Read Siyin Chin Sawltakte 4 Bible Online

Sawltakte 4 - Siyin Chin bible

Sawltakte 4

¹Peter le John mihingte tungah thu a son laitakin, thiampite pawlkhat, biakinn cingte a ukpa le Sadducee te pawlkhat amate kungah theng uh hi.

²Amate lungkim ngawl hi, banghang ziam cile, mithite thaw kik tu thu a kilanghsakna in, Jesus sia thina pan tho kik zo hi, cina thu sawltakte nii in mihingte tung a hil hu ahi hi.

³Tua ahikom amate in, sawltakte nii manin, ni niam zo ahikom a zing ciang dong thong sungah khum uh hi.

⁴Ahihang a thuson a za mihing tam mama in um a, thu um mi tulnga bang khang hi.

⁵A zing ciangin Jew lampuite, upate le Thukham hil syate, Jerusalem ah kikhawm uh hi.

⁶Amate in Thiampi Lianbel Annas, Caiaphas, John, Alexander, le Thiampi Lianbel ii innkuanpui dangte taw kimu uh hi.

⁷Amate in sawltakte sia a mai ah dingsak a, “Hi sia bangbangin seam nu ziam? Note in bang vaang nei a, akua min zangh nu ziam?” ci in dongh uh hi.

⁸Thaa Thiangtho taw a kidim Peter in zo a, “Minamte lampui le upate awng,

⁹peangzaw pa tungah thupha vawtna le ama a kidamsakna hu in, kote tuni in, thu sit thuak ka hi uh le

¹⁰no teng le Israel mi theampo in hi mihingpa sia thinglamtee tung na thalup, Pathian ii thina pan a phok kik Nazareth mi Jesus Christ min taw dam thiang in hi sung note mai ah hong ding ahi hunlam na heak uh kul tu hi.

¹¹Jesus sia laithiangtho in hi bangin a ci pa ahi hi. ‘No inn sate ii na nil uh suang sia, a theampo sung pan a thupibel suang suak hi.’

¹²Ngupna sia ama bek tungtawnin kinga thei hi; leitung bup ah eite hong ngum thei tu in, Pathian piaksa midang khat zongh om ngawl hi,” ci hi.

¹³Council upate in, Peter le John sia mihing thawthong hi a, pilna nei ngawl hi napi, tuza in a hansanna sia lamdang sa uh hi. Tuasia ciangin amate ngeal sia Jesus ii kitholpui ngeite ahi hunlam phawk uh hi.

¹⁴Ahizong amate in bangma a ci thei bua uh hi, banghang ziam cile a kidamsakpa sia, Peter le John taw tua munah dingkhawm in a om mu uh hi.

¹⁵Tua ahikom amate Council zum pan pusuak tu in sawl a, tua zawkciang amate sungah, kikum uh hi.

¹⁶“Hi mite bang law tu hi ziam?” ci in amate kidongh uh hi. “Jerusalem a teang mihing sim in, hi a lamdang mama nalamdang lakna amate in vawt uh hi, ci in he siat zo uh a, ih nial thei bua hi.

¹⁷Ahihang mihingte sungah, hi thu a kizel ngawl natu in, Jesus min suang a, a pau kikik nawn ngawl natu amate tawngin thupia tawng,” ci uh hi.

¹⁸Tua ahikom amate sam a, sungtangsak kikin, Jesus min taw thu a son ngawl natu, a hil ngawl natu in thupia uh hi.

¹⁹Ahihang Peter le John in zo kik a, “Pathian mai ah — note thu kong nit tu le, Pathian thu ka nit tu uh, koisia maan zaw ziam, noma tek in khensat tavun.

²⁰Banghang ziam cile ka mu sa uh, ka zaaksa uh thute son ngawlin, ka om thei buatu uh hi,” ci uh hi.

²¹Council te in, nasia seseam in a kidop natu in, tawng a, thu a piak zawkciang suaktasak hi. Amate daan piak tu suak thei ngawl hi, banghang ziam cile mi theampo in thupiang sa sia tungtaang ah Pathian pok kim uh hi.

²²Hi nalamdang lakna ahi a kidamsak pa sia kum sawmli vaal pha zo hi.

²³A kisuataksak po ciang Peter le John sia a pawlte kungah heak kikin, thiampi liante le upate ii son teng son uh hi.

²⁴Thu umte in a zaak uh ciang, Pathian tungah hi bangin thungen khawm uh hi: “Vantung, leitung le tuipi le a sungah a om theampo ii Topa le Bitphuapa!

²⁵Thaa Thiangtho tungtawnin, kote taanghpupi David, na naseampa tungah hi bangin na ci hi. ‘Banghangin Gentile te sia a thin uuk ngawp ziam; banghangin mihingte in a vaal thawthongin vaihawm ku ziam?

²⁶Leitung kumpite in amate le amate kithoai kholin, tuaciangin ukpite kikhawmtua a, Topa le ama ii Messiah langpan uh hi.’

²⁷Banghang ziam cile Herod le Pontius Pilate in hi khuapi ah Gentile te le Israel mite taw kisitua in, a thiangtho na Naseampa Jesus, Messiah tu a, na vawt pa sia langpan takpi uh hi.

²⁸Nangma vaangletna le na deina taw tuabangin piang hen ci a, na khensat sa theampo a taangtun natu in, amate kisitua uh hi.

²⁹Tu in Topa awng, amate hong tawnnate, na za in a, ko na naseamte in, na thu hangsan tak ka son thei natu in, hong piangsak ta'n.

³⁰Cidamna a pian natu in, na khut hong vaan ta'n a, nalamdang laknate le, a lamdang vawtte, a thiangtho na Naseampa Jesus min taw a kisep thei natu, hong thukim ta'n,” ci uh hi.

³¹A thunget a man uh ciangin amate kikhopna mun sia kingawk hi. Amate sia Thaa Thiangtho taw kidim a, Pathian thu sia hanna taw son tu in kipan uh hi.

³²Thu umte pawl sia thinkhat lungkhat in, om uh hi. Kuama in kei aituam neisa hi, a ci om ngawlin, a neisa uh theampo khat le khat kihawm vadiam uh hi.

³³Sawltakte in Topa Jesus thaw kikna thu, vaangletna lian taw, tetti pang uh a, Pathian in thupha tam mama amate theampo tungah buak hi.

³⁴Amate pawl sungah kitaangsapna a nei kuama a om bua hi. Lo neite le inn neite in, zuakin a nga uh sumte paipui a,

³⁵sawltakte tungah aap uh hi. Tuaciang, tua sumte mihing sim in, a kisapna uh bangin, hawm tek uh hi.

³⁶Tuaciang, Cyprus ah a suak, Levi mi Joseph, sawltakte ii Barnabas a nak pa (a khiakna “hanthawnpa”)

³⁷in, a neisa lo khat zuakin, a sum teng paipui a, sawltakte tungah aap hi.