Read Siyin Chin Sawltakte 5 Bible Online

Sawltakte 5 - Siyin Chin bible

Sawltakte 5

¹Ahihang Ananias min nei mihing khat om a, a zi Sapphira taw a neisa pawlkhat zuak hi.

²A zi zongh ii thukimpuina taw sum pawlkhat amate atu keam tuam a, a om lai teng sawltakte aap hi.

³Peter in, “Ananias awng, banghangin Satan in na thin uksak a, Thaa Thiangtho theam in, na neisate zuak man sum aheap banghangin keam ni ziam?

⁴Na neisa na zuak ma in, nangma aa ahi hi; tuaciang na zuak zawkciangin, tua sum sia nangma aa ma ahi hi. Tua hikasap banghangin tuabang ngamtat tu khensat ni ziam? Mihingte a theam na hi bua hi — Pathian a theam suak zo ni hi!” ci hi.

⁵Hi thu a zaak po ciang, Ananias pukin thi hi; tuaciang tua thu a za theampo lau uh hi.

⁶Khangnote hong tum a, a luang tun in, pusuapui in phum uh hi.

⁷Nai thum bang kihal zawkciangin, bang thu piang ci he ngawlin a zi hong sungtang hi.

⁸Peter in ama munah, “Na neisa na zuak uh sung pan, hi teng sia nang le na pasal ii na nga uh a buppi ma ahi nam, hong son ta'n,” ci hi. “Hi hi, a buppi ma hi,” ci in zo hi.

⁹Tua ahikom Peter in ama tungah, “Banghangin nang le na pasal in, Topa ii Thaa sia ze et nu ziam? Na pasal a phumte sia tu laitakin, kongbiang ah om hi, nangma zongh amate in hong pua tu a, hong pusuapui tu hi!” ci hi.

¹⁰Thakhat thu in ama sia Peter peang ah puk in thi hi. Khangnote sungtang a, ama sia a thisa in mu uh hi, tua ahikom amate in doipua ah pusua in, a pasal hui ah phum uh hi.

¹¹Pawlpi bup le hi thu a za mihing theampo lau mama tek uh hi.

¹²Sawltakte in mihingte sungah nalamdang laknate le a lamdangte tam mama vawt uh hi. Thu um theampo Solomon Talaap ah kisitua uh hi.

¹³Mihingte in amate sia phat son mama napi a puasang mi kuama in a pawm ngam bua uh hi.

¹⁴Ahihang mihing tam vaial amate pawl sungah kibelap a — Topa a um pa le numei honkhat suak hi.

¹⁵Sawltakte nasepna hangin, lampite tungah ciinate hong kipua a, Peter hong pai ciang ciinate pawlkhat tungah ama ii limh beak ii a liap thei natu dei in, lupnate tung le phahte tungah sialin lampi hui ah lumsak uh hi.

¹⁶Tuaciang in Jerusalem kiim khuate pan mihonpite hong pai in, ciinate le doaiveite paipui uh hi; tuaciang amate theampo kidamsak hi.

¹⁷Thiampi Lianbelpa le a pawl a lawm theampo, le tua mun a om Sadducee pawlte in sawltakte sia nasia takin eang uh hi; tua ahikom thu vawt tu in khensat uh hi.

¹⁸Amate in sawltakte manin, nautaangte kikhumna thong sungah khum uh hi.

¹⁹Ahihang tua zanin Topa vantunglalang khat in thong kongkha hon a, sawltakte a pusuasak zawkciangin, amate tungah,

²⁰“Pai tavun a, Biakinn sungah dingin, hi nuntakna thak thu, mihingte tungah son tavun,” ci hi.

²¹Sawltakte in, a sawl bangin ni a, khuavak ciangin Biakinnpi sungah tumin, hilcianna nei tu in kipan uh hi. Thiampi Lianbelpa le a pawl a lawmte in Jew lampuite theampo Council bup kikhopna ah kikhawm tu in sam uh hi; tua zawkciangin sawltakte amate mai ah a paipui natu in thonginn ah thupia uh hi.

²²Ahihang thong ukte thonginn a thet uh ciangin, sawltakte thong sungah a mu bua uh hi, tua ahikom Council zum ah heak kikin a thu bang teng son a,

²³“Thonginn ka thet uh ciangin, thong kongkhate kikalh bikbek in om a, kongkhacing theampo zongh thong kongcing in ka mu uh hi; ahihang kongkha ka hon uh ciang, a sungah kuama ka mu bua uh hi!” ci uh hi.

²⁴Biakinn cingte ukpa le thiampi liante in, hi thu a zaak uh ciangin, sawltakte bang tat hi tu ziam, ci in lamdang sa uh hi.

²⁵Tuasia ciang pasal khat hong sungtang a, amate munah, “Ngai vun! Thong sung a na khum uhte in mihonte hilcian in, Biakinnpi sungah om uh hi!” ci hi.

²⁶Tua ahikom Biakinn cing ukpa sia, a khutnuai mihingte taw pai in, sawltakte paipui kik uh hi. Amate in mihingte ii suangtum taw a den tu lau ahikom, sawltakte tungah zawthawk thu a zangh ngam bua uh hi.

²⁷Sawltakte sungtan pui uh a, Council te mai ah, dingsakin, Thiampi Lianbelpa in thusit hi.

²⁸“Hisia pa min taw thu hilcian thei nawn ngawl tu nu hi, ci in nasia takin thu kong pia zo uh hi; ahihang tu in bang vawt kik nu ziam! Jerusalem khuathing ah, na thu hilcianna uh kizelsak zo a, ama thina thu kote maw hong pusak nuam nu hi!” ci hi.

²⁹Peter le sawltak dangte in zo kik a, “Pathian thu ka nit tu uh hi a, mihingte thu ka nit tu uh hi ngawl hi.

³⁰Note in Jesus thinglamtee tungah kilh in, na thalup zawk uh ciang, ka taanghpupite ii Pathian in Jesus thina panin phong kik hi.

³¹Israel mite a mawna uh panin, kisiik kik a, mawmaisakna a nga natu hunpha pia tu in, Pathian in ama thosak kik a, a ziatsang ah koi in Lampuipa le Hunpa suaksak hi.

³²Ama thu a nite tungah a piak letsong ahi, Thaa Thiangtho le kote in hi thu huvau ah tetti ka hi uh hi,” ci uh hi.

³³Council upate sung a kihelte in, hi thu a zaak uh ciangin, a thin uh uuk mama a, sawltakte thatlum nuam uh hi.

³⁴Ahihang amate sung panin Phariseete Gamaliel kici Thukham hil syapa khat ahi ngual theampo ii zatak pa sia Council sungah hong ding hi. Ama in sawltakte tawmvei a pusuasak natu in thupia a,

³⁵tuaciang Council te tungah, “Israel mipuite awng, hi mite tungah na vawt tu uh kidawm tavun.

³⁶Tu nung hiat in, Theudas kici khat hong piang a, ama le ama sia a nasia mama mi khat in kison a, tuaciang pasal zali bang in ama pawm uh hi. Ahihang ama sia kithat a, a nungzuite kithethaang in, a vai teng a bona thu na he nginge uh hi.

³⁷Hisia zawkciangin, Galilee mi Judas kici khat mihing simna a kivawt hun lai in, hong piang hi; ama zongh nungzui mihonpi khat nei a, ahihang ama zongh kithatlum in, a nungzuite sia kithethaang hi.

³⁸Tua ahikom hi thu tungtaang ah, hi mite bangma law heak vun kong ci hi. Amate nguak koi nginge po vun! Banghang ziam cile amate ngealna le sepna in, mihing sepna ahile hong bo tu a,

³⁹ahihang tuate in Pathian kung pan hong pai ahile, zo zo ngawl tu nu hi. Noma le noma Pathian langpan a, a do kisua tu nu hi!” ci hi. Council in Gamaliel ii ngaisut piakna zui hi.

⁴⁰Sawltakte sungtang in sawl a, vel in, Jesus min taw a hil nawn ngawl natu thupia hi; tua zawkciang amate tha uh hi.

⁴¹Sawltakte in Council a nusiat ciang, Jesus atu in maizum thuak tu, Pathian in kiphu sa ahikom lungdam uh hi.

⁴²Tuaciang ni simin Biakinnpi sung le ngual innte ah Jesus Messiah ii Lungdamna Thupha hilcianna le thuhilna nei uh hi.