Read Siyin Chin Sawltakte 25 Bible Online

Sawltakte 25 - Siyin Chin bible

Sawltakte 25

¹Ngamkhen sungah hong thet zawk ni thum ni ciangin, Festus in Caesarea panin Jerusalem zuan a,

²tua munah thiampi liante taw kikopin, Jew lampuite in, Paul langpanin thu vawt uh hi. Amate in Festus munah,

³Paul sia Jerusalem ah a paisak natu ngen uh hi, banghang ziam cile amate in, lampi ah suamlup sawm uh hi.

⁴Festus in, “Paul sia Caesarea ah thongtaak in kikoi hi. Keima mama zongh hai ngawlin tua munah heak kik tu khi hi.

⁵Na lampuite sia Caesarea ah keima taw paikhawm in, Paul in khialna khat po vawt ahile, ama tungah maw kisuanh tahen,” ci hi.

⁶Festus in amate kungah ni liat pan ni sawm dong bang a taam zawkciangin, Caesarea ah pai hi. A zing ciangin thukhenna zum ah to in Paul a sungtan pui natu in thupia hi.

⁷Paul a thet ciangin Jerusalem pan hong pai Jew te in, a kiimkot ah dingin, a nasia mawsakna tam mama nei ahihang amate in, a maan takin a lak thei bua uh hi.

⁸Ahihang Paul in ama le ama kihung a, “Jew te Thukham langpanna ahizong, tua ahibuale Biakinnpi langpanna ahizong, Rome Kumpilianpa langpanna ahizong, bangma sep khial nei ngawl khi hi,” ci hi.

⁹Festus in Jew te ii maipha nga nuam ahikom, Paul munah “Jerusalem ah pai in, hi maw kisotnate huvau sia, tualai keima mai ah thusitna na thuak nuam ziam,” ci in dongh hi.

¹⁰Paul in, “Kumpilianpa ii thukhenna zummai ah thusit thuak tu in ka ding hi. Nangma mama ii na heak bangin, Jew te tungah bangma sep khial nei ngawl khi hi.

¹¹Thi daan taw kiphu in, thukham paltanna le sepna khat po nei hi leng suatak natu kong ngen bua hi. Ahihang amate ii kei tungah, maw hong sot nopnate sungah thumaan om ngawl ahile, amate khut sungah kuama in kei hong aap thei ngawl tu hi. Kumpilianpa tungah a zukhaan khi hi,” ci hi.

¹²Tuasia ciangin Festus in, ama ngaisutna a pia upate taw a kikup zawkciangin, “Kumpilianpa tungah a zukhaan zo na hikom Kumpilianpa kungah pai tu ni hi,” ci in zo kik hi.

¹³Hun tawmvei zawkciangin, Kumpipa Agrippa le Bernice sia Festus taw kimu nuam in Caesarea ah haw uh hi.

¹⁴Tua munah ni tam ma a om zawkciang, Festus in Paul omzia sia kumpipa tungah sonthiang hi. “Hi sungah Felix ii a nusiat thongtaak pasal khat om hi,

¹⁵tuaciang, Jerusalem ah ka pai ciangin, Jew te ii thiampi liante le upate in, ama tungah thu vawtin, mawsak natu hong ngen uh hi.

¹⁶Ahihang ko Rome mite in khialna lian khat taw a kimawsiat mihing khat pawpo sia ama tungah maw a suanhte taw maitang kisi in, ama tungah a kisuanh mawnate panin, ama le ama a kihuk natu hun a nga mateng, kuama khut sungah aap thei ngawl ka hi uh hunlam ka son hi.

¹⁷Amate hi sungah hong pai ciangin, hun bosak thong ngawlin, a zing ciang mama in, thukhenna zum ah ka to a, a mihing pa sia hong paipui natu in ka sawl hi.

¹⁸Ama a langpante hong ding a, ahihang ka muanmawk bangin, a sia khialna liante taw a mawsiat bua uh hi.

¹⁹Amate vai theampo sia a biakna le Jesus min nei mihing thisa khat ii thu huvau a kinial uh teng ahi hi; Paul in tua pa sia nungta hi, ci hi.

²⁰Hi thute tungtaang ah thu a cingin ka nga thei natu lam sia, ka khensat thei paih bua hi, tua ahikom Paul munah hi mawsiatnate huvau in Jerusalem ah, thu na kisit nuam ziam, ci in ka dongh hi.

²¹Ahihang Paul in a zukhaan hi; ama a kicin lai natu le, Kumpilianpa ii thu a khen natu, ngen hi. Tua ahikom Kumpilianpa kungah ka puak thei dong, ama a kicin lai natu in, thu ka pia hi,” ci hi.

²²Agrippa in Festus munah, “Kei mama in hisia pa ii thuson za nuam khi hi,” ci hi. “Zing ciangin ama ii thuson za tu ni hi,” ci in Festus in zo hi.

²³A zing ciangin Agrippa le Bernice sia, mipi kikhopna inndoi sungah ngalkap ukpite le khuapi lampui upate taw, nasia tak kithoai in hong pai a, kiletsakna taw hong tum uh hi. Festus in thupia a, Paul tumpui hi.

²⁴Festus in, “Kumpipa Agrippa le hi sungah ko taw a omkhawmte theampo awng: hi sung le Jerusalem a om Jew te theampo ii kei tungah hong khiakpa sia hisia pa hi a, mu tek nu hi. Amate in ciik au uh a, nungta nawn mama heak hen, ci uh hi.

²⁵Ahihang thidaan taw a kiphu tu ngamtatna nei hi, ci in ka mu zo bua hi. Tuaciang, ama mama in Rome Kumpilianpa tungah a zukhaan ahiciang puak tu in ka khensat zo hi.

²⁶Ahihang Kumpilianpa tungah ama thu huvau a kician lai at tu bangma ka nei bua hi. Tua ahikom noma mai hi sungah kong paipui hi — a tuanin Kumpipa Agrippa mai ah kong paipui hi! tua hile a thu a kikat zawkciangin, thu pawlkhat ka at tu om thei tu hi.

²⁷Banghang ziam cile, ama mawna hi bang teng hi ci in, a kician om ngawl pipi in, thongtaak pa khat ka puak tu sia, suak thei ka sa bua hi,” ci hi.