Read Siyin Chin Sawltakte 26 Bible Online

Sawltakte 26 - Siyin Chin bible

Sawltakte 26

¹Agrippa in Paul munah, “Nangma thu sia nangma mama ii son thei natu thu kong pia hi,” ci hi. Paul in a khut laam in, ama le ama sia hi bangin kihung hi.

²“Kumpipa Agrippa awng! Jew te ii maw hong zonna theampo pan, tuni in na mai ah keima le keima ka kihun thei tu le,

³a tuanin Jew te ngeinate le a thu kinial theina theampo pha takpi in tel na hikom hampha ka kisa hi. Tuaciang thinsau takin nong ngai natu in kong thuum hi.

⁴“Jew te theampo in ka no tuung a kipan, ka nuntakzia hong he hi. A masa in keima pianna ngam le tua zawkciang Jerusalem khua ah ka nuntakzia theampo hong he uh hi.

⁵Amate in tetti hong pansak nuam thong le, a ciil panin, biakna sungah a phinciingbel Pharisee pawlmi khat ka hi sia, hong heak tawntung sa hi.

⁶Tuaciang tu in hi sungah thusit ka thuakna ii ahang sia Pathian ii taanghpupite tungah kamciam a piakte ka lamet hu ahi hi —

⁷koma minam sawm le niite ii a sun a zanin Pathian ka biak uh ciang tua kamciam bangin nga tu sia ko ii lamet thu ahi hi. Vaangnei Kumpi awng, hi lametna hangin, Jew te in kei sia hong mawsak hi!

⁸Banghangin no hi sungah a omte in, a thisate sia Pathian in thosak kik tu in um thei ngawl nu ziam?

⁹Keima mama in Nazareth mi Jesus thu langpanin ka sep thei za in seam tong a ci pa ka hi hi.

¹⁰Tuabang sia Jerusalem ah ka ngamtatna ahi hi. Thiampi liante tung panin, thu ka nga a, Pathian ii mihingte tam ma thong sungah ka khum hi; tuaciangin, amate sia thidaan a kipiak ciangin, kei zongh in ka thukimpui hi.

¹¹Tamvei ma, synagogue te ah daan ka piasak a, a upna uh a kheal thei natu in, ka hanciam hi. Amate tungah ka thin uuk mama ahikom, ngamdang a khuapite ngawngawn ah, ka pai a ka vawtsia hi.

¹²“Hi bang tupna le sawmna seam tu in, Damascus khua ah ka pai a, thiampi liante ii thuneina le thupiaknate ka keng hi.

¹³Kumpipa awng, lampi tungah sun laitakin ni sangin, a taang zaw khuavak taang khat in kei le ka khualhawpuite, kiim ah van panin hong taangsuk keak hi.

¹⁴Ka vekpi in lei ah ka puk uh hi. Tuaciang aw khat ka za a, kei tungah Hebrew kam in, ‘Saul, Saul awng! Banghangin hong vawtsia ni ziam? Khuital khat in a neipa ii toai ngan hawlna ciang sia a peak kik bangin, nangma le nangma kikha kik in kiliamsua ni hi,’ hong ci hi.

¹⁵‘Akua ni ziam? Topa’ ci in ka dongh hi. Tuaciang Topa in, ‘Kei sia nong vawtsiat Jesus khi hi.

¹⁶Ahihang tho in a ding in, nang tungah kong kilakna sia ka naseam tu a, kong koi nop hang ahi hi. Tuni a keima nong mu teng le maisang a kong lak pheang tu teng midangte munah son tu ni hi.

¹⁷Keima in Israel te khut sung pan le nangma kong puak natu Gentile te khut sung panin kong suatak tu hi.

¹⁸Nang in amate mit na honsak tu a, amate sia khuazingna sung panin, khuavakna ah, Satan vaangletna panin, Pathian kungah na kiheaksak tu hi. Tua hile amate in keima hong upna tungtawnin, a mawnate uh kimaisak tu a, Pathian tealsa mite sungah amate in omna nga tu uh hi.’

¹⁹“Tua ahikom, Kumpipa Agrippa awng, vantung pan ka nga mukholna sia ni ngawlin ka om bua hi.

²⁰A masa phitbel in Damascus le Jerusalem ah, tua zawkciangin, Judea ngam bup le Gentile te sungah, amate in a mawnate kisiik nanak a, Pathian sangah kiheak in, a kisii kikna thu a lak tu nasepte a sep natu in, thu ka hil hi.

²¹Hi thu hangin, Jew te in Biakinnpi sungah ka om laitakin hong man a, thatlum tu in, hanciam uh hi.

²²Ahihang tuni mama dong Pathian in hong hu top zo ahikom, hi sungah dingin a lian a no mi theampo tungah a kibangin, tetti ka pang hi. Tuabang ka son sia in kamsaangte le Moses ii hong tung tu hi ci in a sonkhol teng ma ahi hi:

²³Jew te le Gentile te tungah ngupna khuavak thu thangsak tu in, Messiah in hong thuak kul tu a, thina panin a tho kik phitbel ahi tu hi, ci sia thu ahi hi,” ci hi.

²⁴Paul in ama le ama hi bang a kihuk ciangin, Festus in oksan a, “Paul awng, na thin amh hi! pilna tam na sinna in na thin hong amhsak hi!” ci hi.

²⁵Paul in, “Kei ka thin amh ngawl hi, A zatakhuai pa awng, keima in thumaan thutak ka son hi.

²⁶Kumpipa Agrippa awng! Nang tungah hang takin hong son thei khi hi; banghang ziam cile nangma in hite huvau he ni hi. A piang sa nate khat simin, ciamtee tu in kong um hi, banghang ziam cile, hi thu sia a kingsong khat ah a piangku thu hi ngawl hi.

²⁷Kumpipa Agrippa awng, kamsaangte na um ziam? Na up sia hong he khi hi!” Paul in ci hi.

²⁸Agrippa in Paul munah, “Hi hun tomno sungah Tapidaw hong suaksak zo tu in ki um ni ziam?” ci hi.

²⁹“Hun tom kale, sau kale, nang le tuni a ka thuson hong ngaite theampo, hi thikkolte kihel ngawlin, keima bang na hi thei natu uh sia Pathian tungah ka thungetna ahi hi!” ci in zo hi.

³⁰Tua zawkciangin Kumpipa, ngamuk mangpa, Bernice le a dang teng ding a,

³¹a nusiat zawk uh ciangin, khat le khat tungah, “Hisia pa in thongtaak natu ahizong, thi natu ahizong, bangma vawt nei ngawl hi,” kici uh hi.

³²Agrippa in Festus munah, “Kumpilianpa tungah a zukhaan ngawl hile, hisia pa kisuatasak thei tu hi,” ci hi.