Read Siyin Chin Sawltakte 21 Bible Online

Sawltakte 21 - Siyin Chin bible

Sawltakte 21

¹Amate ka vaitha uh a, ka nusia uh hi. Teambaw taw a tangtan in, ka pai uh ciang, Cos ka theng uh hi; a zing ciangin Rhodes ka theng uh a, tua mun panin Patara ka zuan suak uh hi.

²Tua munah Phoenicia ah a pai tu teambaw khat ka mu uh hi, tua ahikom teambaw tungah kaato in, ka zui uh hi.

³Cyprus a kimu theina mun ka theng uh a, tua zawkciang a thangsang Syria ah ka pai uh hi. Tyre khua ah ka kaa uh a, tua mun sia teambaw vanh sua natu mun ahi hi.

⁴Tua munah thu um mi pawlkhat ka mu uh a, amate kungah nipi khat ka taam uh hi. Amate in Paul sia Jerusalem ah a pai ngawl natu in, Thaa vaangletna taw tho uh hi.

⁵Ahihang amate taw hun ka zak zawkciangin, vai ka ding uh a, koma pai natu ah ka pai uh hi. Amate in a zite a tate taw khuapi puasia dong hong tha in, vaalbo ah ka vekpi khupdin in thu ka ngen uh hi.

⁶Tua zawkciang, khat le khat kivaitha in teambaw tungah ko ka kaa uh a, amate inn ah a cia kik uh hi.

⁷Tui tung ka khualhawna uh ka zom uh a, Tyre pan, Ptolemais ah pai in, tua munah thu umte ka nukset uh a, amate kungah ni khat ka taam uh hi.

⁸A zing ciangin ka ding uh a, Caesarea ka theng uh hi. Tua khua ah thupha puak syapa Philip ii inn ah ka taam uh hi. Ama sia Jerusalem ah a kiteal husya sali sungah khat ahi hi.

⁹Ama in Pathian thu a thangsak, pasal a nei ngawl tanu li nei hi.

¹⁰Tua munah ni tam ma ka taam uh sungin, Judea ngam panin, Agabus a kici kamsaang khat hong theng hi.

¹¹Ama ko kungah hong pai a, Paul kawngkhau la in, ama le ama a khut a peang kisawm a, “Thaa Thiangtho cina pan: Hi kawngkhau a neipa sia Jerusalem ah hi bang danin Jew te in khaukhii tu a, Gentile te khut sungah aap tu hi,” ci hi.

¹²Hi thu ka zaak uh ciangin ko le a dang teng in Paul tungah Jerusalem ah a pai ngawl natu in ka thuum uh hi.

¹³Ahihang Paul in, “Bang son nu ziam? Hi bangin kapin ka thin hong tamhsak nu ziam? Jerusalem ah khau kikhii bek dom ngawlin, Topa Jesus hangin, tua munah a thi tu ngawngawn zong kingingta zo khi hi,” ci in zo kik hi.

¹⁴A thin zaw natu in ka sonpui zo bua uh a, ka ci ka law he ngawlin “Topa deina bang hi tahen,” ka ci uh hi.

¹⁵Tawmvei tua munah hun ka zak zawk uh ciangin, vanh teng kithoai in, Jerusalem ka zuan uh hi.

¹⁶Caesarea pan nungzuite pawlkhat zongh in hong tonpui a, ka taam natu uh Cyprus ngammi thu um ciil khat ahi Mnason inn ah hong then hi.

¹⁷Jerusalem ka thet uh ciangin, thu umte in, nuam takin vai hong muak uh hi.

¹⁸A zing ciangin, Paul taw James kungah ka haw uh hi; tua munah pawlpi upa theampo om uh hi.

¹⁹Paul in amate a nukset zawkciang, ama nasepnate tungtawnin, Pathian ii Gentile te sungah a sep a vawt theampo cing takin ko hi.

²⁰Ama thuson a zaak zawk uh ciangin, amate theampo in, Pathian pok uh hi. Tua zawkciangin, amate in Paul tungah, “Suapui Paul awng, Jew te mihing tul tam mama thu um hong suak zo uh a, amate theampo Thukham nasia takin, a zuite ahi sia na mu thei hi.

²¹Amate tungah nang ii thu a kisonna panin, Gentile ngamsung teng ah a teang Jew theampo ma in, Moses Thukham a nusiat natu, nangma in hilcian a, a tate ii vunteap a at ngawl natu le, Jew ngeinate a zui ngawl natu in sawl hi, ci thu ahi hi.

²²Amate in nang nong thet hunlam za nanak tu hi. Tua ahiciang bang law tu hi ziam?

²³Hi bangin na ngamtat tu in, kong dei uh hi. Kiciamna a vawt sa pasal li hi sungah om hi.

