Read Siyin Chin Sawltakte 28 Bible Online

Sawltakte 28 - Siyin Chin bible

Sawltakte 28

¹Ngammuang in vaalbo tung ka thet uh ciang, tua tuikulh sia Malta hi ci in ka he uh hi.

²Tua munah a teang mihingte in, hong pawlvawt mama uh hi. Nguazu tu kithoai in khuasik mama ahikom, amate in meimang sep in, hong muak uh hi.

³Paul in thingkang lom khat toai in, mei sungah a thut ciangin, meisa thuak la in, ngul khat hong pusuak a, ama khut tungah hong kivial hi.

⁴A khua mite in, Paul khut tungah a kaai ngul a mu uh ciangin khat le khat sia, “Hi sia pa in tualthat khat hi nak tu hi. Tuipi pan suakta ahihang a nuntak tu sia Thumaan in oai ngawl hi,” ci uh hi.

⁵Ahihang Paul in, tua ngul sia mei sungah thing a, ama bangma tat ngawl hi.

⁶Amate in Paul sia a ci a sa tum keak tu a, tua ahibuale, pukvawk in a thi tu ngak hi. Ahihang ngei hialma a thi tu a ngak zawk uh ciang, a tumdang piang ngawl ahikom, a ngaisutna uh kheal kik a, “Ama sia pathian khat hi ei!” ci uh hi.

⁷Tua mun panin a khuala ngawlna ah tuikulh ukpa Publius ii neisa lo pawlkhat om hi. Ama in hong muak a, ni thum sung zin hong do hi.

⁸Publius ii pa sia ciisuk natna le ngilsan natna taw lupmuntung ngak hi. Paul in, ama ii inndoi sungah tumin, thungen a, ama tungah a khut nga in damsak hi.

⁹Hi bangin hong pian ciangin, tuikulh tung a cina dang theampo zongh hong pai tek a, dam siat uh hi.

¹⁰Amate in letsong tam ma hong pia a, teambaw taw ka din uh ciangin, khualhawna sung a ka kisap uh nate amate in teambaw tungah hong koisak uh hi.

¹¹Tha thum zawkciangin, Alexandria panin, phalbi hunsung tua tuikulh tungah a taam “The Twin Gods (Apeang Pathiante)” a kici teambaw khat taw ka ding uh hi.

¹²Syracuse khuapi ka theng uh a, ni thum ka taam uh hi.

¹³Tua mun panin ka ding suak uh a, Rhegium khuapi ka theng uh hi. A zing ciang, thangsang panin, vuiva tu in hong kipan hi, tuaciangin ni nii sungin Puteoli khua ka theng uh hi.

¹⁴Tua munah thu um pawlkhat ka mu uh a, amate in nipi khat taamin hong sawl hi. Tua mun panin, Rome khua ka theng uh hi.

¹⁵Rome a thu umte in ko thu hong za a, Appius Sumbuk le Zin inn Thum a kicina khuate dong hong muak uh hi. Paul in amate a mu ciangin, Pathian tungah lungdamko in, tha nga tuam mama hi.

¹⁶Rome khua sungah ka thet uh ciangin, Paul sia ama nguakin, a cing ngalkap khat taw kikoi hi.

¹⁷Ni thum zawkciangin, Paul in tua munah a om Jew lampuite sam a, kikhopna khat vawt hi. Amate hong kikhop ciang, amate tungah, “Ka Israel mipuite awng, ih mite tungah ahizong, taanghpupite tung pan ih lua ngeina zeksate tung ahizong, langpanna bangma nei ngawl napi, Jerusalem ah kei thong hong taaksak a, Rome mite tungah hong aap uh hi.

¹⁸Rome mite in kei thu hong sit zawkciang, thi natu kilawm bangma sep nei ngawl ka hi komin, hong tha nuam hi.

¹⁹Ahihang Jew te in tuabang tu sia nial ahikom, Kumpilianpa tungah ka zukhaan kul hi, tua ahihang, ka mipuite langpanin mawsak natu ka nei bua hi.

²⁰Tua hangin, no taw kimu in kong paupui natu ka nget ahi hi. A tatak ci leang, Israel mite ii a lamet uh pa hu in, hi bangin kei thikkol hong kibul hi,” ci hi.

²¹Amate in ama munah, “Kote in nang thu huvau sia Judea panin, laithak ka nga bua uh hi, tua mun panin, ih mipuite hong pai in, nang taw kisai thupiang khat pawpo ahibuale a sia son tu khat po hong puak bua uh hi.

²²Ahihang nangma ngaisut nate ka za nuam uh hi, banghang ziam cile, mun theampo ah mihingte in, na pawl puite a siatson tek sia ka he uh hi,” ci uh hi.

²³Tua ahikom, Paul taw a ni kiciam a, tua ni in mihing tam mama Paul omna ah hong pai uh hi. Zingsang pan zan dong, amate tungah Pathian Ngam thu hil thiang a, Moses Thukham le kamsaangte lai at nate sisanh in, Jesus thu a tel thei natu hanciam in son hi.

²⁴Pawlkhatte sia ama kammalte um uh a, ahihang a dangte in, a um bua uh hi.

²⁵Tua ahikom, amate kithukim thei ngawlin, Paul ii hi bangin, a ci zawkciang nusia uh hi. “Thaa Thiangtho in, Isaiah kamsaangpa tungtawnin, na taanghpupite tungah a sonna sia bangza in pha ziam!

²⁶Banghang ziam cile ama in, ‘Pai in hi mite tungah son in: No in na ngangai, na ngangai tu a, ahihang na tel buatu uh hi; Na e en, na e en tu uh a, ahihang na mu buatu uh hi,

²⁷banghang ziam cile, hi mite ii thin sia bulthu hi, amate in a bil uh humcip a, a mit uh si hi. Tua hi buathong le, amate ii mit in mu tu a, a bil taw a za tu uh hi, tuaciang a thinsung in a tel tu uh hi, tuaciangin kei sangah hong kiheak tu a, amate ka damsak tu hi,’ Pathian in ci hi,” a ci hi.

²⁸Tuaciang Paul ii thukhupna ah: “Tuasia ciang, Pathian ii ngupna thu sia Gentile te tungah, kipuak zo hi ci in note in na heak tu uh ahi hi. Amate in ngai tu hi!”

²⁹Paul in hi teng a ci zawkciang Jew te amate teng nasia tak kinialin a cia uh hi.

³⁰Paul in kum nii sung atu a saap inn sungah teang a, ama taw a kimu tu in a pai theampo leangna do hi.

³¹Ama in hangsan tak le suakta takin Pathian Ngam thuhil a, Topa Jesus Christ thu hilcian hi.