Read Siyin Chin Sawltakte 8 Bible Online

Sawltakte 8 - Siyin Chin bible

Sawltakte 8

¹Tuaciang Stephen a thalupna sia Saul in lungkimpui hi. Tua ni mama in Jerusalem a om pawlpi sia vawtsiatna nasia takin thuak tu kipan hi. Sawltakte simngawl thu um dangte theampo sia Judea le Samaria ngamkhente sungah kithethaang siat uh hi.

²Thu umte pawlkhat in Stephen phum uh a, hee in awnging tak taw ama kaa uh hi.

³Ahihang Saul ahile Pawlpi sukthap natu hanciam hi; inn khat pan inn khat ah pai in, thu umte kaikeak a, pate zongh numeite zongh thonginn sung denna in nei hi.

⁴A kithethaang thu umte in mun theampo ah pai in thuhil uh hi.

⁵Philip in Samaria khuapi ah pai in tua mun mipite tungah Messiah ii thu hil hi.

⁶Mihonpite in Philip ii thuson ngai a, nalamdang lakna a vawtte a mu uh ciang ama neakin pha tak ngai uh hi.

⁷Mihing tam mamate sung pan doai ngilote sia a nging in au a, pusuak hi; pumzawte, peangbaite tam mama dam uh hi.

⁸Tua ahikom tua khuapi sungah lungdamna lian om hi.

⁹Tua khuapi ah Simon min nei pasal khat om a, tawmvei hun sung tengin Samaria te sia ama ii mitbum lakna taw lamdang sasak hi. Ama sia mi thupi khat in ama le ama kison a,

¹⁰tuaciang khuapi sungah om theampo kidoidanna om ngawlin, ama thu ngai uh hi. “Ama in ‘Vaangletna Lianpi’ a kici tua Pathian ii vaang sia ahi hi,” ci uh hi.

¹¹Khuangei mama sung ama ii mitbum taw lamdang sasak ahikom, a thusonte pha takin ngai uh hi.

¹²Ahihang Pathian Ngam lungdamna thupha le Jesus thu Philip ii sonna a up ciangin, pate zongh numeite zongh tui kiphum uh hi.

¹³Simon mama zongh in um hi; tui a kiphum zawkciang Philip nai ah om top a, a nasia a lamdangte le nalamdang laknate a kivawt a mu ciangin lamdang sa hi.

¹⁴Jerusalem a om sawltakte in, Samaria a mihingte ii Pathian kammal a saan uh sia za ahikom amate in Peter le John sia tua mite kungah paisak hi.

¹⁵Amate hong thet uh ciang, Thaa Thiangtho a nga thei natu in, thu umte atu thungetsak hi.

¹⁶Banghang ziam cile Thaa Thiangtho sia amate khat ii tung zongh ah tuaksuk ngawl lai hi; amate sia Topa Jesus min taw a ki baptize hi bek hi.

¹⁷Tuaciang Peter le John in, amate tungah a khut uh nga a, tuasia ciangin Thaa Thiangtho nga uh hi.

¹⁸Amate tungah sawltakte a khut a ngak uh ciangin, thu um mite tungah Thaa Thiangtho a kipiak sia Simon in mu hi. Tua ahikom Peter le John tungah sum pia in,

¹⁹“Ka khut ka ngakna pawpo tungah Thaa Thiangtho a nga natu in, hi vaangletna sia kei zongh hong pia tavun,” ci hi.

²⁰Ahihang Peter in zo kik a, “Pathian letsong sia sum taw kilei thei tu in na up hu in, nang le na sum teng sia hell ah pai tahen!

²¹Nang in kote nasepna taw kisai nawn ngawl ni hi, banghang ziam cile, Pathian muna ah na thin maan ngawl hi.

²²Tua hi a, hi a sia na ngealna panin kisiik kik ta'n a, tuaciang tuabang ngaisutna na nei hu in, hong maisak natu in Topa tungah thungen ta'n.

²³Banghang ziam cile nang sia ngual eenna thin taw a kidim mawna sungah, koltaang pa hi, ci in kong mu hi,” ci hi.

²⁴Simon in Peter le John tungah, “Tu a nong ci teng kei tungah hong tun ngawl natu, nong hesuakna in Topa tungah thu hong ngetsak tavun,” ci hi.

²⁵Amate in tetti pangin Topa thute a thansak zawkciangin, Peter le John te Jerusalem khua ah cia kik uh hi. A cia lam in, Samaria ngam khuano tam mamate ah Lungdamna Thupha hil uh hi.

²⁶Topa vantunglalang khat in, Philip munah, “Kithoai in a, thangsang zuanin Jerusalem pan Gaza paina lampi zui in va pai ta'n,” ci hi. (Hi lampi sia kizangh nawn ngawl hi.)

²⁷Tua ahikom Philip in kithoai in pai hi. Tu in Ethiopia kumpinu ii sum kholna a uk cil kinget Ethiopia mi a thupi ulian khat sia a inn ah cia tu in pai hi. Ama sia Jerusalem ah Pathian bia tu in a theng hi a, a siphu ngalleang taw cia kik hi. Tuabangin a cia kawmin, Isaiah thubu sim hi.

²⁹Thaa Thiangtho in Philip munah “Va pai ta'n a, tua leang taw a kinai in va om ta'n” ci in sawl hi.

³⁰Philip in del a, a phak ciangin, ama in kamsaangpa Isaiah thubu a sim sia za hi. “Na sisim teng na tel ziam?” ci in dongh hi.

³¹Ulian pa in “Hong thiangson khat a om buale bangbangin tel tu khi ziam?” ci in zo kik hi. Leang tungah Philip kaato tu in sam a, amate tokhawm hi.

³²A sim laithiangtho mun sia hi bang ahi hi: “Ama in ngawlup tu in a kikai tuu khat taw kibang hi, ama in a mul a kimeetsak ciangin, a haam ngawl tuuno taw kibang hi. Kam khat zongh a pau bua hi.

³³Ama sia kizawnsak vawt a, thukhaikim thu kitaansak hi. Ama ii suan le paalte huvau sia kuama in a son thei buatu hi, banghang ziam cile, ama ii leitung nuntakna bo hi.”

³⁴Ulianpa in, Philip munah “Kamsaangpa pauna hisia akua a cinopna ziam hong son tan? Ama le ama kici nuam ziam maw midang khat ziam?” ci in dongh hi.

³⁵Tuaciang Philip in son tu in kipan hi; hi Lai Thiangtho kammal pan panto in, Jesus ii Lungdamna Thupha son hi.

³⁶Tuabangin a pai susuk ciangin tui omna mun khat theng hi, tuaciang Ulianpa in, “Hi sungah tui om hi. Tui ka kiphum natu in bang in hong khak ziam,” ci hi.

³⁷Philip in ama tungah “Na thin theampo taw na um le, tui kiphum thei tu ni hi,” ci hi. Ama in “Um khi hi. Jesus Christ sia Pathian Tapa hi, ci in um khi hi,” ci in zo hi.

³⁸Ulianpa in a leang a tawlngak natu thupia a, amate nii tui sungah tuaksuk in, Philip in ama tuiphum hi.

³⁹Tui sung pan hong kaato uh ciangin, Topa Thaa in Philip la hi. Ulianpa in ama mu kik nawn ngawl ahihang, lungdamna taw kidim in, a pai ngei in paisuak hi.

⁴⁰Philip sia Azotus khua ah theng ahi hunlam ama le ama kitel hi; ama Caesarea ah pai suak a, lamdung khua theampo ah Lungdamna Thupha hil hi.