²⁴Amate taw va paikhawm ta'n a, amate ii kithiansuana poai sungah kihel in, sum bona teng zongh piaksak ta'n; tuasia ciangin, amate in a lu uh meettol thei tu hi. Hi bangin hi leang nang thu huvau hong kisonna sia thumaan a hi ngawl hunlam le, nangma mama sia Moses Thukham bang a, a nungta pa na hina thu a kuama po in hong he tu hi.

²⁵Gentile te sung pan thu um a suakte ahile, lai khat thaak zo khu hi, milim biakna in a kizangh an lamsangte neak ngawl natu, chisan ahibuale nganhing a kitawlmeakte ii sa a neak ngawl natu, tuaciang numei le pa paktatna pan a kikep natu in, thu ka khensat uh te, ka son uh hi,” ci hi.

²⁶Tua ahikom Paul in, tua pasalte paipui a, a zing ciangin amate taw a kithiansua hi. Tua zawkciang, ama sia Biakinnpi sungah tum a, kithiansuana hun a man tu dong le amate khat sim atu in sangaw biakpiakna a piak thei tu hun sia zongh ni bangza hi tu ziam ci sia zasak hi.

²⁷Ahihang, a ni sali hun a bo dektak laitakin, Asia ngamkhen pan hong pai Jew te pawlkhat in, Paul sia Biakinnpi sungah mu uh hi. Amate in mihon bup hol in, Paul pummat uh hi.

²⁸“Israel pasalte awng! Hong hu tavun! Hisia pa sia mun theampo ah pai in, Israel te, Moses Thukham le hi Biakinnpi langpan in, hilcianna a neipa hi. Tu zonghin, ama in Gentile te pawlkhat Biakinnpi sungah paipui in, hi a thiangtho mun sia ninsak hi!” ci in au uh hi.

²⁹(Hi bangin a ci theina sia Ephesus khua mi Trophimus sia Paul taw khuapi sungah kithawl khawm in mu uh a, Paul in, tua pa sia Biakinnpi sungah tumpui hi tu in muangmaw uh hi.)

³⁰Telmeal om ngawlin khuapi bup thu kizel a, mihingte tai lialua in, Paul man uh a, Biakinnpi pan kaikeak uh hi. Thakhat thu in Biakinnpi kongkhate kikhak hi.

³¹A ngilo nuam mihonpi in Paul thalup a sawm uh laitakin, Rome ngalkap hon ukpa tungah Jerusalem khua bup buai hi, ci in kiko hi.

³²Thakhat thu in tua ngalkap hon ukpa in ngalkap bu pawlkhat le ngalkap te samin mihonpite del uh hi. Mite in ngalkap bupa le a ngalkapte a mu ciangin, Paul sia a vel nawn bua uh hi.

³³ngalkap hon ukpa in Paul kungah pai a, ama manin thikkhau nii taw khit tu in thupia hi. “Hi sia pa akua ziam? Ama in bang ngamtatna nei ziam,” ci in dongh hi.

³⁴Mihon sung pan pawlkhat in thu khat son a, a dangte in thudang taw au uh a, telmeal om ngawl ahikom, ngalkap hon ukpa in, bang thu tatak piang cisia a tel zo bua hi, tua ahikom ngalkapte teenna kulh huang sungah Paul paipui tu in, a mite sawl hi.

³⁵Keallei dong paipui uh a, tua zawkciangin ngalkapte in, a puak kul hi, banghang ziam cile a ngilo nuam mihonpite thinso ngawp uh hi.

³⁶Amate theampo in, ama nung pan hong pai uh a, “That vun!” ci in aukeak uh hi.

³⁷Ngalkapte in kulh huang sungah Paul a tumpui dektak laitakin, ngalkap hon ukpa tungah, “Thu tawm kong son thei tu ziam?” ci hi. “Greek kampau hi ngawl ni ziam?” ci in ngalkap hon ukpa in dongh hi.

³⁸“Tua ahile nang sia khatvei lai a, ngalphuang in sennealngam sungah ngalhiam toai mi ngilo tul li a lampui Egypt pa sia na hi bua na ziam?,” ci hi.

³⁹Paul in, “Keima in Jew mi ka hi a, Cilicia ngam Tarsus khua ah suakin, khuapi thupi khat ii ngammi ka hi hi. Hi mihingte tungah nong hesuakna in, thu hong sonsak ta'n,” ci hi.

⁴⁰Ngalkap hon ukpa in a khuan pia ahikom Paul in keallei tungah ding a, mihonte a thim natu in, a khut vik hi. Amate a thim uh ciangin, Paul in amate tungah Hebrew kam taw thuson hi: