umte in Topa ii a thuthiamna sungah a kepcing natu in, a aap zawkciang, Paul ahile Silas teal a, ding hi.

⁴¹Ama in Syria le Cilicia kaantan in pai a, pawlpite tha kho sak hi.