Read Siyin Chin Sawltakte 19 Bible Online

Sawltakte 19 - Siyin Chin bible

Sawltakte 19

¹Corinth khua ah Apollos a om laitak, Paul sia tua ngamkhen sungsang kaantan in khualhaw a, Ephesus theng hi. Tua munah nungzuite pawlkhat mu a,

²tuaciang, ama in “Thu um mite na sua uh ciang, Thaa Thiangtho na nga uh ziam?” ci in dongh hi. Amate in “Thaa Thiangtho a om hunlam za zongh za bua ung,” ci in zo uh hi.

³“Pha hi, tua ahile bang tui kiphumna nam sia na saang uh ziam?” ci in Paul in dongh hi. “John ii tuiphumna sia hi,” ci in zo hi.

⁴Paul in, “John ii tuiphumna sia in mawnate pan a kisiikte atu ahi hi; tuaciang ama in Israel te tungah, ama nung pan hong paipa na um vun — - tua pa in Jesus hi,” ci hi.

⁵Amate in hi thu a zaak uh ciangin, Topa Jesus min taw tui kiphum uh hi.

⁶Paul in amate tungah a khut nga a, Thaa Thiangtho amate tungah hong theng hi; amate in kam tumdangte taw pau uh a, Pathian ii ngupna thute zongh thangsak uh hi.

⁷Amate a vekpi in, sawm le nii khawng pha uh hi.

⁸Paul in Jew te synagogue ah pai a, tha thum sung hangsan takin mihingte tungah thuson a, amate taw thu kikum in, Pathian Ngam thu a upsak zawk natu hanciam hi.

⁹Ahihang pawlkhatte a thinpui in, a um nuam bua uh a, mihon bup mai ah amate in Topa Lampi sonsia uh hi. Tua ahikom Paul in amate nusia in, thu umte paipui a, ni simin Tyrannus laihilna inndoi lian sungah kikupna nei uh hi.

¹⁰Hi bangin kum nii tawntung a kalsuanpui ciangin Asia ngamkhen a teang Jew te le Gentile te in Topa kammal za uh hi.

¹¹Paul tungtawnin Pathian in nidang in a om ngeingawl, nalamdang laknate vawt hi.

¹²Ama zak mai nawlna le awmdap puante ngawngawn ciinate kungah a kipaipui ciangin a natnate dam a, thaa ngilote zongh amate sung pan pusuak uh hi.

¹³Jew te pawlkhat khualhaw in vakkot a, thaa ngilo a notte zongh in thaa ngilo a naw natu in, Topa Jesus min zak tu hanciam uh hi. Amate in thaa ngilo te munah, “Paul ii a hil Jesus min taw keima in thu kong pia hi,” ci hi.

¹⁴Unau salite ahi, Jew te Thiampi Lianbel Sceva a kici sia ii tapate in hi bang seam uh hi.

¹⁵Ahihang thaa ngilo in amate tungah, “Jesus sia he khi hi, tuaciang Paul zongh he khi hi; ahihang no akua te nu ziam?” ci hi.

¹⁶Thaa ngilo veipa in amate nasia takin buan ngawp a, zocip siat hi. Tua ahikom a liam a bai le puan ekkeak sa in tua pa inn panin tai uh hi.

¹⁷Ephesus khua a teang Jew te le Gentile te theampo in hi thu za uh hi; amate sia launa taw kidim in, Topa Jesus min kipatoai seseam hi.

¹⁸Thu um mite sung pan tam mama hong pai a, amate ngamtatnasate mipi mai ah kheet nei ngawlin pualaak uh hi.

¹⁹Mitbum thiam tam mama in a laibute khawmtua in hong paipui uh a, mipi mu tangin, mei taw haltham uh hi. A laibu man teng a kingawm ciang, ngunntang tul sawmnga pha hi.

²⁰Topa thu sia hi bangin vaangletna taw kizel a, hat vaial hi.

²¹Hi thu teng a pian zawkciang Paul in Macedonia le Achaia ngam kaantan in khualhaw a, Jerusalem ah paitan tu in, khensat hi. Ama in “Tua munah ka pai zawkciang, Rome khuapi zongh ah ka haw kul tu hi,” ci hi.

²²Tua ahikom ama a hute nii Timothy le Erastuste zongh Macedonia ngam ah paisak a, ama ahile, Asia ngamkhen ah hun a tamzaw zangh thua hi.

²³Hi hun laitakin, Ephesus khua ah Topa ii Thu hangin buaina nasia khat hong om hi.

²⁴Demetrius min nei ngunn seakpa in, a numeipathian Artemis ii biakinn limte veu, ngunn taw vawt a, ama nasepna pan a naseamte meetsak mama hi.

²⁵Tua ahikom ama in, a naseam theampo le, tua nasepna taw a kibang a seam mihing dangte khawmtua in, “Pasalte awng, eite nopsakna in hi nasepna pan hong piang hi, ci in na heak tek uh ahi hi.

²⁶Tu in hi Paul a ci sia pa ii ngamtatna babang noma tek in mu thei a, za thei nu hi. Ama in khut taw vawttawm pathian in pathian hi peuma ngawl hi ci a, hi sung Ephesus khua le Asia ngamkhen bup phialma ah mihing tam tatak umsak zo hi.

²⁷Tuaciang ih nasepna a minsiat tu lauhuai hi. Tua bek dom ngawlin, Asia ngam le leitung mun theampo ii a biak tua a lian numeipathian Artemis ii biakinn zongh a luithawthong suakin — a letna teng a kisuksiat tu lauhuai hi!” ci hi.

²⁸Mihonpite in hi kamte a zaak uh ciangin, a thinso a, “Ephesus khua ah om Artemis ma lian hi!” ci in au uh hi.

²⁹Tua ngamlumna sia khuapi bup kilaw hi. A ngilo nuam mihon in, Paul ii khualhawpui Macedonia te nii Gaius le Aristarchus pummat a, poai lakna inn ah taipui uh hi.

³⁰Paul in mihonte mai ah, pai nuam ahihang, thu um mite in a oai bua uh hi.

³¹Ama lawm ngamkhen sungah thunei pawlkhatte in zongh poai inn ah ama le ama a kilaak ngawl natu in thu zasak uh hi.

³²Tua laitakin a kikhopna buppi sungah ngamlum seseam hi; pawlkhat in thu pawlkhat taw au a, a dangte in thudang khat taw au uh hi, banghang ziam cile mihing a tamzaw in, amate banghangin kikhawmtua ziam ci zongh a tel bua uh hi.

³³Mihing pawlkhat in Alexander maw hi vak ci uh hi, banghang ziam cile Jew te in ama sia mai ah paisak uh hi. Tuasia ciangin, Alexander in mihonpi a thim natu a khut vaanin ama a kihuk natu in, thuson tu hanciam hi.

³⁴Ahihang ama sia Jew te hi ci in a tel uh ciangin, a au ngei uh bangin, “Ephesus khua ah, Artemis lian hi!” ci in nai nii sung au hon uh hi.

³⁵A khakbel ciangin khuapi lai atpa in, mihonte thimsak thei hi. Ama in “Ephesus khuapuite awng! Ephesus khuapi sia a lian Artemis biakinn le vantung pan hong taaksuk suang thiangtho a keam sia ahi hunlam a kuama po in, ih heak ahi hi.

³⁶Hi thute kuama in nial thei ngawl tu hi. Tua ahikomin, note thim vun a, maitatna bangma vawt heak vun.

³⁷Amate in, biakinnte le phuul ngawl a, ih numeipathian huvau, kamsia le pau ngawl hi napi, note in pasal hite hi sungah hong paipui nu hi.

³⁸Demetrius le a naseamte in, mi pawlkhat tungah thu vawt nopna nei na hi uh le, thu neite le zumhon hun a maan thukhenzum ih nei hi; tua munah thu kivawt thei hi.

³⁹Ahihang tua sangin na dei zawk uh a om le, upadi bangin ngammite kikhopna ah khensat kul tu hi.

⁴⁰Banghang ziam cile, tuni a thupiang teng zawkciang, ei tungah buaina piangsak hi, ci in maw hong kizon kik tu lauhuai hi. Hi bangin buai natu bangma thu om ngawl a, hisia hang ci zongh ih son thei tu bangma om ngawl hi,” ci hi.

⁴¹Hi teng a ci zawkciangin, a ma in kikhopna tawpsak hi.